ފުނަދޫއާއި ކުޑަހުވަދޫ ކޯޓަށް އައްޔަނުކުރި ފަނޑިޔާރުން މަޤާމުގެ ހުވާ ކުރައްވައިފި
ކުޑަހުވަދޫ މެޖިސްޓްރޭޓް ކޯޓަށް އައްޔަންކުރައްވާފައިވަނީ މ. ވޭވަށް، ކޯނަރ، އަލްއުސްތާޛު ޔާސިރު މުޙައްމަދު
ފުނަދޫއާއި ކުޑަހުވަދޫ ކޯޓަށް މެޖިސްޓްރޭޓުން އައްޔަނުކުރުން
ދެ މެޖިސްޓްރޭޓް ކޯޓަކަށް އައްޔަނު ކުރެއްވި ފަނޑިޔާރުންނަށް މަޤާމުގެ ފަތްކޮޅު ޙަވާލު ކުރައްވައި، އެ ބޭފުޅުން މަޤާމުގެ ހުވާ ކުރައްވައިފިއެވެ.
ފަނޑިޔާރުން އައްޔަނު ކުރައްވާފައިވަނީ ދ. ކުޑަހުވަދޫ މެޖިސްޓްރޭޓް ކޯޓަށާއި، ށ. ފުނަދޫ މެޖިސްޓްރޭޓް ކޯޓަށެވެ. އެގޮތުން އެބޭފުޅުން ހުވާ ކުރެއްވުމާއި، މަޤާމުގެ ފަތްކޮޅާ ޙަވާލުވެވަޑައިގެންނެވުމުގެ ރަސްމިއްޔާތު ބާއްވާފައިވަނީ އާދިއްތަ ދުވަހުއެވެ.
މި ރަސްމިއްޔާތު އޮތީ ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ) ގައެވެ.
ދ.ކުޑަހުވަދޫ މެޖިސްޓްރޭޓް ކޯޓަށް އައްޔަންކުރައްވާފައިވަނީ މ. ވޭވަށް، ކޯނަރ، އަލްއުސްތާޛު ޔާސިރު މުޙައްމަދެވެ.
އަލްއުސްތާޛު ޔާސިރު މުޙައްމަދު ވަނީ ވިލާ ކޮލެޖުން ބެޗްލަރ އޮފް ޝަރިޢާ އެންޑް ލޯ ޙާސިލް ކުރައްވާފައެވެ. ތިން އަހަރު ޝަރުޢީ ދާއިރާގައި ހޭދަކުރައްވާފައިވާ، އަލްއުސްތާޛް ޔާސިރު މުޙައްމަދު މިހާތަަނަށް ހުންނެވީ ކުޑަހުވަދޫ މެޖިސްޓްރޭޓް ކޯޓުގެ ލީގަލް އޮފިސަރުގެ މަގާމުގައެވެ.
ފުނަދޫ މެޖިސްޓްރޭޓް ކޯޓަށް އައްޔަނު ކުރައްވާފައިވަނީ ރ.މަޑުއްވަރީ، ރުވާގުގެ، އަލްއުސްތާޛު އިބްރާހިމް ނަޢީމްއެވެ. އަލްއުސްތާޛު އިބްރާހިމް ނަޢީމް ވަނީ ދިވެހިރާއްޖޭގެ އިސްލާމިކް ޔުނިވަރސިޓީން ބެޗްލަރ އޮފް ޝަރިޢާ އެންޑް ލޯ އަދި ވިލާ ކޮލެޖުން މާސްޓަރ އޮފް ޝަރިޢާ އެންޑް ލޯ ޙާސިލް ކުރައްވާފައެވެ.
ފަސް އަހަރު ޝަރުޢީ ދާއިރާގައި ހޭދަކުރައްވާފައިވާ އަލްއުސްތާޛް އިބްރާހީމް ނަޢީމް މިހާތަނަށް ހުންނެވީ ކ.ތުލުސްދޫ މެޖިސްޓްރޭޓް ކޯޓުގެ ލީގަލް އޮފިސަރުގެ މަގާމުގައެވެ.
