ބްރެޒިލްގެ ފުޓްބޯޅަ ލެޖެންޑް ޕެލޭގެ ސިއްހީ ހާލަތު ރަނގަޅުވަމުން އަންނަކަމަށް އޭނާ އެޑްމިޓްކޮށްފައިވާ އަލްބާޓް އެއިންސްޓެއިން ހޮސްޕިޓަލުން ބުނެފިއެވެ.
އެހޮސްޕިޓަލުން ލިބޭ ޚަބަރު ތައް ބުނާ ގޮތުން ޕެލޭގެ ބަލިހާލަތު މިހާރު އަންނަނީ ރަނގަޅު ވަމުންނެވެ. ނަމަވެސް އަދިވެސް އޮތީ ހޮސްޕިޓަލުގައި އެޑްމިޓް ކޮށްފައެވެ. އަދި ހޮސްޕިޓަލުން ދޫކޮށްލާނެ ދުވަހެއް މިވަގުތު ބުނަން ނޭނގޭކަމަށް ހޮސްޕިޓަލުން ބުނެއެވެ.
އުމުރުން 82 އަހަރުގެ ޕެލޭ ހޮސްޕިޓަލުގައި އެޑްމިޓްކުރީ އޭނާގެ މުޅިހަށިގަނޑު ދުޅަވުމުގެ އިތުރުން ހާޓް ފެއިލިއާ އެއްގެ ސަބަބުންނެވެ. ބްރެޒިލްގެ ސައޯ ޕައުލޯގައި ހުންނަ އަލްބާޓް އެއިންސްޓެއިން ހޮސްޕިޓަލުގައި އޭނާ އެޑްމިޓްކުރީ މިދިޔަ ނޮވެމްބަރު މަހުގެ 29 ވަނަ ދުވަހުއެވެ. މިދިޔަ އަހަރުގެ ސެޕްޓެމްބަރު މަހުން ފެށިގެން އޭނާ އަންނަނީ ގޮހޮރުގެ ކެންސަރު ބައްޔަށް ފަރުވާ ކުރަމުންނެވެ.
މިފަހުން ހޮސްޕިޓަލުގައި އެޑްމިޓް ކުރުމަށްފަހު ޑޮކްޓަރުން ވަނީ އޭނާ އަލުން ރަނގަޅުވާނެ ކަމުގެ އުންމީދު ކަނޑާލާފައެވެ. އެއީ ކެންސަރަށް ފަރުވާ ކުރުމަށް ދޭ ކީމޯ ތެރަޕީގެ އަސަރު ނުކުރާތީއެވެ.
ޕެލޭ ވަނީ ބްރެޒިލްގެ ގައުމީ ޓީމާއެކު ވޯލްޑް ކަޕްގެ ތަށި ތިން ފަހަރު އުފުލާލާފައެވެ. މިއީ އެއް ކުޅުންތެރިއަކު އެންމެ ގިނަ އަދަދަކަށް ވޯލްޑް ކަޕް ކާމިޔާބުކުރި އަދަދެވެ. ބްރެޒިލާއެކު ޕެލޭ ވޯލްޑް ކަޕް ކާމިޔާބުކުރީ 1958، 1962 އަދި 1970ގައެވެ. އޭނާ ވަނީ ބްރެޒިލް ޓީމަށް ކުޅެދިން 92 މެޗުގައި 77 ލަނޑު ޖަހާފައެވެ.
