ފަތުރުވެރިކަމުގެ ބޭނުންތަކަށް ކުއްޔަށް ދޫކޮށްފައިވާ ތަންތަން ތަރައްޤީކުރުމަށް ދީފައިވާ މުއްދަތު އިތުރުކޮށްދިނުމާއި ކުއްޔާއި ޖޫރިމަނާ ފަސްކޮށްދިނުމުގައި ޢަމަލުކުރާނެގޮތުގެ ގަވާއިދަށް އަމަލުކުރަން ފަށައިފިއެވެ.

މި ގަވާއިދަށް އަމަލުކުރަން ފަށައި ދިވެހި ސަރުކާރުގެ ގެޒެޓުގައި ވަނީ ޝާއިއުކޮށްފައެވެ.

މި ގަވާއިދުގައި ވާގޮތުން ފަތުރުވެރިކަމުގެ ބޭނުމަށް ތަންތަން ކުއްޔަށް ދިނުމާ ގުޅޭގޮތުން މިނިސްޓްރީ އޮފް ޓޫރިޒަމާއެކު ވެފައިވާ އެއްބަސްވުމުގައި ދީފައިވާ މުއްދަތަށް ތަރައްޤީކޮށް ނިމިފައިނުވާ ތަންތަނުގެ ކޮންސްޓްރަކްޝަން ޕީރިއަޑް، މި ގަވާއިދުގައި ކަނޑައަޅައިފައިވާ ހަމަތަކާ އެއްގޮތްވާ ގޮތުގެ މަތީން އިތުރުކޮށްދިނުމުގެ އިޚްތިޔާރު މިނިސްޓްރީއަށް ލިބިގެންވެއެވެ.

އެހެންނަމަވެސް މިގޮތަށް މުއްދަތު އިތުރުކޮށްދިނުމަށް މައިގަނޑު ދެ ކަމަކަށް އެއްބަސްވާންޖެހެއެވެ. އެއީ އިތުރުކޮށްދޭ ކޮންސްޓްރަކްޝަން ޕީރިއަޑުގައި ތަން އެއްކޮށް ތަރައްޤީކޮށް ނިންމައި ހިންގަން ފެށުމަށް އެއްބަސްވުން، ނުވަތަ ފޭސްތަކަކަށް ބަހައިލައިގެން ތަރައްޤީކުރަން ހުށަހަޅާ ނަމަ، މަދުވެގެން 1 ފޭސް، މި ކޮންސްޓްރަކްޝަން ޕީރިއަޑުގައި ނިންމައި ހިންގަން ފެށުމަށް އެއްބަސްވުމާއި، ކޯޕަރޭޓް ސޯޝަލް ރެސްޕޮންސިބިލިޓީ (ސީއެސްއާރ) ގެ ގޮތުގައި ތަން ތަރައްޤީކޮށް ނިމި ހިންގަން ފަށާ ތާރީޚުން ފެށިގެން 3 އަހަރުދުވަހުގެ ތެރޭގައި ކޮންމެ އަހަރަކު 4 ކުއާޓަރަށް ހަމަހަމަޔަށް ބަހައިލައިގެން މިނިސްޓްރީ އޮފް ފިނޭންސްގައިވާ ފަތުރުވެރިކަމުގެ ޞިނާޢަތުގެ ޓްރަސްޓް ފަންޑުގެ އެކައުންޓަށް ދެއްކުމަށް އެއްބަސްވުމެވެ.

މީގެ އިތުރުން ކޮންސްޓްރަކްޝަން ޕީރިއަޑް ހަމަވާ ތާރީޚާ ހަމައަށް އަރައިފައިވާ ކުއްޔާއި ޖޫރިމަނާއާއި، މި ގަވާއިދުގެ ދަށުން އިތުރުކޮށްދެވޭ ކޮންސްޓްރަކްޝަން ޕީރިއަޑުގައި ދައްކަންޖެހޭ ކުލި ދެއްކުން ފަސްކޮށްދިނުމުގެ ލުއި ލިބޭނެއެވެ. މިގޮތުން ފަސްކޮށްދެވޭ ކުއްޔާއި ޖޫރިމަނާ ދެއްކުމުގައި ދެ ގޮތެއް އިޚުތިޔާރުކުރެވެއެވެ. އެއް ގޮތަކީ އެ ތަނެއް ހިންގުމަށް އޮޕަރޭޓިން ލައިސަންސް ދޭ ތާރީޚުން ފެށިގެން 2 އަހަރުދުވަހުގެ ގްރޭސް ޕީރިއަޑަކަށްފަހު، ކުއްޔާއި ޖޫރިމަނާ ދައްކަން ފަށައި، ފައިސާ އިން ދައްކަން ފަށާ ތާރީޚުން ފެށިގެން 5 އަހަރުގެ ތެރޭގައި ކޮންމެ އަހަރެއްގެވެސް 4 ކުއާޓަރަށް ހަމަހަމައަށް ބަހާލައިގެން އިންޓަރެސްޓެއް ނެތި ދެއްކުމެވެ. ދެވަނަ ގޮތަކީ ރަށް ތަރައްޤީކޮށް ނިމިގެން ހުޅުވާ ތާރީޚުން ފެށިގެން 2 އަހަރުދުވަހުގެ ގްރޭސް ޕީރިއަޑަކަށްފަހު، އަރައިފައިވާ ކުއްޔާއި ޖޫރިމަނާ ދައްކަން ފަށައި، ކުލީގެ އެއްބަސްވުމުގެ ބާކީ އޮންނަ މުއްދަތުގެ ތެރޭގައި އަހަރަކު 4 ކުއާޓަރަކަށް ހަމަހަމައަށް ބަހާލައިގެން އަހަރަކު 3 އިންސައްތަ ސިމްޕަލް އިންޓަރެސްޓަކާއެކު ކުއްޔާއި ޖޫރިމަނާ ދެއްކުމެވެ.

މީގެ އިތުރުން ފޭސްތަކަކަށް ބަހައިލައިގެން ތަރައްޤީކުރަން ހުށަހަޅާނަމަ، މަދުވެގެން 1 ފޭސް، ފުރަތަމަ ކޮންސްޓްރަކްޝަން ޕީރިއަޑުގައި ނުވަތަ މި ގަވާއިދުގެ ދަށުން އިތުރުކޮށްދީފައިވާ ކޮންސްޓްރަކްޝަން ޕީރިއަޑުގައި ނިންމައި، އެ ރަށުގައި ތަރައްޤީކޮށްފައިވާ ރިސޯޓު ނުވަތަ ފަޅުގައި ހިއްކައިފައިވާ ރަށްތަކުގެ ތެރެއިން އޮޕަރޭޓިން ލައިސަންސް ދޫކޮށްފައިވާ ރަށް ހިންގަން ފަށާ ތާރީޚުން ފެށިގެން ބާކީ ނުނިމި ހުރި ރަށްތައް ތަރައްޤީކުރުމަށް ކޮންސްޓްރަކްޝަން ޕާމިޓެއް ދިނުމުގެ އިޚްތިޔާރު މިނިސްޓްރީއަށް ލިބިގެންވެއެވެ. އަދި މި ޕާމިޓުގެ ދަށުން ރަށް ނުވަތަ ރަށްތައް ތަރައްގީކުރަމުންދާއިރު، އެތަންތަނަށް އަރަމުންދާ ކުއްޔާއި ޖޫރިމަނާ ފަސްކޮށްދިނުމުގެ އިޚުތިޔާރުވެސް މިނިސްޓްރީއަށް ލިބެއެވެ.

6 ޑިސެމްބަރުން ފެށިގެން މި ގަވާއިދަށް އަމަލުކުރަން ފެށުމާއެކު، ފަތުރުވެރިކަމުގެ ބޭނުންތަކަށް ކުއްޔަށް ދޫކޮށްފައިވާ ތަންތަން ތަރައްޤީކުރުމަށް ދީފައިވާ މުއްދަތު އިތުރުކޮށްދިނުމާއި ކުއްޔާއި ޖޫރިމަނާ ފަސްކޮށްދިނުމުގައި ޢަމަލުކުރާނެގޮތުގެ ގަވާއިދާއި، އެ ގަވާއިދަށް ގެނެސްފައިވާ އިސްލާހުތައް އުވުނީއެވެ.