އާންމުން އެދޭގޮތަށް ބައެއް ބަސް ރޫޓުތަކަށް ބަދަލުތަކެއް ގެންނަނީ
2 ޑިސެމްބަރު 2022 | ހުކުރު 03:58ސޯސަން މަގު ރޫޓުގައި ބަސް ދުއްވާ ގަޑިތަކަށް ބަދަލުތަކެއް ގެންނާނެކަމަށް އާޒިމް ވިދާޅުވި
އެމްޓީސީސީގެ ސީއީއޯ އާދަމް އާޒިމް
އާންމުން އެދޭގޮތަށް މިނީ ބަސް ދުއްވާ ބައެއް ރޫޓުތަކަށް ކުރިޔަށް އޮތްތަނުގައި ބަދަލުތަކެއް ގެންނަވާނެކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) ގެ ސީއީއޯ އާދަމް އާޒިމް ވިދާޅުވެއްޖެއެވެ.
ސެޕްޓެމްބަރު މަހުގެ 5 ވަނަ ދުވަހުން ފެށިގެން މާލޭގައި މިނީ ބަހުގެ ޚިދުމަތް ދެމުން އަންނައިރު މި ޚިދުމަތް ދެމުން އަންނަނީ 3 ރޫޓަކުންނެވެ. އެއީ ސޯސަންމަގު ރޫޓާއި އޯކިޑު މަގު ރޫޓާއި އަމީނީ މަގު ރޫޓެވެ.
މިނީ ބަހުގެ ޚިދުމަތާއި ގުޅޭގޮތުން ރާއްޖެޓީވީގެ "ފަލަސުރުޚީ" ޕްރޮގްރާމްގައި ވާހަކަދައްކަވަމުން އާޒިމް ވިދާޅުވީ ބަހުގެ ޚިދުމަތް ފެށިއިރެކޭ އެއްގޮތަށް މިހާރުވެސް މިނީ ބަހަށް އޮތް ތަރުހީބު އެގޮތުގައި އެބައޮތްކަމަށެވެ. އެގޮތުން މިހާރުވެސް ދުވާލަކު 4500 އާއި 5000 އާ ދެމެދުގެ މީހުން މިނީ ބަހުގެ ޚިދުމަތް ހޯދާކަމަށް އާޒިމް ވިދާޅުވިއެވެ. އާޒިމް ވިދާޅުވީ ތިން ރޫޓުން ބަހުގެ ޚިދުމަތް ދެމުންދާއިރު ޚިދުމަތް ހޯދާ މިންވަރު ހުރިގޮތާއި މީހުންގެ ޚިޔާލު ހުރިގޮތަށް ބަލައި ރޫޓުތަކަށް ބަދަލުތަކެއް ގެނައުމުގެ މަސައްކަތްކުރައްވަމުން ގެންދަވާކަމަށެވެ.
އެގޮތުން މިހާރު ބަސް ދުއްވަމުންދާ ރޫޓުތަކަށް ބަލާއިރު ސޯސަން މަގު ރޫޓަކީ ހުރިހާ ވަގުތެއްގައިވެސް މީހުން މަދުން ބަހުގެ ޚިދުމަތް ހޯދާ ރޫޓެއްގެ ގޮތުގައި ފާހަގަކުރެވިފައިވާކަމަށް އާޒިމް ވިދާޅުވިއެވެ. އެ ރޫޓު އާންމުގޮތެއްގައި ބޭނުންކުރަނީ ސްކޫލް ކުދިންކަމަށް އާޒިމް ވިދާޅުވިއެވެ. އެހެންކަމުން ޚިދުމަތް ހޯދަމުންދާ ގޮތަށް ބަލާ ދުއްވާ ގަޑިތަކަށް ބަދަލުތަކެއް ގެންނަވާނެ ކަމަށް އާޒިމް ވިދާޅުވިއެވެ.
އާޒިމް ވިދާޅުވީ އަމީނީ ރޫޓާއި އޯކިޑް ރޫޓު ގިނަ ވަގުތުތަކުގައި ގިނަ ބަޔަކު ބޭނުންކުރާކަމަށެވެ. އެ ދެ ރޫޓަށް އާންމުންގެ ފަރާތުން ލިބޭ ޚިޔާލުތަކަށް ބަލާ ބަދަލުތަކެއް ކުރިޔަށް އޮތްތަނުގައި ގެންނަވާނެކަމަށް އާޒިމް ވިދާޅުވިއެވެ.
އެގޮތުން އޯކިޑް ރޫޓުން އައިޖީއެމްއެޗަށް ދެވޭނެ ގޮތެއް ހަމަޖެއްސުމަށް ގިނަ ބަޔަކު އެދެމުން އަންނަކަމަށް އާޒިމް ވިދާޅުވިއެވެ. މިހާރު އޮންނަ ގޮތުން އައިޖީއެމްއެޗަށް ދެވެން އޮންނަނީ އަމީނީ ރޫޓުން ކަމަށްވާއިރު މަޖީދީ މަގުގެ މެދުގައި ހުންނަ މީހަކަށް އައިޖީއެމްއެޗަށް އަމީނީ ރޫޓުން ދެވޭނީ ވަރަށް ދުރަށްގޮސްގެންކަމަށް އާޒިމް ވިދާޅުވިއެވެ.
އެހެންކަމުން ކުރިޔަށް އޮތްތަނުގައި ދެ ރޫޓަކުން އައިޖީއެމްއެޗަށް ދެވޭނެ ގޮތް ހަމަޖެހިގެންދާނެކަމަށް އާޒިމް ވިދާޅުވިއެވެ.
އާޒިމް ވިދާޅުވީ ރޫޓުތަކަށް މިބަދަލު ގެނައުމަށް ޓްރާންސްޕޯޓް މިނިސްޓްރީ އާއި ފުލުހުންނާއި ސިޓީ ކައުންސިލާ އެކު ވާހަކަދައްކަމުންދާކަމަށެވެ. އަދި މާލަސްތަކެއް ނުވެ ރޫޓްތައް ފަށައިގަނެވޭނެކަމަށް އާޒިމް ވިދާޅުވިއެވެ.
އެގޮތުން އައިޖީއެމްއެޗް ހުންނަ މަގުގެ ޕާކިންގ ކަންތައް ހަމަޖެހުނުހާ އަވަހަކަށް އެކަން ހަމަޖެހިގެންދާނެކަމަށް އާޒިމް ވިދާޅުވިއެވެ.
މިނީ ބަހުގައި ދަތުރުކުރުމަށްޓަކައި ހަތް ރުފިޔާގެ ޓިކެޓެއް ނަގަން ޖެހެއެވެ. އާރްޓީއެލްގެ ވެބްސައިޓާއި އެޕްލިކޭޝަން މެދުވެރިކޮށް ބަހުގެ ކިއުއާރް ޓިކެޓް ލިބޭނެ އިންތިޒާމު ހަމަޖައްސާފައިވާއިރު ސީދާ ހަތް ރުފިޔާ ދީގެން ބަހުގައި ދަތުރުކުރެވޭނެ އިންތިޒާމު ވެސް ހަމަޖެހިފައިވެއެވެ.
އާޒިމް ވިދާޅުވީ ބަސް ޓިކެޓަށް ފަސޭހައިން ފައިސާ ދެއްކޭނެ އިންތިޒާމުތައް ހަމަޖައްސަމުންދާކަމަށެވެ. އެގޮތުން މިހާރުވެސް ދެ ގޮތަކަށް ޓިކެޓް ނެގޭއިރު ކޮންޓެކްޓް ލެސް ކާޑުގެ ޒަރީއާއިން ޓިކެޓަށް ފައިސާ ދެއްކޭނެ އިންތިޒާމުތައްވެސް ހަމަޖައްސަމުންދާކަމަށް އާޒިމް ވިދާޅުވިއެވެ. އެގޮތުން ކޮންމެ ބޭންކެއްގެވެސް ވިސާ ކާޑު ނުވަތަ މާސްޓަރ ކާޑު ބޭނުންކުރެވޭނެ އިންތިޒާމު ހަމަޖައްސާނެ ކަމަށް އާޒިމް ވިދާޅުވިއެވެ.
