މާލެ އާއި ރަށްރަށުގައި ކަރަންޓަށް ނަގާ އަގު ހަމަހަމަކުރަން ހަ މަސްދުވަހުގެ މުއްދަތެއް ދިނުމަށް ރައްޔިތުންގެ މަޖިލީހުން ފާސްކޮށްފިއެވެ.

ފެނަކަ ކޯޕަރޭޝަނުން ރަށްރަށަށް ދޭ ކަރަންޓުގެ ހިދުމަތުގެ އަގާއި ސްޓެލްކޯ އިން މާލެއަށް ދޭ ކަރަންޓުގެ ހިދުމަތުގެ އަގު އެއްވަރުކުރަން ރައްޔިތުންގެ މަޖިލީހަށް ގަރާރެއް ހުށަހެޅުއްވީ ތޮއްޑޫ ދާއިރާގެ މެންބަރު ހަސަން ޝިޔާންއެވެ.

އެ ގާރާރު ދިރާސާކޮށްފައިވަނީ ސްޓޭޓް އޯންޑް އެންޓަރޕްރައިސަސް ކޮމިޓީންނެވެ. ކޮމިޓީން ވަނީ މިކަން ދިރާސާކުރުމަށް ކަރަންޓުގެ ޚިދުމަތް ދެމުން އަންނަ ސްޓެލްކޯ އާއި ފެނަކައިގެ އިތުރުން އެންވަޔަރަންމަންޓް މިނިސްޓްރީ އާއި ޔޫޓިލިޓީ އޮތޯރިޓީގެ ބޭފުޅުންނާ ބައްދަލުކުރައްވާފައެވެ. އެއާއެކު ކޮމިޓީން ނިންމާފައިވަނީ ސްޓެލްކޯ އާއި ފެނަކައިން ކަރަންޓްގެ ހިދުމަތް ދެމުން އަންނަ ރަށްރަށާއި މާލެ ސަރަހައްދުގައި ވިޔަފާރިތަކަށް ބިލުކުރަމުން އަންނަ ރޭޓާއި ބޭންޑްކުރުންތަކުގައި ގެންގުޅޭ ތަފާތުކުރުންތައް ނައްތާލައި ބޭންޑާއި ރޭޓް ހަމަހަމަ ކުރުމަށެވެ.

މިގަރާރު ފާސްކޮށްފައިވަނީ ވޯޓުގައި ބައިވެރިވެވަޑައިގެންނެވި 56 މެންބަރުންގެ ވޯޓުންނެވެ.

ތޮއްޑޫ ދާއިރާގެ މެންބަރު ހަސަން ޝިޔާން ހުށަހަޅުއްވާފައިވާ މިގަރާރަކީ ކަރަންޓުގެ ޚިދުމަތް ދެމުންގެންދާ ދެކުންފުނި ކަމުގައިވާ ސްޓެލްކޯ އާއި ފެނަކައިން ކަރަންޓުގެ ޚިދުމަތް ފޯރުކޮށްދެމުންގެންދާ ރަށްރަށާއި ގްރޭޓަރ މާލެ ސަރަހައްދުގައި ވިޔަފާރިތަކަށް ބިލު ކުރަމުންގެންދާ ރޭޓާއި ބެންޑުކުރުންތަކުގައި ގެންގުޅޭ ތަފާތުކުރުންތައް ނައްތާލާ ބޭންޑާއި ރޭޓް ހަމަހަމަ ކުރުމަށާއި އެކަމުގެ ސަބަބުން ކުދި ވިޔަފާރިވެރިންނަށް ދިމާވާ ދަތިތައް ހައްލުކޮށްދިނުމަށް ގޮވާލާ އެކަން ސަރުކާރުގެ ސަމާލުކަމަށް ގެނައުމަށް ހުށަހަޅުއްވާފައިވާ ގަރާރެކެވެ. މިވަގުތު ސްޓެލްކޯއިން ކަނޑައަޅާފައިވާ އަގުތަކަށް ބަލާއިރު ރަށްރަށުގައި 300 ޔުނިޓުން މައްޗަށް 6 ރުފިޔާ ޗާރޖުކުރާއިރު މާލޭގެ ވިޔަފާރިތަންތަނުން 6 ރުފިޔާ ޗާޖުކުރަނީ 1000 ޔުނިޓުން މައްޗަށެވެ.

އެ ގަރާރުގައި ބުނެފައިވާ ގޮތުގައި، 200 ޔުނިޓާއި 300 ޔުނިޓާ ދެމެދުގެ ވަރަކަށް ކަރަންޓު ބޭނުންކުރާ ނަމަ، މާލެއިން 3.65ރ. ނަގާއިރު، ފެނަކައިން ކަރަންޓް ދޭ ރަށްރަށުގައި 6ރ. ނަގާ ކަމަށެވެ. ފެނަކައިން 100 ޔުނިޓާ 200 ޔުނިޓާ ދެމެދުގެ ބޭންޑަށް 3.75ރ. ނަގާއިރު، މާލޭގައި ނަގަނީ 3.35ރ އެވެ.

ކޮމިޓީ ބައްދަލުވުމުގައި ވާހަކަދައްކަވަމުން ސްޓެލްކޯގެ މެނޭޖިންގ ޑިރެކްޓަރު (އެމްޑީ) އަހުމަދު ޝަރީފް ވިދާޅުވީ މާލެ އާއި އަތޮޅުތަކުގައި ޚިދުމަތްދޭ އަގު އެއްވަރުކޮށްފިނަމަ އެކުންފުންޏަށް 35 މިލިއަން ރުފިޔާ ގެއްލުންވާނެކަމަށެވެ. ވިޔަފާރި ތަންތަނުގެ ރޭޓް އެއް ހަމަކޮށްފިނަމަ ފެނަކައަށް 41.2 މިލިއަން ރުފިޔާގެ ގެއްލުންވާނެކަމަށް ފެނަކައިގެ އެސިސްޓެންޓް ޑިރެކްޓަރ އަހުމަދު އަލީ ކޮމިޓީގައި ވާހަކަދައްކަވަމުން ވިދާޅުވިއެވެ.

އެހެންކަމުން އަގު އެއްހަމަ ކުރުމަށް ކުރަން ޖެހޭނެ ކަންތައްތައް ފުރިހަމަކުރުމަށް ހަ މަސްދުވަހުގެ މުއްދަތެއް ދިނުމަށް ކަނޑައަޅައި ކޮމިޓީން ތިން ހުށަހެޅުމެއް ހުށަހަޅާފައިވެއެވެ. އެއީ؛

• ސީދާ ޓެރިފަށް ކުރާ އަސަރު ދެނެގަނެ ކަރަންޓުގެ ހިދުމަތް ހަމަހަމަ ގޮތެއްގައި ވިޔަފާރިތަކަށް ފޯރުކޮށްދިނުމަށް ފުރިހަމަ ޓެރިފް ރިވިއުއެއް ހެދުން. އަދި މާލެ އާއި ރަށްރަށުގައި ހިންގާ ވިޔަފާރިތަކުގެ ޓެރިފް ރޭޓުތައް އެކި ގިންތިތަކަށް އެއްހަމަކުރުމުގެ މަސައްކަތް 2023 ވަނަ އަހަރުގެ ޖޫން މަހުގެ ނިޔަލަށް ނިންމުމަށް.

• ކަރަންޓު ދިނުމަށް ބޭނުންކުރާ ވަސީލަތްތައް އިތުރުކޮށްގެން ޓެރިފް ރޭޓުތައް ކުޑަކުރުމަށް ކުރެވެން ހުރި މަސައްކަތްކުރުން. އެގޮތުން ޑީސަލް ޚަރަދު ކުޑަކޮށްގެންނާއި އިއާދަކުރަނިވި ހަކަތައިގެ ވަސީލަތްތައް ބޭނުންކޮށްގެން ކަރަންޓް އުފައްދާ މިންބަރު އިތުރުކޮށް ޓެރިފް ރޭޓްތައް ކުޑަކުރުމަށް މަސައްކަތްކުރުން

• ފެނާއި ނަރުދަމާގެ ހިދުމަތްތަކަށް ބިލުކުރުމުގައި އެއްހަމަކުރުމުގެ މަސައްކަތް އަންނަ އަހަރު ޖޫންގެ ނިޔަލަށް ނިންމުން.

ކޮމިޓީ މަރުހަލާގައި ކަމާބެހޭ ހުރިހާ ބޭފުޅުންވެސް ވަނީ އިޔާދަކުރަނިވި ހަކަތައަށް ގޮސްގެން ކަރަންޓުގެ އަގު ކުޑަކުރެވޭނެކަން ފާހަގަކުރައްވާފައެވެ.

ކަރަންޓު އުފައްދަން ކުރަންޖެހޭ ހަރަދުގެ ބޮޑު ބަޔެއް ދަނީ ތެލަށެވެ. އެހެންކަމުން ބޭނުންކުރާ ތެލުގެ މިންވަރު މަދުވާނަމަ ރައްޔިތުން އަތުން ނަގަންޖެހޭ އަގު ކުޑަކުރެވިގެންދާނެއެވެ.

ސްޓެލްކޯގެ އެމްޑީ ޝަރީފް ވިދާޅުވީ ސްޓެލްކޯއަށް ލިބޭ އާމްދަނީ 65 އިންސައްތަ އެކުންފުނިން ހޭދަކުރަމުން އަންނަނީ ތެލަށްކަމަށެވެ. އެހެންކަމުން އިޔާދަކުރަނިވި ހަކަތައިގެ މަޝްރޫޢެއް ރާވަމުންދާ ކަމަށާއި އެގޮތުން 100 މެގަވޮޓްގެ ސޯލާ އެނާޖީ މަޝްރޫޢެއް ރާވަމުންދާކަމަށް ޝަރީފް ވިދާޅުވިއެވެ. އެމަޝްރޫޢުގެ ދަށުން ޔުނިޓަކަށް ޖެހޭވަރު 2.5 ރުފިޔާއަށްވުރެ ކުޑަކުރެވިގެންދާނެކަމަށް ޝަރީފް ވިދާޅުވިއެވެ.

ފެނަކައިން ވެސް ފާހަގަކުރި ކަމަކީ އިޔާދަކުރަނިވި ހަކަތައާ ދިމާލަށް ދިޔުމެވެ. ފެނަކައިގެ ފަރާތުން ވާހަކަދައްކަވަމުން އަހުމަދު އަލީ ވިދާޅުވީ 155 ރަށުގައި ހޯމް ސޯލަރ އެނަރޖީ ޕްރޮގްރާމް ކުރިޔަށްގެންދާކަމަށެވެ. ސޯލަރ އެނާޖީއަށް އިންވެސްޓްކުރާ ފަރާތްތަކަށް 75-92 އިންސައްތަ ކަރަންޓް ބިލުން ކުޑަކުރެވިގެންދާނެކަމަށް އަހުމަދު އަލީ ވިދާޅުވިއެވެ.