ސިޔާސީ ގޮތުން ނިންމާ ނިންމުންތަކަކީ ކޮރަޕްޝަން ނޫން ކަމަށް ބެލެވޭ ފަދަ ގޮތަކަށް ކަންކަން ބައްޓަންވެގެންދޭ – އޭސީސީ
އެންޓި ކޮރަޕްޝަން ކޮމިޝަންގެ މަސައްކަތްތައް އަދި ދައުލަތުގެ އެހެން އިދާރާތަކުގެ މަސައްކަތްތައް ވެސް ރައްޔިތުން ބޭނުންވާ ލެވެލްއަށް ނުގެނެވޭ
އެންޓި ކޮރަޕްޝަން ކޮމިޝަންގެ ޑިރެކްޓަރ އޮފް ޕްރިވެންޝަން އަލީ ޝަމީމް
ސިޔާސީ ގޮތުން ނިންމާ ނިންމުންތަކަކީ ކޮރަޕްޝަން ނޫން ކަމަށް ބެލެވޭ ފަދަ ގޮތަކަށް ކަންކަން ބައްޓަންވެގެން ދިއުމުން، އެންޓި ކޮރަޕްޝަން ކޮމިޝަންގެ މަސައްކަތްތައް އަދި ދައުލަތުގެ އެހެން އިދާރާތަކުގެ މަސައްކަތްތައް ވެސް ރައްޔިތުން ބޭނުންވާ ލެވެލްއަށް ނުގެނެވޭކަމަށް އެންޓި ކޮރަޕްޝަން ކޮމިޝަންގެ ޑިރެކްޓަރ އޮފް ޕްރިވެންޝަން އަލީ ޝަމީމް ވިދާޅުވެއްޖެއެވެ.
ބައިނަލްއަގުވާމި އެންޓިކޮރަޕްޝަން ދުވަހާއި ގުޅިގެން، ރާއްޖެ ޓީވީގެ ފަލަސުރުޚީ ޕްރޮގްރާމުގައި ވާހަކަދައްކަވަމުން ޝަމީމް ވިދާޅުވީ އެންޓި ކޮރަޕްޝަން ކޮމިޝަންގެ މަސައްކަތްތައް އަދި ދައުލަތުގެ އެހެން އިދާރާތަކުގެ މަސައްކަތްތައް ވެސް ރައްޔިތުން ބޭނުންވާ ލެވެލްއަށް ނުގެނެވޭކަން ފާހަގަކުރެވޭ ކަމަށެވެ. މައިގަނޑު އެއްސަބަބަކީ މުއައްސަސާތަކެއް އެކަންޏެއް ނޫން ކަމަށާއި، މައިގަނޑު ސަބަބުތަކެއް ކަމަށް ގަބޫލުކުރެވެނީ މަލްޓި ޕާޓީ އެކުލެވޭ ސިޔާސީ ނިޒާމެއް ރާއްޖެއަށް ތައާރަފްވެގެން އައުމާއި ގުޅިގެން ސިޔާސީ ގޮތުން އެ ނިންމާ ނިންމުންތަކަކީ ކޮރަޕްޝަން ނޫން ކަމަށް ބެލެވޭ ފަދަ ގޮތަކަށް ކަންކަން ބައްޓަންވެގެން ދިއުން އެއީ ވަރަށް ބޮޑަށް ފާހަގަކުރެވޭ ކަމެއް ކަމަށެވެ.
ޝަމީމް ވިދާޅުވީ ރާއްޖޭގައި ކަންކަން ބައްޓަންވެފައި އޮންނަގޮތުންނާއި، ސިޔާސީ ގޮތުން، ވަރަށް އުސް މަގާމުތަކަށް، މުޖްތަމައު ބަލައިނުގަންނަ ފަރާތްތަކުން އަންނަ ކަމަށެވެ. އަދި އެހެންވުމުގެ ސަބަބުން އިންޓެގްރިޓީއާއި ނަޒަހާހަތްތެރިކަމާއި، ވެލިއުސްއަށް އިހްތިރާމްކުރުމުގެ ބައި ވަރަށް ބޮޑަށް މުޖްތަމައު ތެރޭގައި ދަށްވާ ކަމަށެވެ.
ބައިނަލްއަގުވާމީ އެންޓި ކޮރަޕްޝަން ދުވަސް ފާހަގަކުރުމަށް ނަޒާހަތްތެރިކަމަށް މުޖުތަމައު އަހުލުވެރިކުރުވަން ގިނަ މަސައްކަތްތަކެއް ކުރަން ރާވާފައިވާކަމަށް އެންޓި ކޮރަޕްޝަން ކޮމިޝަން (އޭސީސީ) އިން ވަނީ ބުނެފައެވެ.
ދުވަހާ ގުޅިގެން ހިންގާ ހަރަކާތްތައް ފަށާފައިވަނީ ކ. ތުލުސްދޫއިންނެވެ. މިގޮތުން ސްކޫލް އިންޓެގްރިޓީ ޕްރޮގްރާމުގެ ދަށުން ނަޒާހަތްތެރިކަމާގުޅޭ ކަންކަން ހިމަނައި އެ ސްކޫލުގެ ފާރުތައް ޒީނަތްތެރިކޮށްފައިވެއެވެ. އަދި ކުޑަކުދިންނަށް ނަޒާހަތްތެރިކަމަކީ ކޮބައިކަން ދަސްކޮށްދިނުމުގެ ގޮތުން "ކިޔަމާ ކިޔަމާ" ގެ ނަމުގައި ޕްރޮގްރާމެއް ކުރިއަށްގެންގޮސްފައިވެއެވެ.
