މި ދުވަސްވަރަކީ ވޯލްޑްކަޕްގެ ފޯރި ދުނިޔޭގެ އެކި ހިސާބުތަކުގައި ގަދަވެފައިވާ ދުވަސްވަރެކެވެ. އެގޮތުން މި ކުޅިވަރު އީދުގައި އެމީހަކު އެންމެ ބޭނުންވާ ޓީމަކަށް ސަޕޯޓް ކުރުމަށްޓަކައި އެޓީމެއްގެ ސަޕޯޓަރުން އެކި އެކި ކަންތައްތައް ކުރެއެވެ. އެއީ ސަޕޯޓު ކުރާ ޓީމެއްގެ ޖާޒީ ގަތުން ކަމުގައި ވިޔަސް އަދި އެޓީމެއްގެ ދިދައެއް ގަތުން ކަމުގައި ވިޔަސްމެއެވެ. ނުވަތަ ސަޕޯޓު ކުރާ ޓީމެއްގެ ދިދަ އެމީހެއްގެ މޫނުގައި ކުރެހުން ކަމަށް ވިޔަސް މެއެވެ.
ޤަތަރުގައި މިހާރު ކުރިއަށްދާ ވޯލްޑްކަޕްގައި މިފަދަ ތަފާތު މަންޒަރުތައް ފެނިގެން އެބަދެއެވެ. އެގޮތުން އެމީހެއްގެ ޓީމަށް ސަޕޯޓް ކުރުމަށްޓަކައި އެތައް ގޮތަކުން މީހުން ޤުރުބާންވާ މަންޒަރެވެ. ސަޕޯޓަރުންގެ މޫނުމަތިން އެކި ކަހަލަ ކުލަވަރުތައް ފެނިގެންދެއެވެ. އެމީހުންގެ އިހުސާސްތައް އެކި ގޮތްގޮތުން ފާޅުކުރަމުންނެވެ. އެގޮތުން ސަޕޯޓަރުންގެ މި އިހުސާސްތަކާއި ޖޯޝާއި ފޯރި، ރޮއިޓާސްގެ ފޮޓޯގްރާފަރުން ވަނީ އެމީހުންގެ ކެމެރާތަކުގައި "ކެޗްޕަރ" ކޮށްފައެވެ.
މި ފޮޓޯތަކަށް ބަލާލުމުން ސަޕޯޓަރުންގެ އިހުސާސްތަކާއި އެމީހެއްގެ ޓީމަށް ސަޕޯޓު ކުރުމަށްޓަކައި ހެދިލާފައި ހުރި ވަރު ފެނިގެން އެބަދެއެވެ. އެގޮތުން މޮރޮކޯ އާއި ކޮރޭޝިއާ ކުޅުނު މެޗްގައި ފިރިހެން ސަޕޯޓަރަކު ވަނީ އޭނާގެ މުޅި މޫނު ކޮރޭޝިއާގެ ދިދައިން ފޭސް ޕެއިންޓްކޮށްފައެވެ. އަދި އަޅައިގެން ވެސް ހުރީ ކޮރޭޝިއާ ދިދައިގެ އަވި އައިނެކެވެ.
އެމެރިކާ އިން ވޭލްސްއާ ދެކޮޅަށް ކުޅުނު މެޗްގައި ފިރިހެން ސަޕޯޓަރަކު ވަނީ އޭނާގެ ދޫނި ސަޕޯޓް ކުރާ ޓީމާ އެއްގޮތަށް ނަލަ ހައްދާފައެވެ. އެގޮތުން އެމެރިކާ ޓީމުގެ ދިދަ ރަމްޒުކޮށްދޭ ބޯ ޓައީ އަކާއި ކުޑަ ތޮއްޕެއް ވަނީ އަޅުވާފައެވެ.
މީގެ އިތުރުން އާޖެންޓީނާއިން ސައުދީ އާއި ދެކޮޅަށް ކުޅުނު މެޗުގައި ފިރިހެން ސަޕޯޓަރަކު ވަނީ އާޖެންޓީނާއަށް ސަޕޯޓްކުރާކަން އެންގުމަށްޓަކައި ތާޖެއް ހަދައިގެން ބޮލުގައި އަޅާފައެވެ.
ޖަޕާނުން ޖަރުމަނާ ދެކޮޅަށް ކުޅުނު މެޗްގައި ވެސް ޖަޕާނުގެ ސަޕޯޓަރުން ވަނީ ސްޓޭޑިއަމް ބޭރުގައި ތަފާތު ކޮސްޓުއުމެއް ލައިގެން ހަރަކާތްތެރިވެފައެވެ.
އެމީހަކު ހިތް އެދޭ ޓީމަކަށް ޖޯޝާއި ފޯރީގައި ސަޕޯޓްކުރަމުން ދިޔައިރު އިދިކޮޅު ޓީމުން ގޯލް ޖެހުމުން ވެސް ބައެއް ސަޕޯޓަރުންގެ މޫނުމަތިން މޮޅިވެރިކަން ފެނިގެން ދިޔައެވެ. އެގޮތުން ނެދަލޭންޑްސް އާއި ސެނެގާލް ކުޅުނު މެޗުގައި ނެދަލޭންޑްސް އިން ގޯލް ޖެހުމުން ސަޕޯޓަރަކު ވަނީ އޭނަގެ ބޮލުގައި ދެއަތް އަޅާފައެވެ. "ދެން މި ހިސާބުން ހުރިހާކަމެއް ނިމުނީ" އޭ ބުނާހެން އެ ފޮޓޯގަނޑުން ހީވާކަހަލައެވެ.
މިއީ މިފަހަރުގެ ވޯލްޑްކަޕުން ފެންނަމުންދާ ސަޕޯޓަރުންގެ ތަފާތު މޫނުތަކެވެ. މިފަހަރުގެ ވޯލްޑްކަޕްގައި ތަފާތު އެކި މަންޒަރުތައް ފެންނަމުންދާއިރު ވޯލްޑްކަޕްގެ ފޯރި ރާއްޖޭގައި ވެސް ވަނީ ގަދަވެފައެވެ. ރާއްޖެ ނުކުޅުނު ނަމަވެސް ރާއްޖޭގެ ސަޕޯޓަރުންވެސް ސަޕޯޓްކުރާޓީމްގެ ޖަރޒީލައިގެން އަދި ކުޑަކުދިން ލައްވައިގެން އުޅޭތީ ވަރަށް އާންމުކޮން އެބަ ފެނެއެވެ.
