އިރާދަކުރެއްވިއްޔާ އެމްޓީސީ އާއި ހަވާލުކޮށްފައިވާ އެއާޕޯޓުތަކުގެ މަސައްކަތް އެ މުއްދަތުގައި ނިންމަވާނެ ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެެކްޓިން ކޮމްޕެނީ (އެމްޓީސީސީގެ) ސީއީއޯ އާދަމް އާޒިމް ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި ވާހަކަދައްކަވަމުން އާޒިމް ވަނީ އެމްޓީސީސީން މިހާރު 4 އެއާޕޯޓެއްގެ މަސައްކަތްކުރަމުންދާ ކަަމަށް ވިދާޅުވެފައެވެ. އެ މަސައްކަތް ކުރިއަށް އޮތް އަހަރު ތެރޭގައި ނިމޭނެ ކަމުގެ އުންމީދު ބޮޑު ކަމަށް އާޒިމް ވިދާޅުވިއެވެ. އާޒިމް ވަނީ އެމްޓީސީސީ އިން ކުރަމުންދާ މަސައްކަތްތަކުގެ ތެރެއިން ގދ. ފަރެސްމާތޮޑާ އެއާޕޯޓުގެ އަމަލީ މަސައްކަތް މިއަހަރުގެ ޑިސެމްބަރުގެ ނިޔަލަށް ނިންމޭނެ ކަމަށް ފާހަގަކުރައްވާފައެވެ. މީގެ ކުރިން މަސައްކަތް ކުރީ މިއަހަރު ތެރޭގައި ފަރެސްމާތޮޑާ އެއާޕޯޓު ހުޅުވުމަށް ކަމަށާއި ނަމަވެސް ހާލަތު ތަންދިންގޮތުން އިގްތިސާދީ ބައެއް ސަބަބުތަކާއި ހުރެ ޕްލޭންތައް ބަދަލުކުރަން ޖެހުނީ ކަމަށް އާޒިމް ވިދާޅުވިއެވެ.
މީގެ އިތުރުން މިވަގުތު މަސައްކަތް ކުރިއަށްދާ މ. މުލި އެއާޕޯޓާއި، ރ. އަލިފުށި އެއާޕޯޓު އަދި ފ. މަގޫދޫ އެއާޕޯޓުގެ މަސައްކަތް ވެސް އަންނަ އަހަރުގެ ތެރޭގައި ނިންމާލެވޭނެ ކަމަށް އާޒިމް ވިދާޅުވިއެވެ. ނަމަވެސް މި މަސައްކަތްތަކުގައި ވެސް ގޮންޖެހުން ހުރިކަން އޭނާ ފާހަގަކުރެއްވިއެވެ.
