ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު އާ ސުވާލުކުރުމަށް ބާއްވާ "އާސްކް ސްޕީކަރ" ޕްރޮގްރާމްގެ ހަވަނަ ޕްރޮގްރާމް ޑިސެމްބަރ މަހުގެ 1 ވަނަ ދުވަހު އޮންނާނެކަމަށް ރައްޔިތުންގެ މަޖިލީހުގެ އިދާރާއިން ބުނެފިއެވެ.

ރައްޔިތުންގެ މަޖިލީހުގެ އިދާރާއިން ބުނީ ރައްޔިތުންގެ މަޖިލީހާ ގުޅޭގޮތުން ރައްޔިތުން ކުރަން ބޭނުންވާ ސުވާލުތަކަށް ޖަވާބު ދެއްވުމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ބާއްވަވާ އާސްކް ސްޕީކަރ ގެ ހަވަނަ ޕްރޮގްރާމް އޮންނާނީ ޑިސެމްބަރ 1 ވާ ބުރާސްފަތި ދުވަހުގެ މެންދުރު 2:15 ގައިކަމަށެވެ. މީގެކުރިން އާސްކް ސްޕީކަރ ޕްރޮގްރާމްތައް ބާއްވާފައިވަނީ ޕީއެސްއެމްގައި ރޭގަނޑު އެވެ. ނަމަވެސް މިފަހަރު ޕްރޮގްރާމް އޮންނާނީ ރައްޔިތުންގެ މަޖިލީހުގެ އިދާރާގެ 4 ވަނަ ފަންގިފިލާގައިކަމަށް އެއިދާރާއިން ބުނެއެވެ.

ޕްރޮގްރާމް އޮންނަ ތަނާއި ވަގުތު ބަދަލުވުމާއި ގުޅޭގޮތުން ރައްޔިތުންގެ މަޖިލީހުގެ މީޑިޔާ އެންޑް ކޮމިޔުނިކޭޝަން ޑިރެކްޓަރ ހަސަން ޒިޔާއު ވިދާޅުވީ ޕްރޮގްރާމް ގަޑި ބަދަލުކޮށްފައިވަނީ އެރޭ ވޯލްޑް ކަޕް ގައި އާޖެންޓީނާ ކުޅޭ މެޗް އޮންނާތީކަމަށެވެ. އަދި މަޖިލީހުގެ އިދާރާގައި މިފަހަރު ޕްރޮގްރާމް ބާއްވަނީ ޓީވީއެމްގެ ބޮޑު ސްޓޫޑިއޯ ވޯލްޑްކަޕް ޝޯ އަށް ބޭނުންކުރާތީކަމަށެވެ. އަދި ދެން ހުރި ސްޓޫޑިއޯ އަށް އާންމުން ވަންނާނެ ޖާގަ ނެތުމުން ބައިވެރިވާން ބޭނުންވާ ވީހާވެސް ގިނަ ބަޔަކަށް އެފުރުސަތު ފަހިކޮށްދިނުމުގެ ގޮތުންކަމަށެވެ. މިފަހަރުގެ ޕްރޮގްރާމްވެސް ބާއްވަނީ ޕީއެސްއެމްއާ މަޖިލީސް އިދާރާ ގުޅިގެން ކަމަށް ޒިޔާއު ވިދާޅުވިއެވެ.

މިފަހަރުގެ ޕްރޮގްރާމްވެސް ރާއްޖޭގެ ހުރިހާ ޓީވީ ޗެނަލުތަކުންނާއި ސޯޝަލް މީޑިޔާ ވަސީލަތްތަކުން ވަގުތުން ދުރަށް ދައްކާނެކަމަށް މަޖިލީހުގެ އިދާރާއިން ބުނެއެވެ.

މިޕްރޮގްރާމްގައި ރައީސް ނަޝީދުއާ ސުވާލުކުރަން ބޭނުންވާ ފަރާތްތަކަށް އެފުރުސަތު ވަނީ ހުޅުވާލާފައެވެ. އެގޮތުން ފޯނުން ވީޑިއޯ ކުރުމަށްފަހު ފޮނުވައިގެން ނުވަތަ މެސެޖް މެދުވެރިކޮށް ސުވާލު ކުރެވޭނެއެވެ. މީގެއިތުރުން ޕްރޮގްރާމްގައި ލައިވްކޮށް ސުވާލުކުރުމަށް ބޭނުންވާ ފަރާތްތަކަށް ނަންނޯޓު ކުރުމުގެ ފުރުސަތު ވަނީ ހުޅުވާލާފައެވެ. އެގޮތުން ސުވާލުކުރަން ބޭނުންވާ ފަރާތުގެ ނަން ޑިސެމްބަރ 1 ވަނަ ދުވަހުގެ މެންދުރު 12ގެ ކުރިން ރައްޔިތުންގެ މަޖިލީހުގެ އިދާރާގެ މީޑިޔާ ސެކްޝަންގެ ހޮޓްލައިން ނަންބަރު 7234566ށް ފޮނުވުމަށް ވަނީ އެދިފައެވެ. ސޯޝަލް މީޑިޔާ މެދުވެރިކޮށް ސުވާލުކުރަން ބޭނުންވާ ފަރާތްތަކުން ސުވާލު ޕޯސްޓު ކުރާއިރު AskSpeaker# ބޭނުންކުރުމަށް މަޖިލީހުގެ އިދާރާއިން އެދެއެވެ.

އެންމެ ފަހުން އާސްކް ސްޕީކަރ ޕްރޮގްރާމް ބާއްވާފައިވަނީ މިއަހަރުގެ ޖޫން މަހުގެ 30 ވަނަ ދުވަހުއެވެ.