ޕެނަލްޓީގައި ކްރޮއޭޝިއާ ބަލިކޮށް، ފްރާންސް ސެމީ ފައިނަލަށް

ޔުއެފާ ނޭޝަންސް ލީގުގެ ކުއާޓާ ފައިނަލްގެ ދެ ވަނަ ލެގުގައި ޕެނަލްޓީ ޖަހައިގެން ކްރޮއޭޝިއާ ބަލިކޮށް، ފްރާންސް އިން މުބާރާތުގެ ސެމީ ފައިނަލްގެ ޖާގަ ހޯދައިފި އެވެ.

މިދިޔަ ހަފުތާގައި މި ދެ ޓީމު ބައްދަލު ކުރި ކުއާޓާ ފައިނަލްގެ ފުރަތަމަ ލެގު ކްރޮއޭޝިއާ އިން ކާމިޔާބު ކުރީ 2-0 އިންނެވެ. އެހެންކަމުން، މުބާރާތުގެ ސެމީ ފައިނަލް އިން ފުރުސަތު ހޯދުމަށް، ފްރާންސް އަށް އޮތީ ކްރޮއޭޝިއާ ބަލި ކުރުން މަޖުބޫރުވެފަ އެވެ.

އާދީއްތަ ދުވަހުގެ ރޭ ކުޅުނު ކުއާޓާ ފައިނަލްގެ ދެ ވަނަ ލެގުގެ ފުރިހަމަ ވަގުތު ހަމަވީއިރު، ފްރާންސް އިން ވަނީ 2-0 އިން އެގްރިގޭޓް ނަތީޖާ ހަމަހަމަ ކޮށްފަ އެވެ. އެހެންވެ ކުޅުނު 15 މިނެޓުގެ ދެ ހާފުގައި ވެސް އެއްވެސް ޓީމަކަށް ލަނޑެއް ނުޖެހުމުން ނަތީޖާ ނެރުމަށް ވަނީ ޕެނަލްޓީ ޖަހައިފަ އެވެ.

މެޗުގެ ދެ ވަނަ ހާފު ފަށައިގެން ހަތް ވަނަ މިނެޓުގައި ފްރާންސް އަށް ލީޑު ނަގައިދިނީ މައިކަލް އޮލައިސޭ އެވެ. އޭގެ ފަހުން މެޗުގެ 80 ވަނަ މިނެޓުގައި އޮސްމާން ޑެމްބެލޭ ވަނީ ފްރާންސްގެ ދެ ވަނަ ލަނޑު ޖަހައި ލީޑު ފުޅާކޮށް، އެގްރިގޭޓް ނަތީޖާ ހަމަހަމަ ކޮށްފަ އެވެ.

ނަތީޖާ ނެރުމަށް ޖެހި ހަތް ޕެނަލްޓީގެ ތެރެއިން ފްރާންސް އިން ވަނީ ފަސް ޕެނަލްޓީ ކާމިޔާބު ކޮށްފަ އެވެ. އެއީ ކީލިއަން އެމްބާޕޭ، އައުރެލިއަން ޗުއަމެނީ، ރަންޑަލް ކޯލޯ މުއާނީ، ޑިސެއާ ޑޯވް އަދި ޑަޔޮޓް އުޕެމަކާނޯގެ ޕެނަލްޓީ އެވެ. އެ ޓީމުގެ ޖޫލްސް ކޫންޑޭ އަދި ތިއޯ ހެނާންޑޭޒްގެ ޕެނަލްޓީ ވަނީ ނާކާމިޔާބުވެފަ އެވެ.

ހަތް ޕެނަލްޓީގެ ތެރެއިން ކްރޮއޭޝިއާ އަށް ކާމިޔާބު ކުރެވުނީ ހަތަރު ޕެނަލްޓީ އެެވެ. އެއީ ނިކޮލާ މޮރާ، މާރިއޯ ޕަސްލިޗް، ކްރިސްޓިއަން ޖަކިކް އަދި ޑޫކް ކަލެޓާ ކާގެ ޕެނަލްޓީ އެވެ. އެ ޓީމުގެ މާޓިން ބަޓުރިނާ، ފްރަންހޯ އިވަނޯވިޗް އަދި ޖޮސިޕް ސްޓަނިޗްގެ ޕެނަލްޓީ ވަނީ ނާކާމިޔާބުވެފައި އެވެ.

ފްރާންސް އިން ވަނީ މީގެ ކުރިން 2021 ވަނަ އަހަރު ޔުއެފާ ނޭޝަންސް ލީގު ކާމިޔާބު ކޮށްފަ އެވެ.