އޮޕަރޭޝަން ހޭހަން ނިންމާލިއިރު 853 ބަންދު މީހުންނާއި ޤައިދީން ޑޮކްޓަރަށް ދައްކައިފި
19 ނޮވެމްބަރު 2022 | ހޮނިހިރު 07:13އޮޕަރޭޝަން ހޭހަން ފެށީ އޮކްޓޯބަރު 29 ވަނަ ދުވަހު
އޮޕަރޭޝަން ހޭހަން ގެ ތެރެއިން
މޯލްޑިވްސް ކަރެކްޝަނަލް ސާރވިސްގެ ބެލުމުގެ ދަށުގައި ތިބި ޤައިދީންގެ ތެރެއިން ސްޕެޝަލިސްޓް ޑޮކްޓަރުންނަށް ދައްކަންޖެހިފައި ތިބި ޤައިދީންނަށް ފެށި "ހޭހަން" އޮޕަރޭޝަން ނިންމާލައިފިއެވެ.
ކޮމިޝަނާ އޮފް ޕްރިޒަންސް އަހްމަދު މުހައްމަދުފުޅު ވިދާޅުވީ މި އޮޕަރޭޝަން ނިންމާލިއިރު 853 ބަންދު މީހުންނާއި ޤައިދީން ޑޮކްޓަރަށް ދައްކާފައިވާ ކަމަށެވެ. އަދި ޖަލުގެ ސިއްހީ ފަރުވާގެ ނިޒާމު އިތުރަށް ހަރުދަނާ ކުރެއްވުމަށް މަސައްކަތްޕުޅު ކުރައްވާނެ ކަމަށް ވެސް ވިދާޅވުިއެވެ.
ކޮމިޝަނާ ވަނީ މި އޮޕަރޭޝަން ކާމިޔާބުކަމާއެކު ނިންމާލުމަށް އެހީތެރިވެދިން އޮފިސަރުންނަށް ޝުކުރު އަދާކުރައްވާފައެވެ.
އޮޕަރޭޝަން ހޭހަން ފެށީ އޮކްޓޯބަރު 29 ވަނަ ދުވަހުއެވެ. އޮޕަރޭޝަން ހޭހަން އަކީ ޖަލުގައި ތިބި ޤާއިދީންނާއި ބަންދު މީހުންގެ ތެރެއިން ޚާއްސަ ޑޮކްޓަރުންނަށް ދައްކަންޖެހޭ ގިނަ އަދަދެއްގެ މީހުން ތިބުމާ އެކު، އެމީހުން ޚާއްސަ ޑޮކްޓަރުންނަށް ދެއްކުމަށާއި ޖަލުގައި ދެވެން ނެއް ފަރުވާ ދިނުމަށް ހޮސްޕިޓަލަށް ނުވަތަ އެނޫންވޭސް ސިއްޙީ ޚިދުމަތްދޭ މަރުކަޒަކަށް ގެންގޮސްގެން ދިނުމަށް ހިންގި ޚާއްސަ އޮޕަރޭޝަނެކެވެ.
މި އޮޕަރޭޝަންގައި ބައިވެރިވި އޮފިސަރުންގެ މައިގަނޑު މަސްއޫލިއްޔަތަކީ ޚާއްސަ ޑޮކްޓަރުންނަށް ދައްކަންޖެހޭ ޤާއިދީންނާއި ބަންދު މީހުން ހަދަންޖެހޭ ތަފާތު އެކި ޓެސްޓުތަކާއި ސިއްޙީ ޚިދުމަތްދޭ ތަންތަނުން ފޯރުކޮށްދޭ ޚިދުމަތްތަކާ ހަމައަށް ޖަލުން އެސްކޯޓުކޮށް، އެ ޚިދްމަތް ލިބޭނެ މަގުފަހި ކޮށްދިނުމެވެ.
މި އޮޕްރޭޝަންގައި ސީނިއަރ މެނޭޖްމަންޓް ބައިވެރިކުރި މަޤްޞަދަކީ ޤައިދީންނާއި ބަންދު މީހުން އެސްކޯޓު ކުރުމުގައި ހުރި ދަތިތައް ދެނެގަތުމާ އެކު ނިޒާމީ ސިފައެއްގައި ގެންނަންޖެހޭ ބަދަލުތައް ދެނެގަތުމާއި ފުރިހަމަ ކުރަންޖެހޭ ކަންކަން ފުރިހަމަ ކުރުމަށް މަސައްކަތް ކުރުމެވެ.
