އިންޑޮނީޝިޔާގެ ޖާވާއަށް ހޯމަދުވަހު އައި ބާރުގަދަ ބިންހެލުމުގައި މީހުންގެ އަދަދު 268ށް އަރާފައިވާއިރު ގިނައީ ކުޑަކުދިން ކަމަށް ބީބީސީން ރިޕޯޓުކޮށްފިއެވެ.

އިންޑޮނީޝިޔާގެ އޮފިޝަލުންނާއި ހަވާލާދީ ބީބީސީން ބުނީ ބިންހެލުމާއި ގުޅިގެން 151 މީހުން ގެއްލިފައިވާއިރު 1000 މީހުންނަށް އެކިވަރުގެ އަނިޔާ ލިބިފައިވާ ކަމަށެވެ.

5.6ގެ ބާރުމިނުގައި ބިންހެލުން އައިސްފައިވަނީ ޖާވާގެ އަޑިގުޑަން ބޮޑު ހިސާބަކަށެވެ. މިއީ ފަރުބަދަމަތީ ހިސާބަކަށް ވާއިރު، ބިންހެލުން އައުމާއެކު ފަސްގަނޑު ފައިބައިގަނެ އެތައް އިމާރާތެއް ވަޅުލެވިގެން ދިޔައެވެ. މީގެއިތުރުން މަގުތައް ހަލާކުވުމާއި ގުޅިގެން ބިންހެލުމުގެ އަސަރުކުރި މީހުން ދެނެގަނެ، އެމީހުންނަށް އެހީތެރިކަން ފޯރުކޮށްދިނުމަށް ދަތިތަކާއި ވަނީ ކުރިމަތިވެފައެވެ.

ކަމާބެހޭ އިދާރާތަކުން ބުނެފައިވާ ގޮތުގައި ބިންހެލުމުގައި 22،000 ގެ ވަނީ ބިމާހަމަވެފައެވެ. އަދި 58،000 މީހުން ސަލާމަތްކޮށް ވަގުތީ ހިޔާތަކަށް ވަނީ ގެންދެވިފައެވެ.

އިންޑޮނީޝިޔާގެ ރައީސް ޖޯކޯ ވިޑޯޑޯ ވަނީ ބިންހެލުން އައި ހިސާބަށް ވަޑައިގެން އެހީގެ މަސައްކަތުގައި ހަރަކާތްތެރިވި ޓީމުތަކާ ބައްދަލުކުރައްވައި، ޓީމުތަކަށް ހިތްވަރު ދެއްވާފައެވެ. އަދި އެހީގެ މަސައްކަތަށް ގިނަ އަދަދެއްގެ ފުލުހުންނާއި ސިފައިން ވަނީ ނެރެފައެވެ.

ބިންހެލުން އައުމަކީ އިންޑޮނީޝިޔާއަށް އާންމު ކަމެކެވެ. 2018 ވަނަ އަހަރު ސުލަވޭސީ ޖަޒީރާއަށް އައި ބިންހެލުމުގައި ވެސް ދެހާހަށް ވުރެގިނަ މީހުން މަރުވެފައިވެއެވެ.