މޮރޮކޯ ވަރުގަދަ، ޕޯޗުގަލަށް މެޗު ފަސޭހައެއްނުވާނެ: ސަންޓޯސް

ފީފާ ވޯލްޑް ކަޕްގެ ކުއާޓަރ ފައިނަލްގައި މޮރޮކޯއާ ދެކޮޅަށް ނުކުންނައިރު، އެ ޓީމަކީ ވަރުގަދަ ޓީމެއް ކަމަށާއި ޕޯޗުގަލަށް މެޗު ފަސޭހެ ނުވާނެކަމަށް އެ ޓީމުގެ ކޯޗު ފެނާންޑޯ ސަންޓޯސް ބުނެފިއެވެ.

ސަންޓޯސް މިހެން ބުނީ މުބާރާތުގައި މޮރޮކޯއާ ދެކޮޅަށް ނިކުންނަ މެޗުގެ ކުރިން އޮތް ޕްރެސް ކޮންފަރެންސްގައި ވާހަކަ ދައްކަމުންނެވެ. ސަންޓޯސް ބުނީ މޮރޮކޯއަކީ ވަރުގަދަ ޓީމެއްކަމަށާއި، އެ ޓީމު ފެންނަނީ ޕޮޒިޝަން ހިފަހައްޓައިގެން ކުޅޭ މަންޒަރު ކަމަށެވެ. އޭނާ ބުނީ މޮރޮކޯ ޓީމުގައި ތިބި ގިނަ ކުޅުންތެރިންނަކީވެސް ވަރުގަދަ ލީގުގައި ކުޅެމުން އަންނަ ކުޅުންތެރިން ކަމަށެވެ. އެހެންކަމުން މެޗު ޕޯޗުގަލަަށް ފަސޭހަވާނެ ކަމަށް ދެކިގެންނުވާނެކަމަށާއި، އެ މެޗު ވާނީ ވަރަށް އުނދަގޫ މެޗަކަށް ކަމަށް އޭނާ ބުންޏެވެ. އޭނާ ބުނީ މީގެ ހަތަރު އަހަރު ކުރިއަށް ރަޝިޔާގައި އޮތް މުބާރާތުގައިވެސް މޮރޮކޯއާ ދެކޮޅަށް ކުޅުނު ކަމަށެވެ. އެ މެޗުން ޕޯޗުގަލް 1-0ން މޮޅުވިނަމަވެސް ކުޅުންތެރިން ކުރަންޖެހުނު ބުރަ މަސައްކަތް އޭނާއާއި، ޚުދު ކުޅުންތެރިންނަށްވެސް އެނގޭކަމަށެވެ. އޭނާ ބުނީ އިދިކޮޅު ޓީމެއްގެ ގޮތުގައި މޮރޮކޯއިން ޕޯޗުގަލަށް ކުރާނެ އުނދަގޫވެސް ކުޅުންތެރިންނަށް އެނގޭނެކަމަށާއި، ނަމަވެސް މެޗާ ކުރިމަތިލާނީ އެއްވެސް ބިރެއް ނެތި ކަމަށެވެ.

ސަންޓޯސް ބުނީ ސްވިޒަލެންޑާ ދެކޮޅަށް ކުޅުނު މެޗުގެ ކުރިން އޭނާ ކެޕްޓަން، ކްރިސްޓިއާނޯ ރޮނާލްޑޯއާ ވާހަކަދެއްކި ކަމަށާއި، މެޗުގެ ފުރަތަމަ 11ގައި ރޮނާލްޑޯ ނުހިމަނަން ނިންމި ވާހަކަވެސް ބުނިކަމަށެވެ. އޭނާ ބުނީ އެ ދުވަހުވެސް ރޮނާލްޑޯއަކީ ޓީމަށް ކިހާ މުހިންމު ކުޅުންތެރިއެއްކަން ކިޔައިދީފައި ވާނެކަމަށާއި، ފުރަތަމަ 11ގައި ރޮނާލްޑޯ ނުހިމަނަން ނިންމި ސަބަބުވެސް ސާފުކޮށްދިން ކަމަށެވެ. ސަންޓޯސް ބުނީ އެ ވާހަކަ ބުނި ވަގުތު ރޮނާލްޑޯގެ ފަރާތުން ކޮންމެވެސް ވަރެއްގެ ނުތަނަވަސްކަމެއް ފެނުނު ނަމަވެސް، ފަހުން ސަބަބު ތަފްސީލްކޮށްދިނުމުން ރޮނާލްޑޯވެސް އެކަމަށް "އާނ ބަސް" ބުނިކަމަށެވެ. އޭނާ ބުނީ އެ ގޮތަށް ދިމާވަން ޖެހުނު ސަބަބުވެސް އެނގޭ ކަމަށެވެ. އެއީ ރޮނާލްޑޯ ކަހަލަ، އަބަދު ޓީމުގެ ފުރަތަމަ 11ން ޖާގަ ލިބޭ ކުޅުންތެރިއަކު މެޗަކަށް ނުވަތަ ދެ މެޗަކަށް ބެންޗުގައި އިންނަން ޖެހުމުން ވާނެ ގޮތެއް ކަަމަށެވެ.

މީގެ އިތުރުން ސަންޓޯސް ބުނީ ރޮނާލްޑޯއަކީ ޕޯޗުގަލަށް ކިހާ މުހިންމު ކުޅުންތެރިއެއްކަން ރޮނާލްޑޯ އެކި ފަހަރު މަތިން ސާފުކޮށްދީފައި ވާނެ ކަމަށެވެ. އޭނާ ބުނީ ރޮނާލްޑޯއަކީ ޕޯޗުގަލްގެ ކެޕްޓަން ކަމަށާއި، ޓީމުގައި ރޮނާލްޑޯގެ ދައުރު އަބަދުވެސް ބޮޑު ވާނެ ކަމަށެވެ. އޭނާ ބުނީ މިވަގުތު ނޫސްވެރިންވެެސް ރޮނާލްޑޯ އެކަނި ދޫކޮށްލަން ޖެހޭ ކަމަށާއި، ސަބަބަކީ ރޮނާލްޑޯ ޕޯޗުގަލްގެ ފުޓުބޯޅައަށް ކޮށްދީފައިވާ ކަންކަމުން ކަމަށެވެ.

މުބާރާތުގެ ކުއާޓަރ ފައިނަލްގައި ޕޯޗުގަލް އިން މޮރޮކޯއާ ދެކޮޅަށް ނުކުންނާނީ ހޮނިހިރު ދުވަހުގެ ރޭ ރާއްޖޭ ގަޑިން 20:00ގައެވެ.