އަންނަ އަހަރުގެ ފުރަތަމަ ކުއާޓަރގައި ޗާކޯލް، ގަސްކާނާ އަދި ކޮތަޅު ނެރުމަށް ވެމްކޯ އިން މަސައްކަތް ކުރަނީ
މާލޭގައި އުފެދޭ ކުނީގެ 200 ޓަނާއި ގާތަށް ގޭބީސީތަކުން ވެޓް ވޭސްޓް އުފައްދާ
ވެމްކޯ މުވައްޒަފުން ކުނި ނެގުމުގައި
(ވެމްކޯ) އަށް ޖަމާކުރާ ކުނި ބޭނުންކޮށްގެން އަންނަ އަހަރުގެ ފުރަތަމަ ކުއާޓަރގައި ޗާކޯލް، ގަސްކާނާ އަދި ކޮތަޅު ބާޒާރަށް ނެރުމަށް ވެމްކޯ އިން މަސައްކަތް ކުރަމުންދާ ކަމަށް އެ ކުންފުނީގެ މެނޭޖިންގ ޑިރެކްޓަރު (އެމްޑީ) ޔޫސުފް ސިރާޖު ވިދާޅުވެއްޖެއެވެ.
ރާއްޖެޓީވީގެ "ފަލަސުރުޚީ" ޕްރޮގްރާމްގައި ވާހަކަދައްކަވަމުން ސިރާޖު ވިދާޅުވީ މިހާރުގެ ޕްލޭނާއި އެއްގޮތަށް ކުރިއަށްދާ ކަމަށްވާނަމަ ޗާކޯލް ވެމްކޯ އިން އުފައްދައިގެން ނެރެވޭނެ ކަމަށް ބެލެވެނީ އަންނަ އަހަރުގެ ޖެނުއަރީ ނުވަތަ ފެބްރުއަރީ މަހުގައި ކަމަށެވެ.
ސިރާޖު ވިދާޅުވީ ޗާކޯލް ނެރުމަށް ހަމަޖެހިފައިވަނީ ރާއްޖޭގެ ބާޒާރަށް ކަމަށާއި މި ޕްރޮޑަކްޓަކީ ކަމުދާ ޕްރޮޑަކްޓަކަށް ވެއްޖެނަމަ ރިސޯޓުތަކަށް ވެސް މި ޕްރޮޑަކްޓް ވިއްކުމަށް ނިންމާފައިވާ ކަމަށެވެ.
މާލޭގައި އުފެދޭ ކުނީގެ 200 ޓަނާއި ގާތަށް ގޭބީސީތަކުން "ވެޓް ވޭސްޓް" ނުވަތަ ކުނިވާޒާތުގެ ކުނި އުފައްދާ ކަމަށާއި އެތަކެތި ބޭނުންކޮށްގެން ގަސް ކާނާ އުފެއްދުމަށް ވިސްނަމުންދާ ކަމަށް ވެސް ވިދާޅުވިއެވެ. އަދި ކުންފުނީގެ ބޯޑުން އެކަމުގެ ހުއްދަ ލިބުނުކަން ފާހަގަކުރައްވާ ސިރާޖު ވިދާޅުވީ މިއީ ކުރެވޭ އިންވެސްޓްމަންޓްގެ ތެރެއިން މުހިންމު ކަމަކަށް ވެގެންދާނެ ކަމަށާއި މިއީ އިތުރަށް އާމްދަނީ ލިބޭ ކަމަށް ވެސް ވެގެންދާނެ ކަމަށެވެ.
ކުންފުނިން މަސައްކަތް ކުރަމުންދާ އެކި ރަށްތަކުގައި މެނުއަލްކޮށް ގަސްކާނާ އުފައްދަމުންދާ ކަމަށާއި ނަމަވެސް ނަފާ ލިބޭގޮތަށް މި މަސައްކަތް ނުކުރާކަން ސިރާޖު ފާހަގަކުރެއްވިއެވެ.
ގޭބީސީތަކުން ކުނި ވަކި ކުރުމުގެ މަސައްކަތަށް އަލިއަޅުއްވާލައްވާ ވާހަކަފުޅު ދައްކަވަމުން ސިރާޖު ވިދާޅުވީ އެ މަސައްކަތަށް ބަލާއިރު މާބޮޑު ކުރިއެރުމެއް ނުލިބޭ ކަމަށެވެ. އެހެންނަމަވެސް ވެމްކޯގެ ކޮތަޅުތައް ނެރުމުން ރައްޔިތުންނަށް ކުނި ވަކިކުރުމަށް އިތުރު ހިތްވަރަކަށް ވެގެންދާނެ ކަމަށް ވިދާޅުވިއެވެ. ސަބަބަކީ ކުންފުނިން ކޮތަޅު ނެރޭއިރު ކުނި ވަކި ކުރާ ބާވަތްތަކަށް އެކި ކުލައިގެ ކޮތަޅުތައް ނެރޭތީކަމަށް ސިރާޖު ވިދާޅުވިއެވެ.
މިހާރު އެ މަސައްކަތް ގާތްގަނޑަކަށް ނިމިފައިވާއިރު ހިދުމަތް ހޯދާ ހުރިހާ ފަރާތްތަކަށް ލުއިފަސޭހަ ވެގެންދާނެ ކަމަށް ވެސް ވިދާޅުއެވެ.
ސިރާޖު އިތުރަށް ވިދާޅުވީ މިވަގުތު ވިސްނާފައި ހުރީ ވެމްކޯ އިން ބާޒާރަށް ނެރޭ ކޮތަޅުތައް ތިންވަނަ ފަރާތެއް މެދުވެރިކޮށް ލިބޭ ގޮތަށް ހެދުމަށް ކަމަށާއި އެގޮތުގެމަތިން ހިދުމަތް ހޯދަން އެއްބަސްވެވޭ ފަރާތްތައް މެދުވެރިކޮށް ކޮތަޅު އާންމުންނަށް ލިބިގެންދާނެ ކަމަށެވެ.
