އިކުއެޑޯ އިން "ހޯމްވޯކް" ނިންމައިފި، ސެނެގާލް މެޗުން ނަތީޖާ ނެރޭނެ

ފީފާ ވޯލްޑް ކަޕް ގްރޫޕް ސްޓޭޖުގެ ފަހު މެޗުގައި ސެނެގާލާ ދެކޮޅަށް ނުކުންނައިރު، އިކުއެޑޯ ޓީމުން އޮތީ "ހޯމްވޯކް" ނިންމައި މެޗަށް ފުރިހަަމަ އަށް ތައްޔާރުވެގެން ކަމަށް އެ ޓީމުގެ ކޯޗު ގުސްޓާވޯ އަލްފާރޯ ބުނެފިއެވެ.

އަލްފާރޯ މިހެން ބުނީ ސެނެގާލް މެޗުގެ ކުރިން އޮތް ޕްރެސް ކޮންފަރެންސްގައި ވާހަކަ ދައްކަމުންނެވެ. އޭނާ ބުނީ މެޗަށް ތައްޔާރުވުމަށް ޓީމުން ކުރި މަސައްކަތާ މެދު އޭނާ ހިތްހަމަ ޖެހޭ ކަމަށެވެ. އަލްފާރޯ ބުނީ ސެނެގާލް ޓީމަކީ ވަރަށް ރަނގަޅު، ވަރުގަދަ ޓީމެއް ކަމަށެވެ. އަދި އެ ޓީމާ ދެކޮޅަށް އިކުއެޑޯ ވެސް ފެންނާނީ ވަރަށް ވަރުގަދަކޮށް ކަމަށެވެ. އޭނާ ބުނީ އުއްމީދަކީ އިކުއެޑޯ އަށް މެޗު ކާމިޔާބު ކުރެވުން ކަމަށާއި، އިކުއެޑޯ ޓީމަށް އެކަން ހައްގު ކަމަށެވެ.

މީގެ އިތުރުން އޭނާ ވަނީ އެ ޓީމުގެ ކެޕްޓަން އަދި އެންމެ މުހިންމު ކުޅުންތެރިޔާ އެނާ ވެލެންސިއާގެ ވާހަކަ ވެސް ދައްކާފައެވެ. އަލްފާރޯ ބުނީ އޭނާ ވެލެންސިއާގެ ކަކުލުގައި ތަދެއް ހުރި ކަމަށާއި، ނަމަވެސް ޤައުމީ ޓީމަށްޓަކައި ކޮންމެ މެޗެއްގައި ކުޅެން ވެލެންސިއާ ބޭނުންވާ ކަމަށެވެ. އަލްފާރޯ ބުނީ ޓީމު ގޮވައިގެން ކުރިއަށްދާނެ ހިތްވަރާއި ފެންވަރު ވެސް އޭނާގެ ގައިގަ ހުރި ކަމަށެވެ. ވެލެންސިއާގެ މޮޅުކަން ފާހަގަ ކުރަމުން އަލްފާރޯ ބުނީ އޭނާގެ ޓީމުން އަބަދުވެސް ވެލެންސިއާ އަށް ޖާގަ ލިބޭނެ ކަމަށެވެ. އެހެންކަމުން ކުރިއަށް އޮތް މެޗުގައި ވެސް އޭނާ އަށް ކުޅެވޭތޯ ވަރަށް މަސައްކަތް ކުރާނެ ކަމަށް އަލްފާރޯ ބުންޏެވެ.

އަލްފާރޯ ބުނީ މެޗުގެ ފުރަތަމަ 11 ގައި ވެލެންސިއާ ހިމަނާނެ ހާލަތެއް ނައިސްފިނަމަ، މެޗުގެ ވަކި ހިސާބަކުން ވެސް އޭނާ އަރުވަން މަސައްކަތް ކުރާނެ ކަމަށެވެ. ނަމަވެސް އުއްމީދަކީ މެޗުގެ ފުރަތަމަ ކަށިގަނޑާއެކު ވެސް އެނާ ވެލެންސިއާ ފެނުން ކަމަށެވެ.

ގްރޫޕް އޭ ގައި އިކުއެޑޯ ސެނެގާލް ބައްދަލު ކުރާ މެޗު ފަށާނީ އަންގާރަ ދުވަހުގެ ރޭ ރާއްޖެ ގަޑިން 20:00 ގައެވެ.