މިހާރު އެންމެ ބޮޑު އިސްކަމެއްދީގެން މަސައްކަތް ކުރަނީ އިންވެސްޓްމަންޓުތައް ހޯދުމަށް: ސުޖާތާ

މިހާރު އެންމެ ބޮޑު އިސްކަމެއްދީގެން މަސައްކަތް ކުރަނީ އިންވެސްޓްމަންޓުތައް ހޯދުމަށް ކަމަށް ޕެންޝަން އޮފީހުގެ ޗީފް އެގްޒެކެޓިވް އޮފިސަރ ސުޖާތާ ހަލީމް ވިދާޅުވެއްޖެއެވެ.

ސުޖާތާ މިފަދައިން ވިދާޅުވީ ރާއްޖެޓީވީއަށް ދެއްވި އެކްސްކްލޫސިވް އިންޓަރވިއުއެއްގައެވެ.

ސުޖާތާ ވިދާޅުވީ، ރާއްޖޭގެ ޕެންޝަނާއި ބެހެ ނިޒާމު މިހާރު ވަރަށް ބޮޑަށް ކުރިއަރައިގެން ގޮސްފައިވާ ކަމަށެވެ. އެގޮތުން މިހާރު ރާއްޖޭގައި ހުރިހާ އެންމެންވެސް އެކުލެވޭ ގޮތަށް، އުމުރުން 65 އަހަރު ވުމުން ދައުލަތުން ޕެންޝަން ދެވޭ ސްކީމެއްވެސް ޤާއިމު ކުރެވިފައިވާކަމަށް ސުޖާތާ ވިދާޅުވިއެވެ.

ސުޖާތާ އިތުރަށް ވިދާޅުވީ، ޕެންޝަން ފަންޑަށް ޖަމާކުރާ ފައިސާ ނުނެގޭތީ އާންމު ރައްޔިތުން އެކަމުގެ ކަންބޮޑުވުން ފާޅުކުރާ ކަމަށެވެ.

ސުޖާތާ ވިދާޅުވީ، ރާއްޖޭގައި އޮންނަ ނިޒާމުގައި އަދި އޮތީ ހަމައެކަނި އެ ފައިސާ ޕެންޝަނަށް ބޭނުން ކުރެވޭ ގޮތަށް ކަމަށެވެ. އެހެންނަމަވެސް ޕެންޝަން ސްކީމުން އިތުރު ފައިދާތަކެއް އުފެއްދުމަށްޓަކައި ކުރަންޖެހޭ މަސައްކަތްތައް ކުރުމަށް އެ އޮފީހުން ވިސްނަމުންދާ ކަަމަށާއި، އެކަމަށްޓަކައި މަސައްކަތް ކުރެވެމުންދާކަމަށް އޭނާ ވިދާޅުވިއެވެ. އެގޮތުން ޕެންޝަން ރައްކާތެރިކޮށްގެން ބަހައްޓައިގެންވެސް ކުރެވިދާނެ ކަންކަން ދެނެގަނެ، އެކަމަށް މަސައްކަތް ކުރައްވާނެކަމަށް ސުޖާތާ ވިދާޅުވިއެވެ.

ޕެންޝަން ނިޒާމަކީ ޤައުމު ބިނާ ކުރުމުގައި މުހިއްމު ރޯލެއް އަދާކުރާ އެއްޗެއްކަން ފާހަގަ ކުރައްވައި ސުޖާތާ އިތުރަށް ވިދާޅުވީ، ރާއްޖޭގެ މިހާރު އޮތް ޕެންޝަން ނިޒާމު އެކުލަވާލުމުގައި 13 އަހަރު ހޭދަވެގެން ގޮސްފައިވާ ކަމަށެވެ.

އަދި މިހާރު އެންމެ ބޮޑު އިސްކަމެއްދީގެން މަސައްކަތް ކުރަނީ އިންވެސްޓްމަންޓުތައް ހޯދުމާއި ގުޅޭގޮތުންކަން ސުޖާތާ ފާހަގަ ކުރެއްވިއެވެ.

ސުޖާތާ ވިދާޅުވީ ޕެންޝަން ފަންޑަށް ޖަމާކުރާ ފައިސާ، އަހަރަކަށްވުރެ އަހަރެއް އިތުރުވަމުންދާކަމަށެވެ، އެގޮތުން މިހާރު ކޮންމެ މަހަކު 122 މިލިއަން ރުފިޔާ ޕެންޝަން ފަންޑަށް ޖަމާވާކަމަށާއި، 2021 ވަނަ އަހަރަށް ބަލާނަމަ، މަހެއްގެ މައްޗަށް ޕެންޝަން ފަންޑަށް ޖަމާކޮށްފައިވަނީ 105 މިލިއަން ރުފިޔާކަމަށް ސުޖާތާ ވިދާޅުވިއެވެ. މިއީ ކުރިއެރުމެއްގެ ގޮތުގައި ސުޖާތާ ފާހަގަކުރެއްވިއެވެ.