އިކުއެޑޯ ކަޓުވާލައި ސެނެގާލް ދެވަނަ ބުރަށް

ފީފާ ވޯލްޑް ކަޕްއިން އިކުއެޑޯ ކަޓުވާލުމަށްފަހު ސެގާލް ދެވަނަ ބުރުގެ ޖާގަ ކަށަވަރުކޮށްފިއެވެ.

ސެނެގާލް ދެވަނަ ބުރުގެ ޖާގަ ޔަގީންކުރީ އިކުއެޑޯއާއި ބައްދަލުކުރި މެޗު ކާމިޔާބު ކޮށްގެންނެވެ. މި މެޗުން އެޓީމު މޮޅުވީ 2-1ންނެވެ. މެޗުގައި ފުރަތަމަ ލަނޑު ޖަހާ ލީޑު ނެގީވެސް ސެނެގާލް ޓީމުންނެވެ. ފުރަތަމަ ހާފުގެ 44 ވަނަ މިނެޓުގައި ލިބުނު ޕެނަލްޓީއަކުން ސެނެގާލްއަށް ލީޑު ނަގައިދިނީ އިސްމާއިލާ ސާރއެވެ.

ނަމަވެސް އިކުއެޑޯއިން ވަނީ ދެވަނަ ހާފުގައި ލަނޑެއް ޖަހާ ނަތީޖާ ހަމަހަމަ ކޮށްފައެވެ. އިކުއެޑޯއަށް ނަތީޖާ ހަމަހަމަ ކޮށްދިނީ މޮއިސެސް ކައިސޭޑޯއެވެ. ސެނެގާލްއިން މުބާރާތުގެ ދެވަނަ ބުރުގެ ޖާގަ ކަށަވަރުކުރީ އިކުއެޑޯއިން ލަނޑުޖެހިތާ ދެމިނެޓު ފަހުން ލަނޑެއް ޖަހާ މެޗު ކާމިޔާބު ކޮށްގެންނެވެ. މެޗުން މޮޅުވި ލަނޑު އެޓީމަށް ޖަހައިދިނީ ކަލީޑޯ ކުލިބަލީއެވެ.

މި ގްރޫޕުގެ އެއްވަނާގައި ދެވަނަ ބުރަށް ދަތުރުކުރީ ނެދަލެންޑްސްއެވެ. އެޓީމު ވަނީ ގަތަރާއި ވާދަކޮށް 2-0ން މޮޅުވެފައެވެ. ނެދަލެންޑްސްގެ ލަނޑުތައް ޖަހައިދިނީ ކޯޑީ ގަކްޕޯ އާއި ފްރެންކީ ޑިޔޯންގއެވެ. މެޗުގެ 68 ވަނަ މިނެޓުގައި ނެދަލެންޑްސްގެ ސްޓީވެން ލަނޑެއް ޖެހި ނަމަވެސް ވީއޭއާރު ބެލުމަށްފަހު ރެފްރީ ނިންމީ އެލަނޑު ބަލައިނުގަތުމަށެވެ.

ގްރޫޕް އޭގެ އެއްވަނައިގައި އޮތް ނެދަލެންޑްސްއަށް ގްރޫޕް ސްޓޭޖް ނިމުނުއިރު ލިބެނީ ހަތް ޕޮއިންޓެވެ. ދެވަނައިގައި ސެނެގާލް ދެވަނަ ބުރަށް ދަތުރުކުރީ ހަ ޕޮއިންޓު ހޯދައިގެންނެވެ. ތިން ވަނައިގައި އޮތް އިކުއެޑޯއަށް ހަތަރު ޕޮއިންޓު ލިބޭއިރު ފުލުގައި ގަތަރު އޮތީ ޕޮއިންޓެއް ނުލިބިއެވެ.