އަޅުގަނޑުގެ މައްޗަށް ރައީސް ނަޝީދު އަބުރުގެ ދައުވާ ކުރައްވާކަމަށް ބުނާ ވާހަކަ ގަބޫލުކުރަން ދަތި: މަވޯޓާ ޝަރީފް
ނޫސްތަކުން ފެނުނީމަ ސިއްސައިގެން ދިޔައީ، އެކަން ހަމަ ގަބޫލުކުރަން ދަތި
މަރަދޫ ދާއިރާގެ މެންބަރު އިބްރާހީމް ޝަރީފް
ރައްޔިތުންގެ މަޖިލީހުގެ މަރަދޫ ދާއިރާގެ މެންބަރު އިބްރާހީމް ޝަރީފަށް، ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަބުރުގެ ދައުވާ ކުރައްވާކަމަށް ބުނާ ވާހަކަތައް ގަބޫލުކުރަން ދަތިކަމަށް އޭނާ ވިދާޅުވެއްޖެއެވެ.
ޝަރީފު ކުރެއްވި ޓުވީޓެއްގައި ކޮށްފައިވާ ތުހުމަތުތަކަކާ ގުޅިގެން އަބުރުފުޅަށް ލިބިވަޑައިގެންނެވި ގެއްލުމުގެ ބަދަލުގެ ގޮތުގައި 10 މިލިއަން ރުފިޔާ ހޯއްދެވުމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ސިވިލް ކޯޓަށް މައްސަލަ ހުށަހަޅުއްވާފައިވެއެވެ.
މިކަމާގުޅިގެން ރާއްޖެއެމްވީއަށް ޝަރީފް ވިދާޅުވީ ރައީސް ނަޝީދަކީ ޑިމޮކްރަސީގެ ހަމަތަކާއި އުސޫލުތަކާ އެއްގޮތަށް މަސައްކަތްކުރައްވާ ބޭފުޅެއް ކަމަށް ވިދާޅުވާ ބޭފުޅެއްކަމަށެވެ. އަދި އަބުރުގެ ދައުވާ ކުރުމަކީ ޑިމޮކްރަސީގެ ހަމަތަކާ ޚިލާފު ކަމެއް ކަމަށް ވިދާޅުވެ ރައީސް ނަޝީދު ޕަބްލިކް ފޯރަމްތަކުގައި ވަކާލާތުވެސް ކުރައްވާއިރު، މިފަދަ ދައުވާއެއް ކުރެއްވުން ގަބޫލުފުޅު ކުރައްވަން އުނދަގޫ ކަމަށެވެ. ޝަރީފު ވިދާޅުވީ މިފަދަ އަބުރުގެ ދައުވާތައް ކުރައްވާނީ މުގާބޭ، ސައްދާމް ހުސައިންފަދަ ބޭފުޅުން ކަމަށެވެ.
ޝަރީފު މިމަހުގެ 25 ވަނަ ދުވަހުގެ ކުރެއްވި ޓްވީޓެއްގައި ވިދާޅުވެފައިވަނީ ކުރީގެ ރައީސް، މައުމޫނުގެ ވެރިކަން ވައްޓާލަން 50 މީހަކު މަރާލައި އެ މީހުން މެރިކަމުގެ ތުހުމަތު ރައީސް މައުމޫނުގެ އިސްތަށިފުޅުގައި އަޅުވަން ނަޝީދު އޭރު ރާއްވަވާފައި ވާކަމުގައެވެ. އޭގެ އިތުރުން ޝަރީފް ވިދާޅުވެފައިވަނީ އޭރުގެ ޕާލިމެންޓްރީ ގްރޫޕުން އެކަން ހުއްޓުވުމަށް ގަރާރެއްވެސް ފާސްކުރި ކަމަށެވެ.
ޝަރީފްގެ ޓުވީޓުގައި އޭނާ ވިދާޅުވެފައިވަނީ، 50 މީހުން މަރާލުމަށް ނަޝީދު މަސައްކަތް ކުރައްވާފައިވަނީ ނޫސްވެރިންގެ ގޮތުގައި ކުލީ ސިފައިންތަކެއް ރާއްޖެގެނެސް، އެމްޑީޕީގެ މުޒާހަރާއެއްގެ ތެރެއިން ކަމަށެވެ.
މައްސަލަ ސިވިލް ކޯޓަށް ހުށަހެޅުއްވުމަށްފަހު ނަޝީދުގެ ވަކީލުންގެ ފަރާތުން ނެރުއްވި ބަޔާނުގައި ވިދާޅުވެފައިވަނީ، އެމަނިކުފާނަށް ނިސްބަތްކުރައްވައި ޝަރީފް ކުރެއްވި ޓުވީޓްގައި ލިޔެފައިވާ ދޮގުތަކުގެ ސަބަބުން، ޝަރީފުގެ ފަރާތުން ނަޝީދުގެ އަބުރާ ބެހުމުގެ އަމަލެއް ހިންގަވާފައިވާކަމަށް ކަނޑައަޅުއްވައިދެއްވައި، ނަޝީދުގެ އަބުރުފުޅަށް ލިބުނު މައުނަވީ ގެއްލުމުގެ ބަދަލެއްގެ ގޮތުގައި 10 މިލިއަން ރުފިޔާ ނަގައިދިނުމަށް ސިވިލް ކޯޓަށް މައްސަލަ ހުށަހަޅުއްވާފައިވާކަމުގައެވެ.
