އެންޓި ކޮރަޕްޝަން ދުވަސް ފާހަގަކުރުމަށް ނަޒާހަތްތެރިކަމަށް އަހުލުވެރިކުރުވަނީ
5 ޑިސެމްބަރު 2022 | ހޯމަ 01:51ދުވަހާ ގުޅޭ ހަރަކާތްތައް ފަށާފައިވަނީ ތުލުސްދޫއިން
ލޯކަލް މާރުކޭޓް ތެރެ
ބައިނަލްއަގުވާމީ އެންޓި ކޮރަޕްޝަން ދުވަސް ފާހަގަކުރުމަށް ނަޒާހަތްތެރިކަމަށް މުޖުތަމައު އަހުލުވެރިކުރުވަން ގިނަ މަސައްކަތްތަކެއް ކުރަން ރާވާފައިވާކަމަށް އެންޓި ކޮރަޕްޝަން ކޮމިޝަން (އޭސީސީ) އިން ބުނެފިއެވެ.
ކޮންމެ އަހަރެއްގެވެސް ޑިސެމްބަރު 9 ވަނަ ދުވަސް ފާހަގަކުރަނީ ބައިނަލްއަގުވާމީ އެންޓި ކޮރަޕްޝަން ދުވަހުގެ ގޮތުގައެވެ. މިއީ ކޮރަޕްޝަނާ ދެކޮޅަށް ބައިނަލްއަގުވާމީ ގޮތުން މަސައްކަތްކުރާ ދުވަހެއްގެ ގޮތުގައި ފާހަގަކުރާ ދުވަހެކެވެ.
މިއަހަރު މި ދުވަސް ފާހަގަކުރުމަށް އެސީސީން ރާވާފައިވާ ހަރަކާތްތަކާ ގުޅޭގޮތުން ރާއްޖެޓީވީގެ ފަލަސުރުޚީ ޕްރޮގްރާމުގައި ބައިވެރިވެވަޑައިގެން ވާހަކަދައްކަވަމުން އެންޓި ކޮރަޕްޝަން ކޮމިޝަންގެ ޑިރެކްޓަރ އޮފް ޕްރިވެންޝަން އަލީ ޝަމީމް އާދަމް ވިދާޅުވީ ދުވަހާ ގުޅިގެން ހިންގާ ހަރަކާތްތައް ފަށާފައިވަނީ ކ. ތުލުސްދޫއިން ކަމަށެވެ. މިގޮތުން ސްކޫލް އިންޓެގްރިޓީ ޕްރޮގްރާމުގެ ދަށުން ނަޒާހަތްތެރިކަމާގުޅޭ ކަންކަން ހިމަނައި އެ ސްކޫލުގެ ފާރުތައް ޒީނަތްތެރިކޮށްފައިވާކަމަށް ޝަމީމް ވިދާޅުވިއެވެ. އަދި ކުޑަކުދިންނަށް ނަޒާހަތްތެރިކަމަކީ ކޮބައިކަން ދަސްކޮށްދިނުމުގެ ގޮތުން "ކިޔަމާ ކިޔަމާ" ގެ ނަމުގައި ޕްރޮގްރާމެއް ކުރިއަށްގެންގޮސްފައިވާކަމަށް އޭނާ ވިދާޅުވިއެވެ.
މީގެ އިތުރުން ކުރިއަށް އޮތް ތަނަށް ރާވާފައިވާ ބައެއް ކަންކަންވެސް އޭނާ ވަނީ ހިއްސާކުރައްވާފައެވެ. މިގޮތުން ސޯޝަލް މީޑިއާގައި ފާހަގަކޮށްލެވޭ ފަރާތްތައް މެދުވެރިކޮށް ނަޒާހަތްތެރިކަމާ ގުޅޭ ވީޑިއޯތަކާއި، މެސެޖުތައް އެކި އެކި ދާއިރާތަކުން ޕްރޮމޯޓްކުރުމުގެ މަސައްކަތާއި، އޭސީސީގެ ސޯޝަލް މީޑިއާ ޕްލެޓްފޯމްތައް މެދުވެރިކޮށް ކޮރަޕްޝަން މަދުކުރުމަށްޓަކައި އާންމުން ހޭލުންތެރިކުރުމުގެ މަސައްކަތްކުރުން ޝަމީމް ފާހަގަކުރެއްވިއެވެ.
ޝަމީމް ވިދާޅުވީ މި ދުވަހަކީ ކޮންމެ އަހަރަކުވެސް ވަރަށް ކުލަގަދަކޮށް ފާހަގަކުރާ ދުވަހެއް ކަމަށެވެ. އެހެންނަމަވެސް މިއަހަރު ކޮންމެވެސް ވަރަކަށް ބަޖެޓުގެ ދަތިކަން ހުރިކަން އޭނާ ފާހަގަކުރެއްވިއެވެ.
