މަސްތުވާތަކެތި ޓްރެފިކް ކުރުމާއި ގުޅޭ މައްސަލައެއްގައި އުމުރަށް ޖަލަށްލާން ދަށު ކޯޓުން ކުރި ޙުކުމަކަށް ހައިކޯޓުންވެސް ތާއީދުކޮށްފިއެވެ.

މި މައްސަލައިގައި ހ އުދަރެސްގޭ ސައީދު އަލީ ޝާހިދުގެ މައްޗަށް އުފުލާފައިވަނީ ކެނެބިސް ޓްރެފިކް ކުރުމުގެ ކުށުގެ ދައުވާއެވެ. އެގޮތުން ކްރިމިނަލް ކޯޓުން ވަނީ އޭނާގެ މައްޗަށް ކުރާ ދައުވާ ސާބިތުވާކަމަށް ޙުކުމް ކޮށްފައެވެ.

ކްރިމިނަލް ކޯޓުގެ އޭރުގެ ގާޒީ އަލީ ރަޝީދު ހުސައިން ކުރެއްވި ޙުކުމުގައި ވަނީ ސައީދު އަލީ އުމުރަށް ޖަލަށްލައި އަދި 100،000 ރުފިޔާއިން ޖޫރިމަނާ ކުރުމަށް ޙުކުމް ކުރައްވާފައެވެ. 

މިއީ 24 ޑިސެމްބަރު 2017 ވަނަ ދުވަހު ފުލުހުން މާލެތެރެ ޕްޓްރޯލްކުރަމުން ދަނިކޮށް ޢާންމު ފަރާތަކުން ސަޢީދު ޢަލީ ޝާހިދު މަސްތުވާތަކެތި ގެންގުޅެ އެތަކެތީގެ ވިޔަފާރުކުރާކަމަށް ދިން މަޢުލޫމާތަކާ ގުޅިގެން ހިންގި ތަހުގީގެކެވެ. އެގޮތުން ފުލުހުންގެ ބެލުމުގެ ދަށަށް ސަޢީދު ޢަލީ ޝާހިދު ގެނެސް، އޭނާ އިށީނދެގެން އިން ސައިކަލުގެ މަޑިދަށް ބަލައި ފާސްކުރިއިރު، އެސައިކަލުގެ މަޑިދަށުގައި އޮތް ގަމީހެއްގެ ދަށުން ފެނުނު ފިލްމު ހުސްކުރި ދަޅުގައި މަސްތުވާތަކެތި ހުރިކަމަށް ޙުކުމުގައި ބަޔާންކޮށްފައިވެއެވެ.

އޭގެ އިތުރުން، ސައިކަލުގެ މަޑިދަށުން ދަޢުވާލިބޭ ފަރާތުގެ މައްޗަށް އުފުލާފައިވާ ދަޢުވާއަކާ ގުޅޭ ލިޔުންތަކެއްވެސް ފެނިފައިވާކަން ހެކިންގެ ހެކިބަހުންނާއި ސީން އޮފް ކްރައިމް އޮފިސަރސް ރިޕޯޓާއި، ތަޙްލީލު ރިޕޯޓުތަކުން ސާބިތުވާކަމަށް ދަށު ކޯޓުގެ ޙުކުމުގައި ބަޔާންކޮށްފައިވެއެވެ.

13 ނުކުތާއެއް ބަޔާންކޮށް އޭނާގެ ފަރާތުން މި މައްސަލަ ހައިކޯޓުގައި އިސްތިއުނާފު ކުރީ 21 ޖެނުއަރީ 2018 ގައެވެ. މި މައްސަލަ އޭނާގެ ފަރާތުން ދިވެހިރާއްޖޭގެ ހައިކޯޓުގައި އިސްތިއުނާފު ކުރުމުން ހައިކޯޓުންވެސް ވަނީ އޭނާގެ މައްޗަށް ދަށު ކޯޓުން ކޮށްފައިވާ ޙުކުމަށް ތާއީދު ކޮށްފައެވެ.  

މިހާދިސާ ހިނގިއިރު ސައިކަލުގެ ވެރިފަރާތް ހުރީ ރާއްޖެއިން ބޭރުގައިކަން ތަޙްޤީޤަށް ފެންނަގޮތުގެ ބަޔާނުގައި ވެއެވެ. ވުމާއެކު، އެ ސައިކަލަކީ ސަޢީދު ޢަލީ ޝާހިދުގެ ކޮންޓްރޯލުގެ ދަށުގައި ހުރި ސައިކަލެއްކަމާއި، އެތަކެތި ސައިކަލުގެ މަޑިދަށުގައި ހުރިކަން ސަޢީދު ޢަލީ ޝާހިދަށް އެނގޭނެކަމުގައި ބެލެވޭކަމަށް ހައިކޯޓުގެ ޙުކުމުގައި ވަނީ ބަޔާންކޮށްފައެވެ.

އެހެންކަމުން މި މައްސަލައިގައި ފެނުނު މަސްތުވާތަކެއްޗަކީ ސަޢީދު ޢަލީ ޝާހިދުގެ މައުނަވީ ހިޔާޒަތުން ފެނުނު ތަކެތި ކަމަށް ދަށު ކޯޓުން ކަނޑައަޅާފައިވަނީ ރަނގަޅަށް ކަމުގައި ހައިކޯޓުން ވަނީ ޙުކުމް ކޮށްފައެވެ. 

ހައިކޯޓުގައި މި މައްސަލަ ބެއްލެވީ ފަނޑިޔާރު ދީބާނާޒް ފަހުމީގެ އިތުރުން، ފަނޑިޔާރު މުޙައްމަދު ނިޔާޒް އަދި ފަނޑިޔާރު ހުސައިން މަޒީދެވެ.