މެލޭޝިޔާގެ އައު ބޮޑުވަޒީރަށް ރައީސް މަރުޙަބާ ވިދާޅުވެއްޖެ
25 ނޮވެމްބަރު 2022 | ހުކުރު 10:48މެލޭޝިޔާގެ ބޮޑުވަޒީރަށް ދުޅަހެޔޮކަމާއި ރަނގަޅު ޞިއްޙަތަކަށް އެދިވަޑައިގެންނެވި
މެލޭޝިޔާގެ އައު ބޮޑުވަޒީރު އަންވަރު އިބްރާހިމް
ދަތޯ ސެރީ އަންވަރު އިބްރާހީމް މެލޭޝިޔާގެ ބޮޑުވަޒީރުކަމަށް އައްޔަން ކުރެވުމާ ގުޅިގެން ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް އެމަނިކުފާނަށް މަރުޙަބާ ވިދާޅުވެއްޖެއެވެ.
ރައީސުލްޖުމްހޫރިއްޔާގެ މެސެޖުގައި، އަންވަރު އިބްރާހީމްގެ ލީޑަރޝިޕްގެ ދަށުން މެލޭޝިއާގެ ރައްޔިތުންނަށް އުފާފާގަތިކަމާއި ކާމިޔާބީއަށް އެދިވަޑައިގެންނެވިއެވެ. އަދި ރާއްޖެއާއި މެލޭޝިޔާއާ ދެޤައުމުގެ ދެމެދުގައި މިހާރު އޮތް ގުޅުން ކުރިއަށް އޮތް ތަނުގައި އިތުރަށް ބަދަހިވެގެންދާނެ ކަމަށް ޔަޤީންކުރައްވާ ކަމުގައި ވިދާޅުވިއެވެ.
މީގެ އިތުރުން ބައިނަލްއަޤްވާމީ މުހިންމު ކަންކަމުގައި މެލޭޝިޔާގެ އާ ބޮޑުވަޒީރާއި، މެލޭޝިޔާ ސަރުކާރާ ގުޅިގެން މަސައްކަތް ކުރެއްވުމަށް އުއްމީދުކުރައްވާކަމުގައި ރައީސުލްޖުމްހޫރިއްޔާ ވިދާޅުވިއެވެ. އަދި އެމަނިކުފާނު ވަނީ މެލޭޝިޔާގެ ބޮޑުވަޒީރަށް ދުޅަހެޔޮކަމާއި ރަނގަޅު ޞިއްޙަތަކަށް އެދިވަޑައިގަންނަވާފައެވެ. އަދި އެމަނިކުފާނުގެ މެސެޖުގައި މެލޭޝިޔާގެ ރައްޔިތުންނަށް ފާގަތިކަމާއި ކުރިއެރުމަށް ވެސް އެދިވަޑައިގެންނެވިއެވެ.
މިހާރު އުމުރުފުޅުން 75 އަހަރުފުރިފައިވާ އަންވަރު އިބްރާހީމްގެ ނަން، މެލޭޝިއާގެ ސިޔާސީ މައިދާނުގައި ގުގުމަންފެށީ، ދަސްވެނިވާން ތައްޔާރުވަމުން ދިޔަ ސިޔާސީ ލީޑަރެއްގެ ގޮތުގައެވެ. މެލޭޝިއާގެ އިސްލާމިކް ޔޫތު މޫވްމަންޓް ނުވަތަ 'އޭބިމް' އުފެއްދެވި ހިސާބުންނެވެ. ސިޔާސީ މަސްރަހުގެ ކަންކަން ގާތުން ބަލަން ތިބި އެތައް ބަޔަކަށް އަންވަރު ސިހުން ގެންނެވީ، މެލޭޝިއާގެ ވެރިކަން ކުރުމުގެ ތާރީޚުގައި ދިގު ރެކޯޑެއް އޮތް ޔުނައިޓަޑް މެލޭޒް ނޭޝަނަލް އޯގަނައިޒޭޝަން (އުމްނޯ)އާ 1982 ވަނަ އަހަރު ގުޅިވައިޑަތުމާ އެކުގައެވެ.
ބޮޑުވަޒީރު ކަމަށް ވަޑައިގެންނެވުމަށް އަންވަރު އިބްރާހިމް ކުރެއްވި ދިގު ދަތުރުގައި ބޮޑެތި ހުރަސްތައް ކުރިމަތިވެ ވަޑައިގެންނެވި އެވެ. މިގޮތުން ހުތުރު ބަދުނާމު އަޅުވާ ޖަލަށްވެސް ލެވިފައި ވެއެވެ.
