ވަރޖިން އެޓްލާންޓިކުން އަންނަ އަހަރު ރާއްޖެއަށް ދަތުރުތައް ފަށަނީ
މި މަހުގެ 30 އިން ފެށިގެން ބުކިންތައް ފަށާނެ
ވަރޖިން އެޓްލާންޓިކް
އިނގިރޭސިވިލާތުގެ ވަރޖިން އެޓްލާންޓިކް އިން ރާއްޖެއަށް ދަތުރުތައް ފަށަން ނިންމައިފިއެވެ.
ބުރާސްފަތި ދުވަހު މިކަން ހާމަކޮށް އެ އެއަރލައިނުން ބުނެފައިވަނީ ދަތުރުތައް ފަށަން ތާވަލު ކޮށްފައިވަނީ އަންނަ އަހަރުގެ ފިނި މޫސުމާ ދިމާކޮށް ކަމަށެވެ. އެގޮތުން ފުރަތަމަ ދަތުރުތައް ފަށާ ތާރީހެއް ގޮތުގައި ކަނޑައަޅާފައިވަނީ 22 އޮކްޓޯބަރު 2023 އެވެ.
އަންނަ އަހަރަށް ދަތުރުތައް ތާވަލު ކުރި ނަމަވެސް މި މަހުގެ 30 އިން ފެށިގެން ބުކިންތައް ފަށާނެއެވެ. މި ދަތުރުތައް ކުރަން ނިންމާފައިވަނީ ލަންޑަނުގެ ހީތުރޯ އެއަރޕޯޓުން ވެލާނާ އިންޓަރނޭޝަނަލް އެއަރޕޯޓަށެވެ.
ވަރޖިން އެއަރލައިނުން ތާވަލު ކޮށްފައިވާ ގޮތުގައި ރާއްޖެއަށް ހަފުތާއަކު ތިން ދަތުރު ކުރާނެއެވެ. މި ދަތުރުތަކުގައި ބޭނުން ކުރާނީ ބޮއިންގ 787-9 މަރުކާގެ މަތިންދާ ބޯޓެވެ.
ވަރޖިން އެއަރލައިންގެ ސީއީއޯ ޔޫހާ ޔާރވިނެން ވިދާޅުވީ އެ އެއަރލައިނުން އަބަދުވެސް ބޭނުންވަނީ ތަފާތު އާ މަންޒިލްތަކާ އެ އެއަރލައިންގެ ކަސްޓަމަރުންނާ ގުޅުވައިދިނުމަށް ކަމަށެވެ. އެގޮތުން، ވަރޖިން އެޓްލާންޓިކް ހޮލިޑޭސްގެ ކަސްޓަމަރުންގެ މެދުގައި ރާއްޖެއަކީ ވަރަށް މަގުބޫލު މަންޒިލެއް ކަމަށާއި އެ ފުރުސަތު ކަސްޓަމަރުންނަށް ފަހިވެގެންދިއުމަކީ ލިބޭ އުފަލެއް ކަމަށް އޭނާ ވިދާޅުވިއެވެ.
ވަރޖިން އެއަރލައިނަކީ އިނގިރޭސިވިލާތުގެ މަހުޖަނު، ރިޗަރޑް ބްރޭންސަންގެ އެއަރލައިނެވެ.
ރާއްޖޭގެ ފަތުރުވެރިކަމުގެ ތަފާސްހިސާބުތައް ދައްކާ ގޮތުގައި މިއަހަރު ރާއްޖެއަށް އެންމެ ގިނަ ފަތުރުވެރިން އަންނަ ގައުމުތަކުގެ ތެރޭގައި ތިންވަނައިގައި އޮތީ އިނގިރޭސިވިލާތެވެ. އެ ޤައުމުން މިހާތަނަށް 155,018 ފަތުރުވެރިން ރާއްޖެ ޒިޔާރަތްކޮށްފައިވާއިރު މިއީ ރާއްޖެއަށް އައި ޖުމްލަ ފަތުރުވެރިންގެ 10.9 އިންސައްތައެވެ.
