ތޫފާން "މަންދޫސް"ގެ އަސަރު ރާއްޖެއަށް، މޫސުން ގޯސްވާނެ!
ކުރިއަށް އޮތް ތިން ދުވަހު މޫސުން ގޯސްވާނެ
ތޫފާންގެ އަސަރު
ބުރާސްފަތި ދުވަހުގެ ހެނދުނު ސްރީލަންކާގެ އިރު އުތުރުން އުފެދުނު ތޫފާން "މަންދޫސް" ގެ އަސަރު ރާއްޖެއަށް ކުރާނެ ކަމަށް މެޓް އޮފީހުން ބުނެފިއެވެ.
ރާއްޖެޓީވީގެ "ފަށާއިރު" ޕްރޮގްރާމަށް ދެއްވި އިންޓަރވިއުއެއްގައި މޯލްޑިވްސް މީޓިއަރޮލޮޖިކަލް ސެންޓަރުގެ އެސިސްޓެންޓް މީޓިއަރޮލޮޖިސްޓް ހުސައިން ވަހީދު ވިދާޅުވީ މި ތޫފާން މިހާރު މަޑުމަޑުން ދަތުރުކުރަމުންދަނީ އިންޑިއާގެ އައްސޭރިފަށަށް ކަމަށެވެ. މިއާއެކު ވަރަށް ބޮޑު ސަރަހައްދެއްގައި ވިއްސާރަ ވިލާ އުފެދެމުންދާ ކަމަށާއި، ރާއްޖޭގައިވެސް ކޮންމެވެސް ވަރަކަށް ވިއްސާރަ ވިލާ އުފެދެމުންދާކަމަށް އޭނާ ވިދާޅުވިއެވެ.
ވަހީދު ވިދާޅުވީ ތޫފާންގެ ބާރުގަދަވެގެންދިއުމާއެކު ރާއްޖެ ސަރަހައްދުގައި ވައި ގަދަވެގެންދާނެ ކަމަށެވެ. އަދި ކުރިއަށްއޮތް ދެތިން ދުވަހު މޫސުން ގޯސްވާނެ ކަމަށާއި، ވަކިން ޚާއްސަކޮށް ދަތުރުފަތުރު ކުރާ ފަރާތްތަކުން މިކަމަށް ސަމާލުވުމަށް ވަހީދު އިލްތިމާސްކުރެއްވިއެވެ.
ވަހީދު ވިދާޅުވީ މި ތޫފާން އަރާނީ އިންޑިއާއަށް ކަމަށެވެ. މިމަހުގެ 10 ވަނަ ދުވަހު އިންޑިއާއަށް އަރާނެ ކަމަށް ވަހީދު ވިދާޅުވިއެވެ.
ވަހީދު އިތުރަށް ވިދާޅުވީ މި ދުވަސްވަރަކީ ބޭ އޮފް ބެންގޯލުގައި ތޫފާންތައް އުފެދޭ ދުވަސްވަރެއް ކަމަށެވެ. މި ދުވަސްވަރު ބޭ އޮފް ބެންގޯލުގައި ދެ ތޫފާން އުފެދޭނެ ކަމަށް އިންޑިއާގެ މޫސުމާ ބެހޭ އިދާރާއިން މީގެ ކުރިން ލަފާކޮށްފައިވާކަމަށް ވަހީދު ވިދާޅުވިއެވެ.
އެހެންކަމުން މިއީ މިއަހަރު އަރާނެ އެންމެ ފަހު ތޫފާން ކަމަށް ބެލެވޭ ކަމަށާއި، މި ތޫފާން އަރައި ނިމުމުން މޫސުން ދާނީ ރަނގަޅުވަމުން ކަމަށް އޭނާ ވިދާޅުވިއެވެ.
