ޗައިނާއާއި ޢަރަބީންގެ ގުޅުމާ މެދު ސައުދީ ބުނަނީ ކީކޭ؟

ޗައިނާ-އަރަބް ސްޓޭޓްސް ސަމިޓްއާއި ޗައިނާ-ގަލްފް ކޯޕަރޭޝަން ކައުންސިލް (ޖީސީސީ) ސަމިޓްއަކީ ޗައިނާއާއި ޢަރަބި ދަޢުލަތްތަކާ ދެމެދު އިސްތިރާޖީ ބަދަހިކަން ޤާއިމު ކުރުމުގެ އައު ބާބެއްގެ ފެށުން ކަމަށާއި، މި ބައްދަލުވުންތަކަކީ ދޭދޭ އެކުވެރިކަން އައު އުސްމިންތަކަކަށް ގެންގޮސްދޭ ބައްދަލުވުންތަކެއް ކަމަށް، ސައުދީ އަރަބިއްޔާގެ ފޮރިން މިނިސްޓަރު، ޕްރިންސް ފައިސަލް ބިން ފަރްހާން އަލް ސަޢުދު ވިދާޅުވެއްޖެއެވެ.

މިދިޔަ ހުކުރު ދުވަހު ކާމިޔާބު ކަމާއެކު ކުރިއަށް ގެންދިޔަ ޗައިނާ-އަރަބް ސްޓޭޓްސް ސަމިޓްއާއި ޗައިނާ-ގަލްފް ކޯޕަރޭޝަން ކައުންސިލް (ޖީސީސީ) ސަމިޓްއަކީ، ޗައިނާއާއި ޢަރަބީންގެ ތާރީޚުގައިވެސް ކުރިއަށް ގެންދިޔަ މިފަދަ ފުރަތަމަ ބައްދަލުވުންތަކެވެ.

މި ބައްދަލުވުންތައް ކުރިއަށް ގެންދަވާފައިވަނީ ޗައިނާގެ ރައީސް ޝީ ޖީންޕިންގް އިތުރުން ޢަރަބި ޤައުމުތަކުގެ 10 ލީޑަރެއްގެވެސް ޚާޒިރުގައެވެ.

ސަމިޓްތަކަށް ފަހު އޮތް ނޫސްވެރިންގެ ބައްދަލުވުމެއްގައި ވާހަކަދައްކަވަމުން ސައުދީގެ ފޮރިން މިނިސްޓަރު، ޕްރިންސް ފައިސަލް ބިން ފަރްހާން އަލް ސަޢުދު ވިދާޅުވީ، އެންމެ މަތީ ފަންތީގެ ތަރައްޤީއާ ބެހޭ ގުޅުންތަކުގެ ސިލްސިލާތަކެއް ފެށިފައިވާ ކަމަށެވެ. އަދި މި ބަދަހި ކަމަކީ ދެ ފަރާތަށްވެސް އެކަމުގައި ކާމިޔާބު ލިބެނިވި ބަދަހި ކަމެއްގެ ގޮތުގައި އޭނާ ވަނީ ސިފަ ކުރައްވާފައެވެ.

ސިޔާސީ، އިޤްތިޞާދީ އަދި ޢިލްމީ މައިދާނުގައި، ޢަރަބި ޤައުމުތަކާއި ޖީސީސީ ޤައުމުތަކުން، ޗައިނާއަށް އެއްބާރުލުން ދެމުން ދާނެ ކަމަށްވެސް ސައުދީގެ ފޮރިން މިނިސްޓަރު ވަނީ ފާހަގަކުރައްވާފައެވެ.

ސައުދީގެ އޮފިޝަލު އިތުރަށް ވިދާޅުވީ، ދޭދޭ މަސްލަހަތު އެކުލެވޭ އިތުރު ކަންކަމުގައި ޗައިނާއަށް އެއްބާރުލުން ދެވިދާނެ އިތުރު ގޮތްތައް ދެނެގަތުމަށް ސައުދީ އަރަބިއްޔާއިން އެދޭ ކަމަށެވެ.

އަދި މިހާރު އޮތް އިސްތިރާޖީ ބަދަހިކަން، އައު އުސްމިންތަކަކަށް ގެންދިއުމަށް ޗައިނާއާއެކުގައި މަސައްކަތް ކުރުމަށްވެސް ސައުދީއިން އެދޭ ކަމަށް ޕްރިންސް ފައިސަލް ބިން ފަރްހާން އަލް ސަޢުދު ވަނީ ވިދާޅުވެފައެވެ.