މެސީގެ މެސެޖު ސަޕޯޓަރުންނަށް: ޓީމަށް އިތުބާރު ކުރޭ، ސަޕޯޓަރުން މާޔޫސްވިޔަކަ ނުދޭނަން

އާޖެންޓީނާގެ ޓީމަށް އިތުބާރު ކުރުމަށާއި، ސަޕޯޓަރުން މާޔޫސްވިޔަ ނުދޭނެ ކަމަށް ބުނެ އެ ޓީމުގެ ކެޕްޓަން ލިއޮނެލް މެސީ ސަޕޯޓަރުންނަށް މެސެޖެއް ފޮނުވައިފިއެވެ.

މިއަހަރުގެ ވޯލްޑް ކަޕް މުބާރާތުގެ ފުރަތަމަ މެޗުގައި ސައުދީ އަރަބިއްޔާ އަތުން ބަލިވި މެޗަށްފަހު ވާހަކަ ދައްކަމުން މެސީ ބުނީ މެޗުން ބަލިވުމުން އެއްވެސް ބަހަނާއެއް ދައްކަން ބޭނުން ނުވާ ކަމަށެވެ. އޭނާ ބުނީ ކުރިއަށް އޮތް ތަނުގައި އާޖެންޓީނާ ޓީމު ނިކުންނާނީ އެ މެޗަށްވުރެ ވަރުގަދަ ކޮށް ކަމަށެވެ. އޭނާ ބުނީ އާޖެންޓީނާ ޓީމުގައި އޮތީ ވަރުގަދަ ސްކޮޑެއް ކަމަށާއި، އެކަން މީގެ ކުރިން ވެސް ސާބިތުކޮށްދީފައިވާނެ ކަމަށެވެ. މެސީ ބުނީ މި ހާލަތަކީ ގިނަ ދުވަސްތަކެއް ވަންދެން ޓީމަށް ކުރިމަތިނުވާ ހާލަތެއް ކަމަށެވެ. މެސީ ބުނީ މިއީ ހުރިހާ އެންމެނަށް ވެސް ލިބޭ ދެރައެއް ކަމަށާއި، މުބާރާތުގެ ފެށުން އެ ގޮތަށް ދާން ބޭނުންނުވި ކަމަށެވެ.

އިތުރަށް ވާހަކަ ދައްކަމުން މެސީ ބުނީ ކޮންމެ ކަމެއް ވެސް ވަނީ ސަބަބަކަށްޓަކައި ކަމަށެވެ. އޭނާ ބުނީ ކުރިއަށް އޮތް ތަނަށް ވަރުގަދަޔަށް ތައްޔާރުވާން ޖެހޭ ކަމަށެވެ. މެސީ ބުނީ އަމިއްލަ އަތް މަތީގައި ކަންކަން ބޭއްވަން ބޭނުންނަމަ، މޮޅުވާން ޖެހޭ ކަމަށެވެ.

މެސީ ބުނީ ސައުދީ ޓީމުގައި ތިބީ ވެސް ވަރަށް މޮޅެތި ކުޅުންތެރިން ކަމަށެވެ. އޭނާ ބުނީ މެޗުގައި ސައުދީ ކުޅުންތެރިން ބޯޅައާއެކު ފެނުނީ ވަރަށް ވަރުގަދަ ކޮށް ކަމަށެވެ. އޭނާ ބުނީ އާޖެންޓީނާ އިން ވަރަށް ބޮޑަށް މަސައްކަތް ކުރި ނަމަވެސް، ސައުދީގެ ކުޅުންތެރިން އެކަަމަށް ހުރަސްއެޅިކަމަށެވެ. މެސީ ބުނީ އާޖެންޓީނާގެ ކުޅުންތެރިންނަށް ބޯޅައާއެކު ރަނގަޅު ކުޅުމެއް ސައުދީ މެޗުގައި ނުދެއްކުނު ކަމަށެވެ.

ގްރޫޕް ސްޓޭޖުގެ ދެ ވަނަ މެޗުގައި އާޖެންޓީނާ އިން މެކްސިކޯއާ ދެކޮޅަށް ނިކުންނާނީ މި މަހުގެ 27 ގައެވެ.