"ވިލުން" ޕްރޮގްރާމުގެ ދަށުން ހއ. އަތޮޅު ހޮސްޕިޓަލަށް ޓީވީ ހަދިޔާ ކުރުމަށް އާސަންދައިން އެމްއޯޔޫއެއްގައި ސޮއިކޮށްފިއެވެ.
"ވިލުން" ޕްރޮގްރާމަކީ އާސަންދަ ސްކީމްގެ ދަށުން ޚިދުމަތް ހޯދަން ހޮސްޕިޓަލުތަކާއި ކްލިނިކްތަކަށް ދާ ރައްޔިތުންނަށް ހާއްސަކޮށްގެން އާސަންދަ ކުންފުނިން ފެށި ހޭލުންތެރިކުރުމުގެ ޕްރޮގްރާމެކެވެ.
މި ޕްރޮގްރާމުގެ ދަށުން ޓީވީ ހަދިޔާ ކުރުމަށް އެމްއޯޔޫގައި އާސަންދަ ކުންފުނީގެ ފަރާތުން ސޮއިކުރެއްވީ ކުންފުނީގެ ޑެޕިއުޓީ މެނޭޖިން ޑިރެކްޓަރު، އިބްރާހީމް ރަޝީދެވެ. އަދި ހއ. އަތޮޅު ހޮސްޕިޓަލުގެ ފަރާތުން ސޮއިކުރެއްވީ ހޮސްޕިޓަލުގެ މެނޭޖަރު، ހެލްތު ސަރވިސަސް އާދަމް ނަސީރެވެ.
'ވިލުން' ޕްރޮގްރާމްގެ ދަށުން ރީޖަނަލް އަދި އަތޮޅު ހޮސްޕިޓަލުތަކަށް ޓީވީ ހަދިޔާކުރުމުގެ ފުރަތަމަ ބުރުގައި ވަނީ ކުޅުދުއްފުށި ރީޖަނަލް ހޮސްޕިޓަލާއި އުނގޫފާރު ރީޖަނަލް ހޮސްޕިޓަލާއި، ގަމު ރީޖަނަލް ހޮސްޕިޓަލާއި، ޑރ. އަބްދުލް ސަމަދު މެމޯރިއަލް ހޮސްޕިޓަލް އަދި ފުވައްމުލައް ހޮސްޕިޓަލަށް ޓީވީ ހަދިޔާކޮށްފައެވެ. މި ޓީވީތަކަކީ ކޮންމެ ހޮސްޕިޓަލެއްގެވެސް އޯޕީޑީ ވެއިޓިން އޭރިއާގައި އާސަންދަ ސްކީމާއި އަދި އާއްމު ޞިއްހަތާ ގުޅޭގޮތުން މީހުން ހޭލުންތެރިކުރުވުމުގެ ގޮތުން ތައްޔާރުކޮށްފައިވާ ވީޑިއޯ ކޮންޓެންޓު އެޅުވުމަށް ހަދިޔާކޮށްފައިވާ ޓީވީއެވެ.
މީގެ އިތުރުން ހޮސްޕިޓަލުގެ މަސައްކަތްތަކާއި ޚިދުމަތްތަކާ ގުޅޭގޮތުން ޙިއްސާކުރަން ހޮސްޕިޓަލުތަކުން ބޭނުންވާ މައުލޫމާތު ރައްޔިތުންނަށް ފޯރުކޮށްދިނުމަށްވެސް މި ޓީވީތައް ބޭނުންކުރެއެވެ.
