ވޯލްޑް ޓްރެވަލް އެންޑް ޓޫރިޒަމް ކައުންސިލުގެ ގްލޯބަލް ސަމިޓުގައި ރާއްޖޭން ބައިވެރިވެއްޖެ
މި ސަމިޓު ކުރިއަށްދިޔައީ ނޮވެމްބަރު 28-30 އަށް ސައުދި އަރަބިއްޔާގެ ވެރިރަށް ރިއާދުގައި
ވޯލްޑް ޓްރެވަލް އެންޑް ޓޫރިޒަމް ކައުންސިލްގެ ގްލޯބަލް ސަމިޓު
ސައުދީ އަރަބިއްޔާގަައި ކުރިއަށްދިޔަ ވޯލްޑް ޓްރެވަލް އެންޑް ޓޫރިޒަމް ކައުންސިލް (ޑަބްލިއުޓީޓީސީ) ގެ ގްލޯބަލް ސަމިޓްގައި ޓޫރިޒަމް މިނިސްޓްރީން ބައިވެރިވެއްޖެއެވެ.
މި ސަމިޓު ކުރިއަށްދިޔައީ ނޮވެމްބަރު 28-30 އަށް ސައުދި އަރަބިއްޔާގެ ވެރިރަށް ރިއާދުގައެވެ. މި ސަމިޓުގެ ރާއްޖެ ތަމްސީލު ކުރެއްވީ ޓޫރިޒަމް މިނިސްޓަރު ޑރ. އަބްދުﷲ މައުސޫމެވެ.
މި ސަމިޓްގެ ފުރަތަމަ ދުވަހު ބާއްވާފައިވާ "ގްލޯބަލް ލީޑާސް ޑައިލޮގް" ގައި ދުނިޔޭގެ އެކި ޤައުމުތަކުގެ ފަތުރުވެރިކަމުގެ ދާއިރާގެ ޕްރައިވެޓް އަދި ޕަބްލިކް ސެކްޓަރުގެ އިސްވެރިން ބައިވެރިވެވަޑައިގެންނެވިއެވެ. އެގޮތުން ޓްރެވަލް އެޑިޓަރ ފޯ ސީބިއެސް ނިއުސް ޕީޓަރ ގްރީންބަރގް މޮޑަރޭޓްކޮށް ކުރިއަށް ގެންދިޔަ މި ޑައިލޮގް ފެއްޓެވުމުގެ ގޮތުން ސައުދީ އަރަބިއްޔާގެ ޓޫރިޒަމް މިނިސްޓަރު އަހްމަދު އަލް ޚަތީބް އާއި ޑަބްލިއުޓީޓީސީ ކައުންސިލްގެ ސީއީއޯ އަދި ޕްރެޒިޑެންޓް ޖޫލިއަރ ސިންޕްސަންގެ އިތުރުން ޔޫއެންޑަބްލިއުޓީއޯގެ ސެކްރެޓަރީ ޖެނެރަލް ޒުރާބް ޕޮލޮލިކަޝްވިލީ ވާހަކަފުޅު ދައްކަވާފައިވެއެވެ. މި ޑައިލޮގްގައި މިނިސްޓަރު މައުސޫމް ދިވެހިރާއްޖޭގެ ފަތުރުވެރިކަމާ ގުޅޭ މައުލޫމާތު ހިއްސާކުރެއްވިއެވެ.
"ގްލޯބަލް ސަމިޓު 2022" ކުރިއަށް ގެންގޮސްފައިވަނީ މަޝްވަރާ ބައްދަލުވުންތަކާއި ތަގުރީތަކާއި ޕެނަލް މަޝްވަރާތައް ހިމެނޭ ގޮތަށެވެ. މި ޕެނަލް މަޝްވަރާތައް ކުރިއަށް ގެންގޮސްފައިވަނީ މައިގަނޑު ހަތަރު ބަޔަކަށް ބާހާލައިގެންނެވެ. އެއީ ތިމާވެށީގެ ގޮންޖެހުންތަކުގެ ހައްލެއްގެ ގޮތުގައި ފަތުރުވެރިކަމާއި، ސާދާ ދިރިއުޅުމަކަށް ފަތުރުވެރިކަމާއި، ފަތުރުވެރިކަން ފަހި ކުރުމަށް ޓެކްނޮލޮޖީ އާއި އީޖާދުތައް އަދި ގުޅިގެން މުސްތަގުބަލު ބިނާކުރުމުގެ ފަތުރުވެރިކަމެވެ.
މި ސަމިޓްގެ ތެރޭގައި ސަމިޓްގެ ތީމާ ގުޅޭ ތަފާތު ތަގުރީރުތައް ދުނިޔޭގެ ސިޔާސީ ލީޑަރުންނާއި ދުނިޔޭގެ ކުންފުނިތަކުގެ އިސްވެރިން ދެއްވާފައިވެއެވެ. މި ބޭފުޅުންގެ ތެރޭގައި ޔޫއެންގެ ކުރީގެ ސެކްރެޓަރީ ޖެނެރަލް ބަންކީ މޫން އާއި ހިލްޓަން ވޯލްޑް ވައިޑްގެ ޕްރެޒިޑެންޓް އަދި ސީއީއޯ ކްރިސްޓޮފަރ ޖޭ ނަސެއްޓަރ އާއި އީޔޫގެ ޕާލިމެންޓް މެންބަރު އެލީނާ ކޮންޓޯރާ އާއި ޑުބާއީ އެއަރޕޯޓް އިންޓަރނޭޝަނަލްގެ ސީއީއޯ ޕޯލް ގްރިފިތްސް ހިމެނިވަޑައިގަންނަވައެވެ.
މި ސަމިޓްގެ ހަވާސާގައި މިނިސްޓަރު މައުސޫމް އެހެން ޤައުމުތަކުގެ ޓޫރިޒަމް މިނިސްޓަރުންނާއި ދުނިޔޭގެ ފަތުރުވެރިކަމާއި ގުޅުންހުރި ޖަމިއްޔާތަކާއި ކުންފުނީގެ އިސްފަރާތްތަކާއި ބައްދަލްކުރެއްވިއެވެ. އޭގެ ތެރޭގައި، ސައުދީ އަރަބިއްޔާގެ ޓޫރިޒަމް މިނިސްޓަރު އަހްމަދު އަލް ޚަތީބް އާއި ބަހްރެއިންގެ ޓޫރިޒަމް މިނިސްޓަރު ފާތިމާ ޖޭ އަލް ސައިރާފީ އާއި މެރިއަޓް އިންޓަރނޭޝަނަލްގެ ޕްރެޒިޑެންޓް އާއި ހޮޓެލް ބެޑްސްގެ ސީއީއޯ އާއި ފޯވަރޑް ކީސްގެ ސީއީއޯ އަދި ހޮޓެލް ޕްލޭނާރްޒްގެ ސީއީއޯ ހިމެނިވަޑައިގަންނަވެއެވެ.
ޑަބްލިއުޓީޓީސީ ކައުންސިލުގެ ގްލޯބަލް ސަމިޓުގައި މިނިސްޓަރު މައުސޫމާއެކު ސައުދީ އަރަބިއްޔާއަށް ދިވެހިރާއްޖެއިން ކަނޑައަޅުއްވާފައި ހުންނަވާ ސަފީރު މުޙައްމަދު ޚަލީލް އާއި މިނިސްޓްރީ އޮފް ޓޫރިޒަމްގެ ޕަރމަނަންޓް ސެކްރެޓަރީ ފާތިމަތު ނިލްފާ އާއި ސީނިއަރ އެގްޒެކެޓިވް ޑިރެކްޓަރު ތައްޔިބު ޝަހީމު އަދި ލީގަލް އޮފިސަރު އާމިނަތު ޝިއުނާ ބަޝީރު ބައިވެރިވެވަޑައިގެންނެވިއެވެ.
