މަސްވެރިންގެ ދުވަހުގެ ހަރަކާތްތައް ފަރެސްމާތޮޑާގައި ފަށައިފި
މަސްވެރިންގެ ދުވަހުގެ ޚާއްސަ ފޯރަމެއް ކުރިއަށްދޭ
މަސްވެރިންގެ ދުވަހުގެ ހަރަކާތްތައް ފެށުން
މިއަދު ފާހަގަކުރަމުން މިދާ މަސްވެރިންގެ ދުވަހުގެ ހަރަކާތްތައް ގދ. ފަރެސްމާތޮޑާގައި ފަށައިފިއެވެ.
މިއަހަރުގެ މަސްވެރިންގެ ދުވަހުގެ ރަސްމީ ހަރަކާތްތައް ބާއްވާނެ ރަށަކީ ގދ. ފަރެސްމާތޮޑާކަމުގައި ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ވަނީ ހަމަޖައްސަވާފައެވެ. މިއާއެކު މަސްވެރިންގެ ދުވަހުގެ ހަރަކާތްތައް ފަރެސްމާތޮޑާގައި މިހާރު ވަނީ ފަށާފައެވެ.
ރާއްޖެއެމްވީއަށް މައުލޫމާތުދެމުން ފިޝަރީޒް މިނިސްޓްރީން ބުނީ، މަސްވެރިންގެ ދުވަހާ ގުޅިގެން ފޯރަމާއި އެކްސްޕޯއެއް އެރަށުގައި ކުރިއަށްދާ ކަމަށެވެ.
މަސްވެރިންގެ ދުވަހާ ގުޅިގެން ކުރިއަށްގެންދާ ފޯރަމް ފަށާފައިވަނީ މިމަހުގެ 9 ވަނަ ދުވަހުއެވެ. ދެ ދުވަހަށް ކުރިއަށްދާ މި ފޯރަމްގައި މަސްވެރިން އެއްތަނަކަށް ޖަމާވެ، އެމީހުންނަށް ހުރި ގޮންޖެހުންތަކާ ގުޅޭގޮތުން މަޝްވަރާކުރާނެއެވެ. އެކި ރަށްރަށުން ގިނަ އަދަދެއްގެ މަސްވެރިން މި ފޯރަމްގައި ބައިވެރިވާކަމަށް މިނިސްޓްރީން ބުނެފައިވެއެވެ. މި ފޯރަމްގައި، މަސްވެރިކަމުގެ ސިނާއަތުގައި ހިއްސާ އޮންނަ ކުންފުނިތަކުން ބައިވެރިވާކަމަށް މިނިސްޓްރީން މައުލޫމާތުދެއެވެ. މި ފޯރަމްގެ ޕެނަލްގައި ފިޝަރީޒް މިނިސްޓަރާއި މި ދާއިރާގައި ހަރަކާތްތެރިވާ ބޭބޭފުޅުން ހިމެނިވަޑައިގަންނަވައެވެ.
ފިޝަރީޒް މިނިސްޓްރީން ބުނީ ފޯރަމްގައި ބައިވެރިވި މަސްވެރިންގެ މައިގަނޑު ކަންބޮޑުވުމަކީ މަސް ކިރުމުގައި ދިމާވާ ދަތިތައް ކަމަށެވެ. އަދި މަހަށް ލިބެންވާ ފައިސާ ވަގުތުން ލިބުމުގައި ހުންނަ މައްސަލަތަކާއި، އަގުގެ މައްސަލަކަމަށް މިނިސްޓްރީން މައުލޫމާތުދެއެވެ. މި ފޯރަމް ކުރިއަށްދާނީ ހޮނިހިރު ދުވަހުގެ ހަވީރު 3:30ގެ ނިޔަލަށެވެ.
މީގެ އިތުރުން މަސްވެރިކަމުގެ ދުވަހާ ގުޅިގެން ކުރިއަށްދާ އެކްސްޕޯގައި މަސްވެރިކަމުގެ ސިނާއަތާ ގުޅުންހުރި 8 ކުންފުންޏެއްގެ ސްޓޯލްތައް ބަހައްޓާފައިވާކަމަށް މިނިސްޓްރީން މައުލޫމާތުދެއެވެ. މީގެ ތެރޭގައި އެންސިސް، މިފްކޯ، އެމްޓީސީސީފަދަ ކުންފުނިތައް ފާހަގަކޮށްލެވެއެވެ. މީގެ އިތުރުން ފަރެސްމާތޮޑާގެ ރައްޔިތުންގެ ސްޓޯލެއްވެސް މި އެކްސްޕޯގައި ބަހައްޓާފައިވާކަމަށާއި، މި ސްޓޯލްގައި އެ ރަށުގެ ޚާއްސަ ބައެއް ކަންކަން ހިމަނާފައިވާކަމަށް މިނިސްޓްރީން މައުލޫމާތުދެއެވެ.
މީގެ އިތުރުން މިއަދު ހަވީރު ކުޑަކުދިންގެ ހަވީރެއް ކުރިއަށްދާނެ ކަމަށް މިނިސްޓްރީން ބުނެއެވެ. މި ހުރިހާ ހަރަކާތަކަށްވެސް ރަނގަޅު ތަރުހީބެއް ލިބެމުންދާކަމަށް މިނިސްޓްރީން މައުލޫމާތުދެއެވެ.
މަސްވެރިންގެ ދުވަހުގެ ރަސްމީ ހަރަކާތްތައް ކުރިއަށްދާނީ އާދިއްތަ ދުވަހުއެވެ. މި ހަރަކާތްތަކުގައި ބައިވެރިވެވަޑައިގެންނެވުމަށް ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު އާދިއްތަ ދުވަހު ފަރެސްމާތޮޑާއަށް ވަޑައިގަންނަވާނެއެވެ.
