ޕެންޝަން ފައިސާގެގޮތުގައި މިހާރު ކޮންމެ މަހަކު 122 މިލިއަން ރުފިޔާ ޖަމާކުރާކަމަށް, ޕެންޝަން އޮފީހުގެ ޗީފް އެގްޒެކެޓިވް އޮފިސަރ ސުޖާތާ ހަލީމް ވިދާޅުވެއްޖެއެވެ.
ސުޖާތާ މިފަދައިން ވިދާޅުވީ ޕެންޝަން އޮފީހުގެ ސީއީއޯގެ މަގާމާ ހަވާލުވެވަޑައިގެން ރާއްޖެޓީވީއަށް ދެއްވި އެކްސްކްލޫސިވް އިންޓަރވިއުއެއްގައެވެ.
ސުޖާތާ ވިދާޅުވީ ޕެންޝަން ފަންޑަށް ޖަމާކުރާ ފައިސާ، އަހަރަކަށްވުރެ އަހަރެއް އިތުރުވަމުންދާކަމަށެވެ، އެގޮތުން މިހާރު ކޮންމެ މަހަކު 122 މިލިއަން ރުފިޔާ ޕެންޝަން ފަންޑަށް ޖަމާވާކަމަށާއި، 2021 ވަނަ އަހަރަށް ބަލާނަމަ، މަހެއްގެ މައްޗަށް ޕެންޝަން ފަންޑަށް ޖަމާކޮށްފައިވަނީ 105 މިލިއަން ރުފިޔާކަމަށް ސުޖާތާ ވިދާޅުވިއެވެ. މިއީ ކުރިއެރުމެއްގެ ގޮތުގައި ސުޖާތާ ފާހަގަކުރެއްވިއެވެ.
ސުޖާތާ ވިދާޅުވީ ޕެންޝަން ފަންޑަށް ޖަމާކުރާ ފައިސާއަކީ ރައްކާތެރިކަމާއެކު ރައްކާކުރެވިފައި ހުންނާނެ ފައިސާކަމަށެވެ. މިއީ ކިހާ މުހިންމު ކަމެއްކަން ރައްޔިތުންނަށް އެނގުން މުހިންމުކަމަށް ސުޖާތާ ވިދާޅުވިއެވެ.
ޕެންޝަން ޚިދުމަތް އިތުރަށް ހަރުދަނާކުރުމަށް ކުރަމުންދާ މަސައްކަތުގެ ތެރެއިން ކުރިއަށްއޮތް 3 އަހަރަށް ގިނަ ކަންތައްތަކެއް ކުރަން އެކުލަވާލާފައިވާކަމަށް ސުޖާތާ ވިދާޅުވިއެވެ. މިގޮތުން އެންމެންނަށް ބޭނުންވާ ކަންތައްތަކަށް އެޓެންޑުކުރެވޭފަދަ ސްކީމްތަކެއް އެކުލަވާލުމަށް މަސައްކަތްތަކެއް ކުރަން ހިމަނާފައިވާކަމަށް ސުޖާތާ ވިދާޅުވިއެވެ. އެއީ ދިގު މުއްދަތަކަށް ކުރާ އިންވެސްޓްމެންޓުތަކަކަށްވުން މުހިންމު ކަމަށާއި، އެހެންކަމުން މިކަމަށް ވަރަށް ބޮޑަށް ފޯކަސް ކުރައްވާނެ ކަމަށް އޭނާ ވިދާޅުވިއެވެ.
