ފީފާ ވޯލްޑް ކަޕް ގްރޫޕް ސްޓޭޖުގެ ދެ ވަނަ މެޗުގައި ކޮސްޓަރިކާއާ ދެކޮޅަށް ނުކުންނައިރު އެ މެޗު ފަސޭހެ ނުކުރާނެ ކަމަށް ޖަޕާންގެ ކޯޗު ހާޖިސީ މޮރިޔާސޫ ބުނެފިއެވެ.

މުބާރާތުގެ ފުރަތަމަ މެޗުގައި ވަރުގަދަ ޖަރުމަނު ބަލިކޮށްފައިވުމުން، ކޮސްޓަރިކާ ބަލިކޮށް ޖަޕާނަށް ދެ ވަނަ ބުރުގެ ޖާގައެއްގެ ފުރުސަތު ބޮޑުވާނެއެވެ. ކޮސްޓަރިކާ މެޗުގެ ކުރިން އޮތް ޕްރެސްގައި ވާހަކަ ދައްކަމުން މޮރިޔާސޫ ބުނީ އިދިކޮޅު ޓީމަކީ ވަރަށް ވަރުގަދަ ޓީމެއް ކަމަށެވެ. އޭނާ ބުނީ އެ ޓީމުގައި ތިބީ ވަރަށް ފިޒިކަލީ ވަރުގަދަ ކުޅުންތެރިންތަކެއް ކަމަށާއި، ވަރަށް ބޮޑަށް ރާވަލައިގެން އެ ޓީމު ކުޅޭނެ ކަމަށެވެ. އަދި މިހާތަނަށް ބެލި ބެލުންތަކުން ފެންނަ ގޮތުގައި ކޮސްޓަރިކާ އަކީ ވަރަށް ވަރުގަދަ ޓީމެއް ކަމަށެވެ.

މޮރިޔާސޫ ބުނީ ކޮސްޓަރިކާގެ ފުރަތަމަ މެޗުގައި އެމީހުން ބޮޑު ތަފާތަކުން ބަލިވެފައިވާ ކަމަށެވެ. އެއީ ޖަޕާނާ ދެކޮޅަށް ނުކުންނައިރު ކޮސްޓަރިކާ އިން ވަރަށް ބޮޑަށް ހިފާނެ ތަނެއް ކަމަށް މޮރިޔާސޫ ބުންޏެވެ. އޭނާ ބުނީ ގަބޫލުކުރެވޭ ގޮތުގައި ކޮސްޓަރިކާ އިން އެމީހުންނާ ދެކޮޅަށް ނިކުންްނާނީ މެންޓަލީ ވަރަށް ވަރުގަދަ ޓީމެއްގެ ގޮތުގައި ކަމަށެވެ.

މީގެ އިތުރުން އޭނާ ބުނީ ގިނަ ވަގުތު ބޯޅަ ހިފަހައްޓައިގެން ކުޅުމަކީ ވެސް ވަރަށް އުނދަގޫ ކަމަކަށްވާނެ ކަމަށެވެ. ޚާއްސަކޮށް ޖަޕާންގެ ފުރަތަމަ މެޗުގައި ކުޅުނު ކަހަލަ ވަރުގަދަ ޓީމަކާ ދެކޮޅަށް ކުޅޭއިރު އެއީ އުނދަގޫ ކަމެއް ކަމަށެވެ. ނަމަވެސް އަބަދުވެސް ބޭނުންވަނީ ބޯޅަ ހިފަހައްޓައިގެން ކޮންޓްރޯލް މެޗެއް ކުޅެންކަން ފާހަގަ ކުރަމުން މޮރިޔާސޫ ބުނީ، ކުރިއަށް އޮތް މެޗުގެ ޕޮޒިޝަން އިންސައްތަ ބުނަން އޭނާ އަށް ނޭންގޭ ކަމަށެވެ.

ޖަޕާނު ކޮސްޓަރިކާއާ ދެކޮޅަށް ނުކުންނާނީ އާދިއްތަ ދުވަހު ރާއްޖެ ގަޑިން 15:00 ގައެވެ.