މިފަހަރުގެ ފީފާ ވޯލްޑް ކަޕްގެ ތަށި އުފުލާލާނެ ކަމަށް ގިނަ ބަޔަކު ބުނަމުންދާ އާޖެންޓީނާ ކުޅުނު ފުރަތަމަ މެޗުގައި ހިތި ގޮތަކަށް ބަލިވެއްޖެއެވެ.
ގްރޫޕް ސީގެ ފުރަތަމަ މެޗުގައި ސައޫދީ އަރަބިއްޔާއާ ބައްދަލުކުރި މެޗުން އާޖެންޓީނާ ބަލިވީ 2-1ންނެވެ. މެޗުގެ ފުރަތަމަ ހާފުގައި އާޖެންޓީނާއިން ވަނީ މޮޅު ކުޅުމެއް ދައްކާފައެވެ. ފުރަތަމަ ލަނޑުޖަހާ ލީޑު ނެގީވެސް އާޖެންޓީނާއިންނެވެ. ފުރަތަމަ ހާފުގެ 10 ވަނަ މިނެޓުގައި އާޖެންޓީނާއަށް ލިބުނު ޕެނަލްޓީއަކުން ލަނޑު ޖެހީ ޓީމުގެ ކެޕްޓަން ލިއޮނެލް މެސީއެވެ. މި ލަނޑާއެކު މެސީވަނީ ވޯލްޑް ކަޕްގެ ހަތަރު މުބާރާތެއްގައި ލަނޑުޖެހި އާޖެންޓީނާގެ ފުރަތަމަ ކުޅުންތެރިޔާގެ ޝަރަފު ހޯދާފައެވެ.
މީގެ އިތުރުންވެސް ފުރަތަމަ ހާފުގައި އާޖެންޓީނާއިން ތިން ލަނޑު ޖެހިއެވެ. އެއީ މެސީ ޖެހި ލަނޑަކާއި ލައުޓާރޯ މާޓިނޭޒް ޖެހި ދެލަނޑެވެ. ނަމަވެސް މި ތިން ލަނޑުވެސް ރެފްރީ ވަނީ އޮފްސައިޑު ކަމަށް ނިންމާ ބަލައިނުގަނެފައެވެ.
ސައޫދީން މެޗު ކާމިޔާބުކުރީ ދެވަނަ ހާފުގައި ފަހަތުން އަރާ ދެލަނޑު ޖަހައިގެންނެވެ. ސައޫދީއަށް ނަތީޖާ ހަމަހަމަކޮށްދިނީ ސާލިހު އަލް ޝެހްރީއެވެ. މިއީ ގޯލުގެ ދުރު ކަނަށް ބޯޅަ ފޮނުވާލައިގެން އޭނާ ކާމިޔާބުކުރި ލަނޑެކެވެ. ލަނޑަށް ފަހު ސައޫދީ ވަނީ ވަރުގަދަ ޖޯޝެއްގައި ކުޅެ މެޗުގެ އޮއެވަރު ބައްދަލުކޮށްލާފައެވެ. އާޖެންޓީނާ ގޯލުގެ މަތީ ކަނަށް ބޯޅަ ފޮނުވާލައިގެން ސައޫދީ މޮޅުކޮށްދިނީ ކެޕްޓަން ސާލެމް އަލް ދައުސާރީއެވެ.
މެޗުގެ ފަހު ވަގުތުގައި އާޖެންޓީނާއިން ލަނޑު ޖެހުމަށް ވަރަށް ބޮޑަށް މަސައްކަތް ކޮށްފައެވެ. ނަމަވެސް ލިބުނު ފުރުސަތުތަކުގެ ބޭނުން ނުހިފުނެވެ. އާޖެންޓީނާގެ ތަރި މެސީ ފޮނުވާލި ހިލޭ ޖެހުން ގޯލުގެ ހުރަސް ދަނޑި މަތިން ބޭރަށެވެ. އޭގެ ފަހުން މެސީ ފޮނުވާލި ހަމަލާ ދިފާއުކުރީ ސައޫދީގެ ކީޕަރެވެ.
ގްރޫޕް ސީގައި މި ދެޓީމުގެ އިތުރުން ދެން އޮތީ ޕޮލެންޑާއި މެކްސިކޯއެވެ.
