"ނަޗްބަލިޔޭ 8" ދިވިއަންކާ އާއި ވިވެކްގެ ޖޯޑަށް

ދިވިއަންކާ ތްރިޕަތީ އާއި ވިވެކް ދަހިޔާ "ނަޗްބަލިޔޭ 8" ކާމިޔާބުކޮށްފިއެވެ.

އާދީއްތަ ދުވަހު ސްޓާޕްލަސްއިން ދެއްކި "ނަޗްބަލިޔޭ 8" ގެ ފައިނަލް ޝޯގައި ދިވިއަންކާ އާއި ވިވެކް އެ ޝޯ ކާމިޔާބު ކުރީ ސަނާޔާ އިރާނީ އާއި މޯހިތު ސޭގަލް އާއި އަބީގައިލް ޕަންޑޭ އާއި ސަނަމް ޖޯހަރާ ވާދަކޮށްގެންނެވެ.

ދިވިއަންކާ އާއި ވިވެކް މި ޝޯ ކާމިޔާބު ކުރުމާ އެކު އެދެމީހުންނަށް 35 ލައްކަ އިންޑިއަން ރުޕީސް ވަނީ ލިބިފައެވެ.

ދިވިއަންކާއަކީ ސްޓާ ޕްލަސްގެ ޑްރާމާ ސީރީޒް "ޔޭ ހޭ މުހައްބަތެއިން" ގެ އިޝީތާ ގެ ބައިކުޅޭ ތަރިއެވެ. މިދިޔަ ޖުލައި މަހު ކައިވެނިކޮށްފައިވާ ދިވިޔަންކާ އާއި ވިވެކް ބައްދަލުވެ ގުޅުން އުފެދިފައި ވަނީ "ޔޭ ހޭ މުހައްބަތެއިން" އިންގެ ޝޫޓިންގެ ތެރެއިންނެވެ. އެ ސީރީޒްގައި ވިވެކް ކުޅެނީ ފުލުހުންގެ އޮފިސަރެއްގެ ބައެވެ.

ދިވިއަންކާ އާއި ވިވެކް ވެފައި ވަނީ ޓީވީ ޝޯތަކުގެ އެންމެ ލޯބި އެއް ޖޯޑަށެވެ. "ނަޗްބަލިޔޭ 8" ފެށުމުގެ ރިހާސަލްގެ ތެރެއިން ދިވިއަންކާ އަށް ވަނީ އަނިޔާވެ އެ ޝޯއާ ކުޑަ ދުވަސްކޮޅަކަށް ދުރަށް ދާންޖެހިފައެވެ. އޭނާއަކީ ކުރިންވެސް ބުރަކަށީގެ މައްސަލަތައް ހުންނަ މީހެއް ކަމަށް ވެއެވެ. އޭނާގެ މައިބަދައިގެ ޑިސްކެއް މީގެ ކުރިން ދުރުވެފައިވާ ކަމަށް ވެއެވެ. އަދި "ޔޭ ހޭ މުހައްބަތެއިން"ގެ ޝޫޓިންގެ ތެރެއިން އޭނާގެ ފައި ބިނދިފައި ވެއެވެ.

އެހެން ނަމަވެސް އެނބުރި އައިސް އޭނާ ވަނީ މޮޅު ހުނަރު ސްޓޭޖްމަތިން ދައްކާލާފައެވެ. އަނެއްކޮޅުން ދިވިއަންކާގެ ފިރިމީހާ ވިވެކް ގެ ފޭނުން ވެސް އަނެއް ދެ ޖޯޑަށްވުރެ އިތުރެވެ.

އެހެންކަމުން ފޭނުންގެ ވޯޓު ލިބުމުގައި މާބޮޑު ދައްޗެއް އެ ދެ މީހުންނަށް ކުރިމައްޗެއް ނުވިއެވެ.

ބެލުންތެރިންގެ ބޮޑު ތަރުހީބެއް ލިބުނު "ނަޗްބަލިޔޭ 8" ގެ ޝޯ ސްޓާޕްލަސްއިން ދައްކަން ފަށާފައި ވަނީ މިމަހުގެ 2 ވަނަ ދުވަހު ގައެވެ. މި ޝޯގައި ޖަޖުންގެ ގޮތުގައި ފެނިގެން ދަނީ ބޮލީވުޑް އެކްޓްރެސް ސޯނާކްޝީ ސިންހާ އާއި ކޮރިއޯގްރާފަރ ޓެރެންސް ލެވިސް އަދި ޑައިރެކްޓަރ މޯހިތު ސޫރީއެވެ.