ބޭސްފަރުވާއާއި ގުޅިގެން ދަޢުލަތުން ރައްޔިތުންނަށް ދޭ އެހީގެ ހުރިހާ ޚިދުމަތެއް 'ވިރަ' ގެ ނަމުގައި އެއް ފުރާޅެއްގެ ދަށުން ފޯރުކޮށްދޭން ފަށައިފިއެވެ.

މިއީ ބޭސް ފަރުވާއާއި ގުޅިގެން ދަޢުލަތުގެ އެހީއަށް އެދޭ ރައްޔިތުންނަށް، "އޯގާތެރި ސަރުކާރު" ޝިއާރުގެ ދަށުން، ލުއިފަސޭހަ އަވަސް ޚިދުމަތްތަކެއް ދިނުމުގެ އަމާޒަށް ވާސިލުވުމަށްޓަކައި، ބޭސްފަރުވާގެ ކަންކަމާ ގުޅިގެން ދެ އިދާރާއަކުން ރައްޔިތުންނަށް ދެމުން އައި ޚިދުމަތްތައް، ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) އާއި ގުޅިގެން އާސަންދަ މެދުވެރިކޮށް 'ވިރަ' ގެ ނަމުގައި، އެއް ފުރާޅެއްގެ ދަށުން ފޯރުކޮށްދޭން ފެށި މަސައްކަތަކެވެ.

މިގޮތުން މާލޭގެ އިންދިރާ ގާންދީ މެމޯރިއަލް ހޮސްޕިޓަލުގައާއި ހުޅުމާލެ ހޮސްޕިޓަލުގައި މި ޚިދުމަތްތައް ލިބޭނެ ކައުންޓަރު، 'ވިރަ' ކައުންޓަރުގެ ނަމުގައި ވަނީ ޤާއިމުކުރެވިފައެވެ. މިއާއެކު އާސަންދަ ކުންފުނިން ފޯރުކޮށްދެމުންދާ އާސަންދަ އަދި މެރަނާ ސްކީމްގެ ޚިދުމަތްތަކާއި އެންސްޕާގެ ދަށުން ފޯރުކޮށްދެމުންދާ މެޑިކަލް ވެލްފެއަރ ޚިދުމަތްތައް އެއްތަނަކުން ލިބިގަތުމުގެ ފުރުޞަތު ރައްޔިތުންނަށް މިވަނީ ފަހިވެފައެވެ. މި ބަދަލާއެކު ކުރިން އާސަންދަ އަދި މެޑިކަލް ވެލްފެއަރއަށް އެދި ވަކިވަކިން ފޯމު ހުށަހެޅުމުގެ ބަދަލުގައި، އެހީ ބޭނުންވާ ފަރާތުން ހުށަހަޅަން ޖެހޭނީ އެންމެ ފޯމެކެވެ. އަދި އެހީތެރިކަމަށް އެދި ހުށަހަޅާ ފަރާތުގެ ޙާލަތު ބަދަލުނުވާހާ ހިނދަކު އިތުރު ފޯމެއް ހުށަހަޅާކަށް ނުޖެހޭނެއެވެ.

ކުރިން ދެ އިދާރާއަކުން ހޯދަންޖެހޭގޮތަށް އޮތް މި ޚިދުމަތްތައް އެއް ތަނަކުން ލިބުމަކީ ރައްޔިތުންނަށް ލިބިގެންދާނެ ވަރަށްބޮޑު ލުއި ފަސޭހައެކެވެ. އަދި އެތައްފަހަރަކު ލިޔެކިޔުންތައް ހުށަހެޅުމުގެ ބަދަލުގައި އެއްފަހަރު ލިޔެކިޔުން ހުށަހަޅާގޮތަށް ހަމަޖެހިގެން ދިއުމަކީވެސް ޚިދުމަތް ހޯދުމުގައި ތަކުލީފު ކުޑަވެ، ޚިދުމަތް ލިބުން އަވަސްވެގެންދާނެ ބަދަލެކެވެ. ރާއްޖޭގެ ހުރިހާ ކަންކޮޅުތަކެއްގައި ދިރިއުޅޭ ފަރާތްތަކަށް، އެ ފަރާތްތަކުގެ ބޭސްފަރުވާއާ ގުޅިގެން ދަޢުލަތުން ދެމުންގެންދާ އެހީ، ލާމަރުކަޒީ ނިޒާމުގެ ތެރެއިން ފޯރުކޮށް، ވީހާވެސް ހަމަހަމަގޮތެއްގައި ދިނުމަށްޓަކައި، ކުރިއަށްއޮތްތަނުގައި ރާއްޖޭގެ ހުރިހާ ޓަރޝަރީ ފެންވަރުގެ ހޮސްޕިޓަލެއްގައި 'ވިރަ' ކައުންޓަރުތައް ޤާއިމުކުރެވިގެންދާނެއެވެ.

'ވިރަ' ކައުންޓަރުތަކުގެ އިތުރުން 'ވިރަ' މަޢުލޫމާތު މަރުކަޒުގެ ނަމުގައި މުޅިން އާ ކަސްޓަމަރ އެކްސްޕީރިއެންސް ސެންޓަރެއްވެސް ވަނީ ހުޅުވިފައެވެ. މި މަރުކަޒު ހުޅުއްވައިދެއްވީ އިކޮނޮމިކް މިނިސްޓަރ ފައްޔާޒް އިސްމާޢީލާއި، ޖެންޑަރ މިނިސްޓަރ އައިޝަތު މުޙައްމަދު ދީދީއެވެ. އެންސްޕާގެ ސީއީއޯ މަރިޔަމް ޝަފީޤާއި އާސަންދަ ކުންފުނީގެ މެނޭޖިން ޑިރެކްޓަރު އިސްމާޢީލް އައްޒާމް ވަޖީހްއާއި އާސަންދަ ބޯޑުގެ ބައެއް މެމްބަރުންނާއި އާސަންދަ އެންސްޕާގެ އެގްޒެކެޓިވް އަދި ސީނިއަރ މެނޭޖްމަންޓް މެމްބަރުން މި ރަސްމިއްޔާތުގައި ބައިވެރިވެވަޑައިގެންނެވިއެވެ.

ބޭސްފަރުވާގެ ކަންކަމާ ގުޅިގެން ދަޢުލަތުން ރައްޔިތުންނަށް ފޯރުކޮށްދޭ ހުރިހާ ޚިދުމަތްތަކަކާއި އެ ޚިދުމަތްތައް ލިބިގަންނާނެ ގޮތުގެ ފުރިހަމަ މަޢުލޫމާތު މި މަރުކަޒުން ލިބިގެންދާނެއެވެ. އަދި އެ ޚިދުމަތްތައް ހޯދުމަށް އެހީތެރިކަން ބޭނުންވާ ފަރާތްތަކަށް މި މަރުކަޒުން އެހީތެރިކަންވެސް ފޯރުކޮށްދެވޭނެއެވެ. މިގޮތުން ބަލިމީހާއަށް ބޭނުންވާ ފަރުވާ ކުރިއަށް ގެންދިޔުމުގައި އެންމެ ފަސޭހަވާނެ ގޮތާއި، ފަރުވާކުރުމުގައި ދައުލަތުގެ ފަރާތުން ލިބެން ހުރި އެހީތައް މި ސެންޓަރުން އޮޅުންފިލުވައިދެވޭނެއެވެ. އަދި ބޭނުންވާ އެހީ ހޯދުމުގެ މަގު ތަނަވަސްކޮށްދީ ކުރިއަށްދާންވީ ގޮތުގެ އިރުޝާދާއި އެހީތެރިކަންވެސް ފޯރުކޮށްދެވޭނެއެވެ.

ރަސްމީ ދުވަސްތަކުގެ ހެނދުނު 08:00 އިން ރޭގަނޑު 10:00 އަށް އައިޖީއެމްއެޗާއި ހުޅުމާލެ ހޮސްޕިޓަލުގެ 'ވިރަ' ކައުންޓަރުން ޚިދުމަތް ލިބޭނެއެވެ. ފެންބިލްޑިންގެ ނިކަގަސްމަގަށްވާ ފަޅީގައި ގާއިމުކުރެވިފައިވާ، 'ވިރަ' މަރުކަޒުން 24 ގަޑިއިރު ޚިދުމަތް ލިބޭނެއެވެ.

'ވިރަ' ކައުންޓަރުތަކަށް ވަޑައިނުގެން [email protected] އަށް ފޯމާއި ލިޔެކިޔުން އީ-މެއިލް ކުރައްވައިގެންވެސް ބޭސްފަރުވާގެ އެހީތެރިކަމަށް އެދި ހުށަހެޅުއްވޭނެއެވެ. އަދި 1400 ނަންބަރަށް ގުޅުއްވައިގެން ކޮންމެ ވަގުތަކުވެސް މަޢުލޫމާތު ސާފުކުރެއްވޭނެއެވެ.