ތުރުކީއަށް ބާރުގަދަ ބިންހެލުމެއް އަތުވެއްޖެ

ތުރުކީގެ ހުޅަނގުފަރާތުގެ ޓައުން އެއްކަމަށްވާ ޑޫޖާއަށް 5.9ގެ ބާރުމިނުގައި ބިންހެލުމެއް އަތުވެއްޖެއެވެ. މިއީ އެންމެ ބޮޑު ސިޓީ އިސްތަންބުލްއާ 210 ކިލޯމީޓަރު އިރުން އޮންނަ ހިސާބެކެވެ. އެތައް އިރަކަށް ދެމިގެން ދިޔަ ގުޑުންތައް އިސްތަންބުލްއާއި ވެރިރަށް އަންކަރާއަށްވެސް އިހުސާސް ކުރެވުނު ކަމަށް ވެއެވެ. ބިންހެލުމުގައި މީހަކު މަރުވެފައި ނުވާއިރު، 50 މީހުންނަށް އެކި ކަހަލަ އަނިޔާތައް ލިބިފައިވާ ކަމަށް ޚަބަރު ލިބެއެވެ.

ބިންހެލުން އައުމާއެކު ކަރަންޓު ކެނޑިގެން ދިޔަ ކަމަށް ޚަބަރު ލިބެއެވެ. އަދި ފުރަތަމަ ބާރު ގަދަ ބިންހެލުން އައިތާ ވިއްސަކަށް މިނިޓް ފަހުން، 4.7ގެ ބާރު މިނުގައި ދެވަނަ ބިންހެލުމެއް އައިސްފައިވެއެވެ.

ތުރުކީގެ ޑިޒާސްޓަރ އޭޖެންސީން ބުނީ، ބިންހެލުމުގެ ސަބަބުން އިމާރާތްތަކަށް މާބޮޑަށް ގެއްލުން ވެފައި ނުވާކަމަށެވެ. ހަމަ އެކަނި ހަލާކުވީ ބަލިކޮން ހަދާފައިވާ ބައެއް ޖިފުޓި ކަމަށް ބުނެފައި ވެއެވެ. ނަމަވެސް 8 އިމާރާތަކަށް ކޮންމެވެސް ވަރަކަށް ގެއްލުންވި ކަމަށް ބުނެފައިވެއެވެ. އޭގެ ތެރޭގައި ޑޫޖާގެ ކޯޓް ހައުސް ހިމެނެއެވެ.

ތުރުކީގެ ހަމަ މި ސަރަހައްދަށް 1999 ވަނަ އަހަރު އައި ބިންހެލުމެއްގައި 845 މީހުން މަރުވެފައިވެއެވެ. ސިޓީގެ މޭޔަރު ވިދާޅުވިގޮތުގައި ޑޫޖާގެ 80 އިންސައްތަ އިމާރާތަކީ އެފަހަރުގެ ބިންހެލުމަށްފަހު އަލުން އިމާރާތް ކޮށްފައިވާ ތަންތަނެވެ.