ޒަކާތު ފަންޑުގެ ފައިސާ އިން ބޭސްފަރުވާއަށް މިއަހަރުގެ އޮކްޓޯބަރު މަހާއި ހިސާބަށް 16 މިލިއަން ރުފިޔާ ޚަރަދުކޮށްފައިވާ ކަމަށް އިސްލާމިކް މިނިސްޓަރު ޑރ. އަހްމަދު ޒާހިރު އަލީ ވިދާޅުވެއްޖެއެވެ.

ޑރ. އަހްމަދު ޒާހިރު އަލީ ވިދާޅުވީ ޒަކާތުގެ ފައިސާ އިން ފަޤީރުންނާއި މިސްކީނުންނަށް މިނިސްޓްރީން އެހީތެރިކަން ފޯރުކޮށްދޭ ކަމަށާއި  ޒަކާތުގެ ފައިސާ ބަހަނީ 8 ބަޔަށް ކަމަށެވެ.

ޒަކާތުގެ ބޭސްފަރުވާގެ ގޮތުގައި ދޭ ފައިސާ އެއްއަހަރަށް ވުރެން އަނެއް އަހަރު ގިނައިން ދޭންޖެހޭކަން ވެސް ފާހަގަކުރެއްވިއެވެ.

މިނިސްޓަރ އިތުރަށް ވިދާޅުވީ ވަރަށް ގިނަ ފަރާތްތަކުން މިނިސްޓްރީއަށް ބޭސްފަރުވާ އަށް ހުށަހަޅާ ކަމަށާއި ކޮމެޓީން ކަނޑައެޅިފައި އޮންނަ އުސޫލުގެ ތެރެއިން ފައިސާ ފޯރުކޮށްދޭ ކަމަށެވެ.

ފާއިތުވި އަހަރުތަކުގައި ރައްޔިތުން ޒަކާތް ދައްކާފައިވާ މިންވަރު ވަނީ އިތުރުވެފައެވެ. އެގޮތުން 2019 އަހަރު 60 މިލިއަން ރުފިޔާ ލިބިފައިވާއިރު 2020 ވަނަ އަހަރު 79 މިލިއަން ރުފިޔާ ލިބުނެވެ. އަދި 2021 ވަނަ އަހަރު 86 މިލިއަން ރުފިޔާ ލިބިފައިވެއެވެ. މިކަމުން ވެސް އަންގައިދެނީ ޒަކާތާމެދު ރައްޔިތުންގެ އިތުބާރު އޮތް މިންވަރެވެ.

ޒަކާތު ސްކޮލަރޝިޕްގެ ނަމުގައި ޕްރޮގްރާމެއް ކުރިއަށް ގެންދާއިރު ރަޝިއާ ޔޫކްރެއިން ހަނގުރާމައާ ގުޅިގެން ރާއްޖެ އައި ކުދިންނަށް ޒަކާތު ފައިސާ އިން އެހީވި ކަމަށް ވެސް މިނިސްޓަރ ވިދާޅުވިއެވެ.

މިނިސްޓަރ މިހެން ވިދާޅުވެފައިވާއިރު ފަގީރުންނަށް މާލީ އެހީ ފޯރުކޮށްދީ, ފަގީރުންގެ އާބާދީ ނައްތާލުމަށް "ޒަކާތު ނަފާ" ޕްރޮގްރާމު ފެށުމަށް ވަނީ ތައްޔާރުވެފައެވެ.

މިއީ މިނިސްޓްރީ އޮފް އިސްލާމިކް އެފެއަރޒާއި، އިކޮނޮމިކް މިނިސްޓްރީ، އަދި ބިޒްނަސް ސެންޓަރ ކޯޕަރޭޝަން އަދި އެގްރޯ ނޭޝަނަލް ކޯޕަރޭޝަން ގުޅިގެން ހިންގާ ޕްރޮގްރާމެކެވެ.

މިއީ ރާއްޖޭގެ ފަގީރުންގެ އާބާދީ ނައްތާލުމަށް ފަށާ ޕްރޮގްރާމެކެވެ. މި ޕްރޮގްރާމުގެ ތެރެއިން، ފަގީރުންގެގޮތުގައި ލިސްޓުކޮށްފައިވާ ފަރާތްތަކަށް އިތުރު ހުނަރުތައް އުނގަންނައިދިނުމާއި، މަސައްކަތްތައް ފަށައިދީ، އެމީހުން މާލީ ގޮތުން ބާރުވެރިކުރުވާނެއެވެ.

މި ޕްރޮގްރާމާގުޅޭ މައުލޫމާތު ހިއްސާކުރައްވަމުން އިސްލާމިކް މިނިސްޓަރ ޑރ. އަހުމަދު ޒާހިރު އަލީ ވިދާޅުވީ، މި ޕްރޮގްރާމަކީ ފަގީރުންގެ ދަފްތަރުގައި ރަޖިސްޓްރީކުރާ ފަރާތްތަކުގެ މެދުގައި ހިންގާ ޕްރޮގްރާމެއް ކަމަށެވެ. މިގޮތުން ކައުންސިލްތަކުގެ އެހީގައި ފޯމެއް ފުރިހަމަކޮށް، އެ ފޯމުތައް މިނިސްޓްރީން އެކުލަވާލާ ކޮމިޓީއަކުން އިވެލުއޭޓްކުރާނެއެވެ. އަދި އެއަށްފަހު މި އެހީ ލިބޭ ފަރާތްތައް ލިސްޓުކުރާނެ ކަމަށް މިނިސްޓަރ ވިދާޅުވިއެވެ.

މިނިސްޓަރ ވިދާޅުވީ، މިހާރު ފަގީރުންގެ ދަފްތަރުގައި ހިމެނޭ ފަރާތްތަކަށް މާލީ އެހީތެރިކަމެއް ފޯރުކޮށްދެވެނީ އަހަރަކު އެއްފަހަރު ކަމަށެވެ. އަދި އެއީ ކުޑަ މިންވަރެއް ކަމަށް މިނިސްޓަރ ވިދާޅުވިއެވެ. އެހެންކަމުން އިތުރު އެހީއެއް ފޯރުކޮށްދީގެން އެމީހުންނަށް އަމިއްލަ ފައިމައްޗަށް ތެދުވެވޭވަރުކޮށްދީ، ފަގީރުންގެ ލިސްޓު އެއްކޮށް ހުސްކޮށްލުމަކީ މި ޕްރޮގްރާމުގެ މައިގަނޑު މަގުސަދުތައްކަމަށް މިނިސްޓަރ ވިދާޅުވިއެވެ.

މި ޕްރޮގްރާމްގެ ދަށުން އެހީ ލިބޭ އާއިލާއަކަށް ޒަކާތު ފަންޑުން ޚަރަދުކުރާނީ ގިނަވެގެން 150,000 ރުފިޔާއެވެ. ނަމަވެސް، އެހީގެ ގޮތުގައި ކަނޑައެޅޭ މިންވަރު އެ އަދަދަށްވުރެ ބޮޑުވާނަމަ، އެސްއެމްއީ ފަންޑު މެދުވެރިކޮށް، އިންޓްރަސްޓް ނުހިމެނޭ ލޯނެއް ހަމަޖައްސައިދޭނެއެވެ. މި ލޯނު ހަމަޖައްސާނީ އެހީ ލިބޭ ފަރާތުން އެކަމަށް އިންކާރުނުކުރާނަމައެވެ. އަދި މި ލޯނުގެ މިންވަރު އެހީ ލިބުނު ފަރާތުން އަނބުރާ ދައްކަންޖެހޭނެއެވެ.