އެމްއެންޕީގެ ރިޔާސީ ޕްރައިމަރީގައި ވާދަކުރުމުގެ ފުރުސަތު ހުޅުވާލައިފި

މޯލްޑިވްސް ނެޝަނަލް ޕާޓީ(އެމްއެންޕީ)ގެ ރިޔާސީ ޕްރައިމަރީގައި ވާދަކުރުމުގެ ފުރުސަތު ހުޅުވާލައިފިއެވެ.

އެކަމާއި ގުޅިގެން އެޕާޓީން ބުނީ އެމްއެންޕީގެ އަސާސީ ޤަވައިދުގެ 36 ވަނަ މާއްދާގެ (ރ) ގައި ބަޔާންކޮށްފައިވާ ގޮތުގެ މަތީން މި ޕާޓީ ގެ ރިޔާސީ އިންތިހާބުގެ ޕްރައިމަރީގައި ވާދަކުރުމުގެ ފުރުޞަތު އާއްމުކޮށް ހުޅުވާލާކަމަށެވެ. ރިޔާސީ ޕްރައިމަރީ އަށް ވާދަކުރުމަށް ބޭނުންވާ ފަރާތްތަކަށް ޑިސެމްބަރ މަހުގެ 14 ވަނަ ދުވަހުގެ 2 ޖެހުމާ ހަމައަށް އެފުރުސަތު ވަނީ ހުޅުވާލާފައެވެ.

ޕްރައިމަރީއަށް ކުރިމަތިލާން ބޭނުންވާ ފަރާތްތަކުން އެމްއެންޕީގެ ރިޔާސީ އިންތިހާބުގެ ޕްރައިމަރީއަށް ކުރިމަތިލުމަށް އެދޭ ފޯމާއި، ފޯމުގައި ބަޔާންކޮށްފައިވާ ލިޔެކިޔުންތައް ޑިސެމްބަރ 14 ވާ ބުދަ ދުވަހުގެ މެންދުރު 2:00ގެ ކުރިން ޕާޓީގެ އޮފީހަށް ހުށަހެޅުމަށް ނުވަތަ އީމެއިލް ކުރުމަށް އެޕާޓީން ވަނީ އެދިފައެވެ.

އެމްއެންޕީގެ ޤައުމީ ހިންގާ ކައުންސިލްގެ ފުރަތަމަ ބައްދަލުވުމުން ނިންމާފައިވަނީ 14 ޖެނުއަރީގައި ޕާޓީގެ ރިޔާސީ ޕްރައިމަރީ ބޭއްވުމަށެވެ.

އެ ކަމަށް އަދި މިހާތަނަށް ޝައުގުވެރިކަން ފާޅުކުރައްވާފައިވަނީ ޕާޓީގެ ރައީސް އަދި ރައްޔިތުންގެ މަޖިލީހުގެ ދަނގެތި ދާއިރާގެ މެންބަރު މުހައްމަދު ނާޒިމެވެ.