ސިއްހީ ދާއިރާގެ މުސާރަ އެއްހަމަކުރުމަށްް ކުރަންޖެހޭ ދިރާސާތައް މިހާރު ދަނީ ކުރަމުން: މިއުވާން

ސިއްހީ ދާއިރާގެ މުސާރަ އެއްހަމަ ކުރުމަށްް ކުރަންޖެހޭ ދިރާސާތައް ކުރުމުގެ މަސައްކަތް މިހާރު ކުރިއަށްދާކަމަށް ރައީސް އޮފީހުގެ ތަރުޖަމާނު މިއުވާން މުޙައްމަދު ވިދާޅުވެއްޖެއެވެ.

ބުރާސްފަތި ދުވަހު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ނޫސްވެރިއަކު ކުރި ސުވާލަކަށް ޖަވާބު ދެއްވަމުން މިއުވާން ވިދާޅުވީ، ސިއްހީ ދާއިރާގެ މުސާރަ ބޮޑު ކުރުމަށް މިހާރު ބަޖެޓު ކުރެވިފައިވާ ކަމަށާއި، އެކަމަށްޓަކައި ކުރަންޖެހޭ ދިރާސާތައް ކުރުމުގެ މަސައްކަތް މިހާރު ކުރިއަށްދާ ކަމަށެވެ.

މުސާރަ ބޮޑު ކުރުމުގެ މަސައްކަތްތައް ފައިނަލް ކުރެވޭނެ ސީދާ ތާރީޚެއް މިވަގުތު ދަންނަވަން ދަތިކަން މިއުވާން ފާހަގަ ކުރެއްވިއެވެ.

ސިއްހީ ދާއިރާގެ މުސާރަ އެއްހަމަ ކުރުމަށްް 500 މިލިއަން ރުފިޔާއާ ގާތްކުރާ އަދަދެއް އަންނަ އަހަރުގެ ދައުލަތުގެ ބަޖެޓުގައި ވަނީ ހިމަނާފައެވެ. އެގޮތުން ޕޭ ހާމަނައިޒޭޝަން މަސައްކަތުގެ ތެރެއިން ދެން އެންމެ އަވަހަށް މުސާރަތައް އެއްހަމަ ކުރެވިގެންދާނީ ސިއްހީ ޚިދުމަތްތެރިންނަށް ކަމަށް ފިނޭންސް މިނިސްޓްރީންވެސް ވަނީ ބުނެފައެވެ.

އޭގެ އިތުރުން، އަތޮޅުތެރޭގައި 24 ގަޑިއިރު ޚިދުމަތްދޭ ސިއްހީ މަރުކަޒުތަކަށް ވެސް ބަޖެޓު ވަނީ އިތުރުކޮށްދީފައެވެ. އަދި ސިއްހީ ޚިދުމަތްތެރިންގެ އަދަދު އިތުރުކުރުމަށް 40.3 މިލިއަން ރުފިޔާ ބަޖެޓު ކުރެވިފައިވާކަންވެސް މިނިސްޓްރީން ފާހަގަ ކުރެއެވެ.

ބަޖެޓުގައިވާ ގޮތުން އަންނަ އަހަރުގެ ނިއު ޕޮލިސީ އިނީޝިއޭޓިވްއެއްގެ ގޮތުގައި މުވައްޒަފުންނަށް ހިނގާ ޚަރަދުގެ ތެރެއިން 500 މިލިއަން ރުފިޔާއާ ގާތްކުރާ އަދަދެއް ކަނޑައެޅިފައިވަނީ ސިއްހީ ދާއިރާގެ ޑޮކްޓަރުން، ނަރުހުން އަދި އެލައިޑް ހެލްތު ޕްރޮފެޝަނަލުންނަށް މުސާރަ އެއްހަމަ ކުރުމަށްޓަކައި ކުރެވޭ ޚަރަދަށެވެ. އެހެންކަމުން 2025 ވަނަ އަހަރުގެ ނިޔަލަށް މުސާރައިގެ އައު އޮނިގަނޑުގެ ދަށުން ހުރިހާ މުވައްޒަފުންނަށް މުސާރަ ދެވޭނެ ގޮތަށް ބަޖެޓުގައި ހިމަނައިފައިވެއެވެ.

ޓީޗަރުންނާއި ޕްރިންސިޕަލުންގެ މުސާރަވެސް ބޮޑުކޮށްފައިވަނީ ސަރުކާރުން ހެދި ދިރާސާއަކަށްފަހުއެވެ. އެގޮތުން އެކި ފަންތީގެ މީހުންގެ މުސާރަ ބޮޑުވެގެންދާނެ ގޮތް އެ ދިރާސާއިން ވަނީ ދައްކުވައިދީފައެވެ.