ރާއްޖޭގެ ފަރުތަކުގެ ސިއްހަތު ދެނެގަތުމަށް ބާއްވާ ފޮޓޯ މުބާރާތް ފަށައިފި
މި މުބާރާތް ކުރިއަށްދާނީ އަންނަ ޑިސެމްބަރު މަހުގެ 15ވަނަ ދުވަހާ ހަމައަށް
ރީފް ހެލްތް އެސެސްމެންޓް ފޮޓޯ މުބާރާތުގެ ސްޕޮންސަރޝިޕް އެއްބަސްވުމުގައި ސޮއި ކުރުމަށް ބޭއްވި ރަސްމިއްޔާތު
މިނިސްޓްރީ އޮފް ޓޫރިޒަމާއި ދިރާގާއި އޯޝަން ޖިއޮގްރަފިކް ސޮސައިޓީ އަދި މޯލްޑިވްސް އެލައަންސް އޮފް ޑައިވް އޮޕަރޭޓަރސް (މަޑޯ) ގުޅިގެން ރާއްޖޭގެ ފަރުތަކުގެ ސިއްހަތު ދެނެގަތުމަށް ބާއްވާ ފޮޓޯ މުބާރާތް ހުކުރު ދުވަހު ފަށައިފިއެވެ.
މިއީ ދިވެހިރާއްޖޭގެ ފަތުރުވެރިކަމުގެ ރަންޔޫބީލް ފާހަގަކުރުމުގެ ގޮތުން ބާއްވާ ފޮޓޯ މުބާރާތެކެވެ. މި މުބާރާތް ކުރިއަށްދާނީ އަންނަ ޑިސެމްބަރު މަހުގެ 15ވަނަ ދުވަހާ ހަމައަށެވެ.
މި މުބާރާތުގެ މައިގަނޑު މަގުސަދަކީ ރާއްޖޭގެ ފަރުތަކުގެ ސިއްހަތު ބަލާ ކޮންމެ އަހަރަކު މިފަދަ ޗެކްއަޕްއެއް ކުރިއަށް ގެންދިއުމެވެ. އަދި ރާއްޖޭގެ ގުދުރަތީ މާހައުލު ހިމާޔާތް ކުރުމަށް ކުރަމުންގެންދާ މަސައްކަތާއި ރާއްޖޭގެ ހިތްގައިމު ކަނޑުއަޑި ބޭރު ފަރާތްތަކަށް ދައްކާލުމަކީ ވެސް މި ހަރަކާތުގެ ބޭނުމެކެވެ.
މި މުބާރާތުގައި ފޮޓޯ ނެގުމަށް ރާއްޖޭގެ 50 މައްޝޫރު ޑައިވް ސައިޓެއް ވަނީ ކަނޑައަޅައިފައެވެ. މީގެ ތެރެއިން ކޮންމެ ވެސް އެއް ސައިޓެއް ނުވަތަ އެއަށްވުރެ ގިނަ ސައިޓީތަކުގައި ފޮޓޯޯ ނަގައިގެން މި މުބާރާތުގައި ބައިވެރިވެވޭނެއެވެ. އެގޮތުން ނަގާ ކޮންމެ ސައިޓަކުން 5 ފޮޓޯގެ ޕޯޓްފޯލިއޯއެއް ހުށަޅަން ޖެހޭނެ ކަމަށް ދިރާގުން ބުންޏެވެ.
މި މުބާރާތުގެ ފޮޓޯތައް ބައިނަލްއަޤްވާމީ ޖަޖިން ޕެނަލަކުން ބެލުމަށްފަހު ކޮންމެ ޑައިވް ސައިޓަކުން ހުށަހަޅާ ފޮޓޯތަކުން އެއްވަނަ ދެވަނަ އަދި ކޮންމެ ޑައިވް ސައިޓަކުން ފާހަގަކޮށްލެވޭ އިތުރުން ތިންވަނައެއް ހޮވާނެއެވެ. އަދި މުބާރަތުގައި ފޮޓޯ ހުށަހަޅާ ހުރިހާ ފަރާތްތަކަށްވެސް ރާއްޖޭގެ ކޮރަލް ރީފް ހެލްތު އެސެސްމަންޓްގައި ބައިވެރިވިކަމުގެ ކޮންޓްރިބިއުޝަން އޮފް އެޗީވްމަންޓް ސެޓްފިކެޓެއް ލިބޭނެއެވެ.
މި މުބާރާތުގައި ނަގާ ފޮޓޯތަކުގެ ތެރެއިން އެންމެ ރީތި 3 ފޮޓޯ، އެ ޑައިވްއަށް ޚާއްސަ ފޮތުގައި ހިމަނާނެއެވެ. އަދި މުބާރާތުގެ މޮޅު ފޮޓޯތައް އަންނަ އަހަރުގެ ޖެނުއަރީ މަހު އޮންނަ އަންޑަރވޯޓަރ އެގްޒެބިޝަނުގައި، ފޮޓޯގްރާފަރުގެ ނަމާއެކު ހިމަނާނެއެވެ. މިއީ ދިވެހި ފޮޓޯގްރާފަރުންނަށް، އެހެން ގައުމުތަކުގެ ފޮޓޯގްރާފަރުންނާ ވާދަކޮށްލުމަށް ލިބޭ ފަހި ފުރުސަތެކެވެ.
މި މުބާރާތަށް ހާއްސަކޮށްގެން ޓޫރިޒަމް މިނިސްޓްރީން ވަނީ ހާއްސަ ވެބްސައިޓެއް ވެސް ތައާރަފު ކޮށްފައެވެ. އެ ވެބްސައިޓް މެދުވެރިކޮށް ދިވެހިންނާއި ބޭރުގެ ފަރާތްތަކަށް ވެސް މި މުބާރާތުގައި ބައިވެރިވާން ރަޖިސްޓްރީ ކުރަން ހުޅުވާލިއެވެ. މި މުބާރާތުގައި ދިވެހި ފޮޓޯގްރާފަރުންނަށް ހިލޭ ބައިވެރިވެވުނު އިރު، ބޭރުގެ ފޮޓޯގްރާފަރުން 10 ޑޮލަރުގެ ފީއެއް ދައްކަންޖެހެއެވެ.
