އިރާދަކުރެއްވިއްޔާ ކުރިއަށް އޮތް 24 މަސް ދުވަސް ތެރޭގައި ރާއްޖޭގެ ހުރިހާ ރަށަކަށް ސްޕީޑް ފެރީގެ ޚިދުމަތް ލިބޭނެ: އާޒިމް
4 ޑިސެމްބަރު 2022 | އާދީއްތަ 09:49ފެރީގެ ޚިދުމަތް ޤާއިމުކުރަން ޖެހެނީ ކުރަން ޖެހޭ ދިރާސާތައް ކޮށް ޓެސްޓު ދަތުރުތަކުގެ މަރުހަލާގައި ފާހަގަކުރެވޭ ކަންކަން ވެސް ރަނގަޅުކޮށްގެން ކަމަށް އާޒިމް ވިދާޅުވި
އެމްޓީސީސީގެ ސީއީއޯ އާދަމް އާޒިމް
އިރާދަކުރެއްވިއްޔާ ކުރިއަށް އޮތް 24 މަސް ދުވަސް ތެރޭގައި ރާއްޖޭގެ ހުރިހާ ރަށަކަށް ސްޕީޑް ފެރީގެ ޚިދުމަތް ލިބޭނެ ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ)ގެ ސީއީއޯ އާދަމް އާޒިމް ވިދާޅުވެއްޖެއެވެ.
އާޒިމް އެފަދައިން ވިދާޅުވީ ރާއްޖެ ޓީވީގެ ފަލަ ސުރުހީ ޕްރޮގްރާމްގައި ވާހަކަދައްކަވަމުންނެވެ. އާޒިމް ވަނީ ފެރީގެ ޚިދުމަތް ރަނގަޅުކޮށް މުޅި ރާއްޖެ އެއް ވިއުގައަކުން ގުޅާލުމަކީ ރައީސް އިބްރާޙިމް މުހައްމަދު ޞާލިހުގެ ވަރަށް މުހިންމު ވައުދުފުޅެއް ކަމަށް ވިދާޅުވެފައެވެ. އަދި އެ މަސައްކަތް ކުރަން ބޭނުން ވަނީ ހަރުދަނާ އުސޫލުތަކަކާ އެކުގައި ކަމަށް ވެސް އޭނާ ވިދާޅުވިއެވެ. އެހެންކަމުން ފެރީގެ ޚިދުމަތް ޤާއިމުކުރަން ޖެހެނީ ކުރަން ޖެހޭ ދިރާސާތައް ކޮށް ޓެސްޓު ދަތުރުތަކުގެ މަރުހަލާގައި ފާހަގަކުރެވޭ ކަންކަން ވެސް ރަނގަޅުކޮށްގެން ކަމަށް އާޒިމް ވިދާޅުވިއެވެ.
މީގެ އިތުރުން މީގެ ކުރިން އެއް ރަށުން އަނެއް ރަށަށް ދިއުމަށް 4،000 ރުފިިޔާ ހޭދަކުރިނަމަވެސް މިއަދު މިފަދަ ދަތުރުތަކަށް ރައްޔިތުންގެ ޖީބުން ދާނީ 100އެއްހާ ރުފިޔާ ކަމަށާއި އެއީ ރައްޔިތުންނަށް ލިބޭ ވަރަށް ބޮޑު ލުޔެއް ކަމަށް އާޒިމް ވިދާޅުވިއެވެ. އާރްޓީއެލް ފެރީގެ ޚިދުމަތާއެކު ރާއްޖޭގެ ދަތުރުފަތުގެ ނިޒާމަށް އިންގިލާބީ ބޮޑު ބަދަލެއް އަންނާނެކަން އާޒިމް ފާހަގަކުރެެއްވިއެވެ. އާޒިމް ވިދާޅުވީ އާރްޓީއެލް ފެރީ ނިޒާމުގެ ތެރެެއިން އެއް ރަށް އަނެއް ރަށާ ގުޅުވާލާއިރު، މާ ބޮޑު ޚަރަދަކާއި ނުލާ ކުޑަ ޚަރަދެއް ކޮށްގެން އެއް ރަށުން އަނެއް ރަށަށް ދަތުރުކުރެވޭނެ މަގު މިހާރު މިވަނީ ފަހިވެފައި ކަމަށެވެ.
