ފީފާ ވޯލްޑް ކަޕްގައި ކްރޮއޭޝިޔާއާއި މޮރޯކޯ ބައްދަލުކުރި މެޗުގައި ލަނޑު ޖެހުމަށް ލިބުނު ފުރުސަތުތަކުގެ ބޭނުން ދެޓީމަށްވެސް ނުހިފި އެއްވަރުވެއްޖެއެވެ.
މެޗުގައި ގިނަ ވަގުތު ބޯޅަ ހިފަހައްޓައިގެން ކުޅުނީ ކްރޮއޭޝިޔާ ޓީމުންނެވެ. މޮރޮކޯއިން މަސައްކަތްކުރީ ރަނގަޅަށް ޑިފެންސްކުރުމަށްފަހު ލިބޭ ފުރުސަތުގައި ކުރިއަށް އަރައި ލަނޑުޖެހުމަށެވެ. މެޗު ނިމުނީ އެއްވެސް ޓީމަކަށް ލަނޑެއް ނުޖެހި އެއްވަރުވެގެންނެވެ.
ގްރޫޕް އެފްގެ ފުރަތަމަ މެޗުގައި މި ދެޓީމު ބައްދަލުކުރިއިރު, ދެޓީމަށްވެސް ލަނޑު ޖަހަން ރަނގަޅު ފުރުސަތުތަކެއް ލިބުނެވެ. އެންމެ ރަނގަޅު ފުރުސަތެއް ލިބުނީ ކްރޮއޭޝިޔާގެ ތަރި ލުކަ މޮޑްރިޗްއަށެވެ. ނަމަވެސް އޭރިއާ ބޭރުން މޮޑްރިޗް ފޮނުވާލި ބާރު ހަމަލާ ދިޔައީ ގޯލުގެ ހުރަސް ދަނޑި މަތިން ބޭރަށެވެ.
މުބާރާތުގައި ކުރިއަށް އޮތީ ޖަރުމަނާއި ޖަޕާނު ބައްދަލުކުރާ މެޗެވެ. މިރޭ 9 ޖަހާއިރު އޮންނާނީ ސްޕޭނާއި ކޮސްޓަރިކާ ބައްދަލުކުރާ މެޗެވެ. މިރޭގެ ފަހު މެޗުގައި ދަންވަރު 12 ޖަހާއިރު ބައްދަލުކުރާނީ ބެލްޖިއަމްއާއި ކެނެޑާއެވެ.
