ވ. އާރަށުގެ ޚިޔާނާތުގެ މައްސަލަ: ރައީސް ޔާމީންގެ ޝަރީއަތުގެ އަޑު އެހުން އާދިއްތަ ދުވަހަށް ފަސްކޮށްފި
އާރަށުގެ މައްސަލައާ ގުޅިގެން، މަނީ ލޯންޑަރިންގގެ ދައުވާއާއި ރިޝްވަތު ގަބޫލުކުރުމުގެ ދައުވާ ރައީސް ޔާމީންގެ މައްޗަށް ވަނީ އުފުލާފައި
ވ. އާރަށު ޚިޔާނާތުގެ މައްސަލަ
ވ. އާރަށުގެ ޚިޔާނާތުގެ މައްސަލައިގައި ކުރީގެ ރައީސް އަބްދުﷲ ޔާމީނާއި ޔޫސުފް ނައީމްގެ މައްސަލައިގެ އަޑުއެހުން އަންނަ އާދިއްތަ ދުވަހަށް ތާވަލްކޮށްފިއެވެ.
ރައީސް ޔާމީންގެ, ހިނގައިދިޔަ އެމްއެމްޕީއާރުސީ ބޮޑު ޚިޔާނާތުގެ ތެރޭގައި ހިމެނޭ އާރަށުގެ މައްސަލައާ ގުޅިގެން މަނީ ލޯންޑަރިންގގެ ދައުވާއާއި ރިޝްވަތު ގަބޫލުކުރުމުގެ ދައުވާ ރައީސް ޔާމީންގެ މައްޗަށް ވަނީ އުފުލާފައެވެ. އަދި ރައްޔިތުންގެ މަޖިލީހުގެ ކުރީގެ މެންބަރު ޔޫސުފް ނައީމަށް ރިޝްވަތު ހިފުމުގެ ދައުވާ ވަނީ އުފުލާފައެވެ.
މި މައްސަލައިގައި ބުރާސްފަތި ދުވަހުގެރޭ ބޭއްވި އަޑުއެހުމުގައި، މައްސަލައާ ހަވާލުވެ ހުންނެވި އެ ކޯޓުގެ އިސް ގާޒީ އަހުމަދު ޝަކީލް ވަނީ، އެ ޝަރީއަތް ދެން އޮންނާނީ އާދިއްތަ ދުވަހުގެ މެންދުރު ކުރީގައި ކަމަށް ނިންމަވާފައެވެ. ގާޒީ ޝަކީލް ވަނީ އެކަމާމެދު ދައުވާ ލިބޭ ފަރާތްތަކާއި ދައުލަތުގެ އިއުތިރާޒެއް އޮތްތޯ ބެލުމަށް ސުވާލުކުރައްވާފައެވެ. އެކަމަށް ޖަވާބުދެއްވަމުން ދައުލަތުގެ ވަކީލާ މަރިޔަމް ޝަހުމާ ވަނީ، އާދިއްތަ ދުވަހަށް މައްސަލައިގެ އަޑު އެހުން ލަސްކުރުމަށް ދައުލަތުގެ އިއުތިރާޒެއް ނެތްކަން ފާހަގަކުރައްވާއެވެ.
އެހެންނަމަވެސް ޔޫސުފް ނައީމްގެ ވަކީލް ހަމްޒާ ލަތީފް ވަނީ އޭނާ ބައިވެރިވާ އެހެން ބައެއް މައްސަލަތަކުގެ އަޑުއެހުން އެ ދުވަހު ތާވަލްކުރެވިފައި ހުރިކަމަށާއި އެކަން މެނޭޖްކުރާނެ ގޮތެއް ބަލަންޖެހޭ ކަމަށް ވިދާޅުވެފައެވެ. އަދި އަންނަ ހަފުތާގައި އޭނާ ބައިވެރިވާ މައްސަލައެއް ތާވަލް ނުކުރާ ދުވަހެއް ނެތްކަމަށްވެސް ވިދާޅުވިއެވެ. އެހެންނަމަވެސް ހޯމަ ދުވަހުގެ މެންދުރު ފަހު ވަގުތުގައި މައްސަލަ ތާވަލްކުރުމަށް އުޒުރެއް ނެތްކަން ހަމްޒާ ވަނީ ފާހަގަކުރައްވާފައެވެ. މީގެ އިތުރުން ދިފާއީ ވަކީލް އުސްތާޒް ޝިފާޒްވެސް ވަނީ ،އެ ދުވަހުގެ އަޑުއެހުން 1ގެ ފަހަށް ތާވަލްކޮށްފިނަމަ މައްސަލައެއް ނެތްކަމަށް ފާހަގަކުރައްވާފައެވެ.
ރައީސް ޔާމީންގެ ވަކީލު ޑރ. ޖަމީލް ވިދާޅުވީ، ބުރާސްފަތި ދުވަހުގެ ގިނަ ވަގުތު މެރަތަން ސެޝަންއެއް ގޮތަށް އެ ގެންދިއުމުން ވަރަށް ބޮޑަށް ދަތިވާ ކަމަށެވެ. އެގޮތުން ރާއްޖޭގެ ފަނޑިޔާރުކަން ކުރަނީ ޖޫރީ ސިސްޓަމެއްގެ ތެރެއިން ނޫންކަމަށްވާއިރު މައްސަލައަށް ފަނޑިޔާރަށް ސަމާލުކަން ދެވެންޖެހޭކަމަށް އޭނާ ވިދާޅުވިއެވެ. އަދި އެގޮތަށް މައްސަލަ ކުރިއަށް ގެންދިއުމުން ބުރަވަނީ ދައުވާ ލިބޭ ފަރާތަށް ކަމަށް އޭނާ ވިދާޅުވިއެވެ.
ދިފާއީ ވަކީލުންގެ ވާހަކަތަކަށްފަހު، ދައުލަތުގެ ވަކީލް އަހުމަދު ނަައުފަލްވަނީ ދައުވާ ލިބޭ ފަރާތްތަކުން އިންކާރު ނުކުރާނަމަ، ދައުވާ ލިބޭ ދެ ފަރާތްކަމަށްވާ ރައީސް ޔާމީނާއި ޔޫސުފް ނައީމްގެ މައްސަލަ ވަކި އަޑު އެހުމެއްގެ ގޮތުގައި ކުރިއަށް ގެންދަން ދައުލަތުން އިއުތިރާޒް ނުކުރާކަން ފާހަގަކުރައްވާފައެވެ. ރައީސް ޔާމީންގެ ފަރާތުން ވަނީ އަޑުއެހުން ކުރިއަށްދާއިރު ދެ ފަރާތުން ހުށަހަޅާ ވާހަކަތައްވެސް ދައުވާ ލިބޭ ފަރާތުން ބަލަން ބޭނުންވާނެކަން ފާހަގަކުރައްވާފައެވެ.
ވަކީލުގެ އެ ވާހަކަތަކަށް ޖަވާބުދެއްވަމުން މައްސަލަ ބައްލަވާ ގާޒީ ވަނީ، އަޑުއެހުން ކުރިއަށްދަނީ ވަކި އަޑުއެހުމެއްގެ ގޮތުގައި ކަމަށް ވީނަމަވެސް މައްސަލައަށް ވަދެ އަޑު އެހުމުގެ ފުރުސަތު ވަކީލުންނާއި ދައުވާ ލިބޭ ފަރާތަށް އޮންނާނެކަން ފާހަގަކުރައްވާފައެވެ. އެހެންކަމުން އާދިއްތަ ދުވަހުގެ މެންދުރުކުރީގައި އަބްދުﷲ ޔާމީންގެ ބައި ކުރިއަށް ގެންގޮސް 12ށް މެދުކަނޑާލުމަށް ފަހު، މެންދުރުފަހު 2ން ފެށިގެން ޔޫސުފް ނައީމްގެ ބައި ކުރިއަށް ގެންދަވަން ގާޒީ ވަނީ ނިންމަވާފައެވެ.
ވ. އާރަށް ކުއްޔަށް ދިނުމުގައި ހިންގި ކަމަށް ބުނާ ޚިޔާނާތުގެ މައްސަލައިގައި ކްރިމިނަލް ކޯޓުގައި ކުރިއަށްދާ ޝަރީއަތަށް ދައުލަތުން ހުށަހެޅި އާ ހެކިތައް ޝަރީއަތަށް ބަލައިގަތުމަށް ބުރާސްފަތި ދުވަހު ވަނީ ނިންމަވާފައެވެ.
