ޑީއާރްޕީއަށް 3000 މެންބަރުން ހަމަނުކުރެވުމުން ޕާޓީ އުވާލުމުގެ މަސައްކަތް ފަށައިފި

ޑީއާރްޕީއަށް 3000 މެންބަރުން ހަމަނުކުރެވުމުން، އެ ޕާޓީ އުވާލުމުގެ މަސައްކަތް ފަށައިފިއެވެ.

ރާއްޖެއެމްވީއާ ވާހަކަ ދައްކަވަމުން އިލެކްޝަންސް ކޮމިޝަނުގެ ރައީސް ފުވާދު ތައުފީޤު ވިދާޅުވީ، ކޮންމެ އަހަރަކުވެސް ދެ ހާފަކަށް ބަހާލައިގެން އެ ކޮމިޝަނުން ޕާޓީތަކުގެ މެންބަރުންގެ އަދަދު ޗެކްކޮށް، ފޮނުވަންޖެހޭ ނޯޓިސް ފޮނުވާ ކަމަށެވެ. އެގޮތުގެ މަތިން އަހަރު ފެށޭއިރާއި، މެދު ތެރޭގައި ކޮމިޝަނުން ޗެކް ކުރެއެވެ.

ގާނޫނުގައި ބުނެފައިވާގޮތުގައި، ސިޔާސީ ޕާޓީއެއްގައި މަދުވެގެން 3000 މެންބަރުން ތިބެން ޖެހޭނެއެވެ.

ސިޔާސީ ޕާޓީތަކުގެ ގާނޫނުގައި ބުނާ 3000 މެންބަރުން ހަމަނުވެގެން ޑީއާރްޕީ އުވާލަން މީގެ ކުރިންވެސް އެ ޕާޓީއަށް ނޯޓިސް ދިނެވެ. ނަމަވެސް އެ ފަހަރު ނޯޓިސް ދީފައިވާ މުއްދަތުގެ ތެރޭގައި, ޕާޓީން 3000 މެންބަރުން ހަމަކުރުމާގުޅިގެން އެކަމުގެ ރަސްމީ ލިޔުން 27 ޖޫންގައި ޕާޓީއަށް އޮތީ ދީފައެވެ. އެފަހަރު ޕާޓީއަށް މެންބަރުން ހަމަކުރަން ނޯޓިސް ފޮނުވީ މާޗު މަހުއެވެ.

ނަމަވެސް މިއަހަރުގެ ދެވަނަ ފޭސްގައި ޗެކްކުރިއިރު، ޕާޓީގެ މެންބަރުންގެ އަދަދު ހަމަނުވަތީ އަނެއްކާވެސް ޕާޓީއަށް ނޯޓިސް ދިނީކަން ފުވާދު ފާހަގަ ކުރެއްވިއެވެ.

އެހެންނަމަވެސް، ނޯޓިސްއަށް ދިން 3 މަހުގެ މުއްދަތު ހަމަވި ފަހުންވެސް މެންބަރުން ހަމަކުރެވިފައި ނުވާކަމަށް އިލެކްޝަންސް ކޮމިޝަންގެ ރައީސް ފުވާދު ތައުފީޤު ރާއްޖެއެމްވީއާ ވާހަކަ ދައްކަވަމުން ވިދާޅުވިއެވެ. ވުމާއެކު، ޤާނޫނުގައިވާ ގޮތުގެ މަތިން އެ ޕާޓީ އުވާލުމުގެ މަސައްކަތް ފަށާފައިވާކަމަށް ފުވާދު ވިދާޅުވިއެވެ.

ފުވާދު ވިދާޅުވީ، ޕާޓީ އުވާލުމާއި ގުޅޭ ނޯޓިސްވެސް މިހާރު ޑީއާރްޕީއަށް ދީފައިވާ ކަމަށެވެ. އެގޮތުން ސިޔާސީ ޕާޓީތަކުގެ ގާނޫނުގައި ބުނާ އަދަދަށް މެންބަރުން ހަމަނުވެގެން އެކަމުގެ ނޯޓިސް ޖުލައި މަހުގެ 25 ވަނަ ދުވަހު އެ ޕާޓީއަށް ވަނީ ދީފައެވެ.

ރާއްޖޭގައި ސިޔާސީ ޕާޓީތައް ގިނަނަމަވެސް، ގިނަ ޕާޓީތަކުގައި 10،000 މެންބަރުންވެސް ހަމައެއްނުވެއެވެ. ގާނޫނުގައި ބުނާގޮތުން ދައުލަތުން ބަޖެޓް ދޭނީ 10،000 މެންބަރުން ހަމަވާ ޕާޓީތަކަށް އެކަންޏެވެ. މި އަދަދު ހަމަވާ ޕާޓީތަކުގެ ތެރޭގައި ހިމެނެނީ 4 ޕާޓީއެވެ. އެއީ އެމްޑީޕީއާއި ޕީޕީއެމްއާއި ޖުމްހޫރީ ޕާޓީއާއި އަދާލަތު ޕާޓީއެވެ. 3000 މެންބަރުން ޕާޓީގައި ހަމަނުވާނަމަ އެ ޕާޓީއެއް އުވާލާނެއެވެ.