އަންނަ އާދިއްތަ ދުވަހު ފެށުމަށް ހަމަޖެހިފައިވާ ވޯލްޑްކަޕާ ދިމާކޮށް، ހައުސިންގ ޑިވެލޮޕްމެންޓް ކޯޕަރޭޝަން (އެޗްޑީސީ)ން، ބޯޅަ ފޯރީގެ ނަމުގައި ހަރަކާތެއް ފެށުމަށް ނިންމައިފިއެވެ.

އެ ކުންފުނީގެ ސީއެސްއާރު ނުވަތަ އިޖުތިމާއީ ޒިންމާގެ ދަށުން ކުރިއަށް ގެންދާ މި ހަރަކާތަކީ ހުޅުމާލޭގެ ފޭސް 1 އަދި ފޭސް 2ގައި ދިރިއުޅޭ ރައްޔިތުންނަށް ފަސޭހައިން ވޯލްޑްކަޕް ބެލޭނެ މަގު ފަހިކޮށްދިނުމަށް ހިންގާ ހަރަކާތެކެވެ. އެޗްޑީސީގެ މެނޭޖިންގ ޑިރެކްޓަރ އަހުމަދު އާތިފް ރާއްޖެ އެމްވީއަށް ވިދާޅުވީ، ބޯޅަ ފޯރީގެ ނަމުގައި އެޗްޑީސީން ފެށި މި ހަރަކާތުގައި، ހުޅުމާލޭގެ ދެ ސަރަހައްދެއްގައި ބޮޑު ސްކްރީންތައް ބަހައްޓައިގެން ވޯލްޑް ކަޕް ބެލޭނެ އިންތިޒާމު ހަމަޖައްސައިދޭނެކަމަށެވެ.

މި ހަރަކާތުގެ މެއިން ސްޕޮންސަރުންގެ ތެރޭގައި ހިމެނެނީ ޔޫތު މިނިސްޓްރީއާއި ސްޓެލްކޯގެ އިތުރުން ކޮކާކޯލާ ކޮމްޕެނީ ލިމިޓެޑެވެ. "ބޯޅަ ފޯރި" ހަރަކާތާގުޅޭ އެއްބަސްވުމުގައި ބުރާސްފަތި ދުވަހު ސޮއިކޮށްފައިވާއިރު، އެޗްޑީސީގެ ފަރާތުން މި އެއްބަސްވުމުގައި ސޮއިކުރެއްވީ އެ ކުންފުނީގެ މެނޭޖިންގ ޑައިރެކްޓަރު އަހުމަދު އާތިފެވެ. އެއްބަސްވުމުގައި ޔޫތު މިނިސްްޓްރީގެ ފަރާތުން ސޮއިކުރެއްވީ އެ މިނިސްޓްރީގެ ސްޓޭޓް މިނިސްޓަރު ހުސައިން އިސްމާއީލްއެވެ. އަދި ސްޓެލްކޯގެ ފަރާތުން އެ އެއްބަސްވުމުގައި ސޮއިކުރެއްވީ ކުންފުނީގެ މެނޭޖިންގ ޑިރެކްޓަރު އަހުމަދު ޝަރީފެވެ.

"ބޯޅަ ފޯރި" ހަރަކާތް ފޭސް 1ގައި ކުރިއަށް ދަނީ ސިންތެޓިކް ޓްރެކް ސަރަހައްދުގައެވެ. އަދި ފޭސް 2ގައި އެ ހަރަކާތްތައް ކުރިއަށް ގެންދިއުމަށް ހަމަޖެހިފައިވަނީ ހުޅުމާލެ ފޭސް 2ގެ ހިޔާ ފްލެޓުތައް ކައިރީގައި ހުންނަ ކްރިކެޓް ސްޓޭޑިއަމްގައެވެ. މި ދެ ސަރަހައްދުގައިވެސް 20 ފޫޓު 40 ފޫޓުގެ ބޮޑު ސްކްރީނެއް ބެހެއްޓުމުގެ މަސައްކަތް މިހާރު ދަނީ ކުރަމުންނެވެ.

މި ހަރަކާތުގައި ކޮކާކޯލާ ކުންފުނީގެ ބުއިންތައް ޕްރޮމޯޓްކުރުމާއި، ފުޑް ސްޓޯލްތައް ބެހެއްޓުމާއި، "ގެސް ދަ ސްކޯރ"، "ވިޒިޓް އެންޑް ވިން" އަދި "ކިޑްސް ފަން"ގެ ނަމުގައި ކުރިއަށް ގެންދާ ހަރަކާތްތައް ފާހަގަކޮށްލެވެއެވެ.