"މޭޑް އިން ސިއަލްކޮޓް": ޤައުމީ ޓީމު ކޮލިފައި ނުވިއަސް ޕާކިސްތާނުގެ ފަންނުވެރިކަން ވޯލްޑްކަޕަށް

ފުޓުބޯޅައަށް އިންތިހާ ހިތު ލޯބި ޖެހިފައި އޮތް ނަމަވެސް، މި ފަހަރުގެ ވޯލްޑްކަޕް މެޗެއް ކުޅެލުމުގެ ފުރުޞަތު ލިބޭ މިންވަރަކަށް ޕާކިސްތާނުގެ ޤައުމީ ޓީމު ކޮލިފައިއެއް ނުވެއެވެ. ކަން އެހެން އޮތެއް ކަމަކު، މި ފަހަރުގެ ވޯލްޑްކަޕްއާ ޕާކިސްތާނު މާ ބީރައްޓެހި ކަމަކަށްވެސް ބުނެވޭކަށް ނެތެވެ. ޤަޠަރުގައި މިހާރު ކުރިއަށް ފީފާ ވޯލްޑްކަޕް ފުޓުބޯޅަ މުބާރާތަށް ހާއްސަކޮށްފައިވާ ތަމްރީނު ދަނޑުތަކުގައި އެންމެ ފޯރީގައި ބޭނުން ކުރަމުންދާ ފުޓުބޯޅަތަކަކީ، ޕާކިސްތާނުގެ އިރުއުތުރުގެ ސިޓީއެއް ކަމަށް ވާ ސިއާލްކޮޓްގެ އުފެއްދުންތަކެކެވެ.

ސިއަލްކޮޓްގައި ހިންގާ ފޯވާޑް ސްޕޯޓްސްއަކީ، ކުޅިވަރާ ބެހޭ އެކި ކަހަލަ ސަމާނުތައް އުފެއްދުމުގެ މަސައްކަތުގައި، އެއް ޤައުމަށް ވުރެ ގިނަ ޤައުމުގައި އޮޕަރޭޓް ކުރަމުންދާ ކުންފުންޏެކެވެ. ފޯވާޑް ސްޕޯޓްސްއިން އެޑިޑާސް ކުންފުންޏާއެކު މަސައްކަތް ކުރަމުންދާތާ މިހާރު 20 އަކަށް އަހަރުވެއްޖެއެވެ. މި ކުންފުންޏަކީ، ވޯލްޑްކަޕްގެ ރަސްމީ ބޯޅަ ކަމުގައި ވާ އެޑިޑާސް އަލް ރިހްލާ އުފައްދަމުންދާ 2 ކުންފުނީގެ ތެރެއިން އެއް ކުންފުންޏެވެ.

ފޯވާޑް ސްޕޯޓްސްގެ ޑައިރެކްޓަރ، ޙަސަން މައްސޫދު ޚަވާޖާ ބުނި ގޮތުގައި، އޭނާގެ ކުންފުނިން ވަނީ އަލް ރިހްލާ މޮޑެލްގެ 5.5 މިލިއަނަށް ވުރެ ގިނަ ބޯޅަ އުފައްދާފައެވެ. އަދި މެޗުތަކުގައި ބޭނުން ކުރާ ފެންވަރުގެ ހައި ކޮލިޓީ ބޯޅައިގެ 60000 އެއްހާ ނަކަލު ބޯޅަވެސް އޭގެ ތެރޭގައި ހިމެނެއެވެ.

1280 ލިމިޓަޑް އެޑިޝަން ބޯޅައަކީ، "ކަނެކްޓަޑް ބޯލް ޓެކްނޮލޮޖީ"އާއެކު އުފައްދާފައިވާ ބޯޅަތަކެކެވެ. މި ޓެކްނޮލޮޖީއަކީ، އޯފްސައިޑްވުން ފަދަ ކަންކަން ހަލުވި ދުވެލީގައި ދެނެގަތުމަށް އެހީވެދޭ ޓެކްނޮލޮޖީއަކަށް ވާ އިރު، މި އެޑިޝަންގެ ބޯޅަތައް އުފައްދާފައި ވަނީ ޗައިނާގައެވެ. އެ ބޯޅަތައް އުފެއްދި ކުންފުންޏާ ބެހޭ ތަފްސީލުތައް ދިނުމަށް އެޑިޑާސްއިން އިންކާރު ކުރެއެވެ.

ސިއަލްކޮޓްއަކީ ފުޓުބޯޅައާއި ކުޅިވަރުގެ އެކި ކަހަލަ ސަމާނުތައް އުފެއްދުމުގެ މުއްސަނދި ތާރީޚެއް އޮތް ސިޓީއެކެވެ. އިސްތިޢުމާރީ އަޅުވެތިކަމުގެ ދުވަސްވަރާ ހިސާބަށްވެސް އެކަން ދެމިގެންދެއެވެ. އިނގިރޭސިންގެ އަތުން ޕާކިސްތާނު މިނިވަންވީ، މީލާދީން 1947 ވަނަ އަހަރުއެވެ.

މިލިއަނެއްހާ މީހުން ދިރިއުޅޭ ސިއަލްކޮޓްގެ އާބާދީގެ 8 ޕަސެންޓް މީހުން ހަރަކާތްތެރިވަނީ ބޯޅަ އުފެއްދުމުގެ ސިނާއަތުގައެވެ. ނަމަވެސް، އެމީހުންގެ އުފެއްދުންތަކުގެ ޙަޤީޤީ ބޭނުން ކުރަމުންދާ މަންޒަރު ބަލާލާނެ ފުރުޞަތު ލިބެނީ މަދު މީހަކަށެވެ.

ޗައިނާއާއި އިންޑިއާއާއެކު، މިއަދު ޕާކިސްތާނަކީ މުޅި ދުނިޔޭގެ ނިސްބަތުންވެސް އެންމެ ފުޅާ ދާއިރާއެއްގައި ފުޓުބޯޅަ އުފައްދާ އެއް ޤައުމެވެ. ސިއަލްކޮޓަކީ، އެ މަސައްކަތުގެ ސިނާއީ ހަބްއެވެ. ލޯކަލް ޗޭމްބަރ އޮފް ކޮމަރސްއިން ބުނާ ގޮތުގައި، ޖޫން 2022 ގައި މާލީ އަހަރު ނިންމާލިއިރު، އެ ސިޓީގައި އެކަނިވެސް 43 މިލިއަން ބޯޅަ ވަނީ އުފައްދާފައެވެ. އެ ބޯޅަތަކުގެ އަގު، 191 މިލިއަން ޑޮލަރަށް އަރައެވެ.