ގެއްލުން ތި ދެވެނީ ހަމަ އަމިއްލަ މުދަލަށް!

މާލޭގައި ފައިމަގުގައި އުޅުމަށް ދަތިވާތީ ޕަބްލިކް ޓްރާންސްޕޯޓްގެ ޚިދުމަތް ފެށުމަށް ރައްޔިތުން އެދެމުން އަންނަތާ އެތައް ދުވަހެއް ފަހުން މިވަނީ މިނީ ބަހުގެ ޚިދުމަތް ފަށައިފައެވެ. އެ ޚިދުމަތާއެކު އެތައް ބަޔަކަށް އެތައް ގޮތަކުން ލުއިތަކެއް ވަނީ ވެފައެވެ. ކުރިން ޓެކްސީއެއްގައި ދާން ދަތި ފަރާތްތަކަށް ނުވަތަ ޓެކްސީ ނުލިބިގެން ހިނގާފައި ތަންތަނަށް ދާން ޖެހޭ ފަރާތްތަކަށް މިއަދު މިވަނީ އެކަމަށް ހައްލު ލިބިފައެވެ. މިފަދަ ރަނގަޅު ޚިދުމަތެއް ފެށި ނަމަވެސް މިއަދު ބައެއް މީހުންގެ ފަރާތުން ފެންނަނީ ދެރަވާން ޖެހޭ ފަދަ މަންޒަރެކެވެ.

ބަހާއި ފެރީ ފަދަ ތަކެތީގެ ސީޓުތަކުގެ ފަހަތް މިއަދު ބަލައިލަން ނުކެރޭ ހާލަތުގައި ވެސް ހުރެއެވެ. އެއީ އޭގައި ބައެއް ފަރާތްތަކުން ކުރަހާފައި ހުންނަ މަންޒަރުތަކާއި ލިޔެފައި ހުންނަ ލިޔުންތަކުގެ ސަބަބުންނެވެ. މި މައްސަލަ ބޮޑުވެ، މިއަދު އެ ޚިދުމަތް ދޭ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އަށް ވެސް މިވަނީ ކޮންމެ ދުވަހަކު ބަހުގެ ސީޓުތަކުގެ ފަހަތުގައި ލިޔެފައި ހުންނަ މިފަދަ ލިޔުންތައް ނައްތާލުމުގެ މަސައްކަތް ކުރަން ޖެހިފައެެވެ.

މިއީ ތަހުޒީބުވެފައިވާ މުޖުތަމައަކުން ފެންނަން ޖެހޭ އަމަލުތަކެއް ނޫނެވެ. ބަހާއި ފެރީގެ ޚިދުމަތަކީ ތިމާ އެކަނި ހޯދާ ޚިދުމަތެއް ނޫނެވެ. އެއީ ހުރިހާ އުމުރުފުރައެއްގެ ހުރިހާ ޖިންސެއްގެ މީހުން ހޯދާ ޚިދުމަތެކެވެ. އެއީ ތިމާގެ މައިންބަފައިންނާއި ކޮއްކޮ ނުވަތަ އެ ނޫންވެސް އާއިލީ މެމްބަރަކަށް ވެދާނެއެވެ. އެފަދަ މަންޒަރުތަކާއި ލިޔުންތައް އެ ފަރާތްތަކަށް ފެންނަން ތިމާ ބޭނުންވާނެހެއްޔެވެ؟ މިއީ އެއްވެސް މީހަކު ބޭނުންވާނެ ކަމެއް ނޫންކަން ޔަގީނެވެ.

ނުރަނގަޅު މަންޒަރާއި ލިޔުންތައް އެކަންޏެއް ނޫނެވެ. އެހެނިހެން ބާވަތްތަކުގެ ލިޔުންތައް ވެސް މި ސީޓުތަކުގެ ފަހަތުގައި ލިޔެފައި ހުރެއެވެ. އެ ލިޔުމުގައި ނުރަނގަޅު އެއްޗެއް ނެތް ނަަމަވެސް އެފަދަ ތަންތަނަކީ ލިޔަން ހުންނަ ތަންތަން ނޫންކަން ދަންނަންވާނެއެވެ.

ބަހުގައި ތިމާ ދަތުރު ކުރިކަން އަންގަން، ނުވަތަ ހަނދާނަކަށް ނަން ލިޔެލަނީއެވެ. އެއީ އެއްވެސް ކަމެއް ނޫންކަން ހީކުރެވޭތީއެވެ. އެއީ ހަމައެކަނި ދެލިކޮޅެކެވެ. ނަމަވެސް މިއީ މުދަލަށް ލިބޭ ވަރަށް ބޮޑު ގެއްލުމެކެވެ. އެ ލިޔުންތައް ފިލުވަން އެތައް ޚަރަދެއް ކުރަން ޖެހޭއިރު އެ ތަނެއްގެ ރީތިކަން ވެސް ގެއްލިގެންދެއެވެ.

މިފަދަ ގެއްލުންތައް ދޭއިރު އެ ގެއްލުން ދެވެނީ އަމިއްލަ މުދަލަށެވެ. އެއީ ރައްޔިތުންގެ ލާރިން ރައްޔިތުންނަށް ދޭ ޚިދުމަތެކެވެ. އެހެންކަމުން ތިމާ ބޮޑު އަގުގައި ގަނެފައި އޮންނަ އެއްޗަކަށް ގެއްލުމެއް ވާން ނޭދޭ ފަދައިން މިފަދަ ތަކެއްޗަށް ވެސް ގެއްލުމެއް ވާން އެދިގެންނުވާނެއެވެ.

ގެންގުޅޭ ތަކެއްޗާއި ގޭތެރެ ސާފުތާހިރުކޮށް ބަހައްޓަން ބޭނުންވާ ގޮތަށް ބަހާއި ފެރީތައް ވެސް ސާފުތާހިރުކޮށް ބަހައްޓަން އެދެންވާނެއެވެ. ނަމަވެސް މަދު ބައެއްގެ ފަރާތުން ނަމަވެސް ބަހާއި ފެރީގެ އެތެރެއަށް ކުނި އެޅުމާއި ކުރެހުން ފަދަ ނާތަހުޒީބު އަމަލުތައް ފެންނަކަމީ ދެރަވާން ޖެހޭ ކަމެކެވެ.