ބިސްޓްރޭއަކުން އުފާވެރިކަން: މި ވަނީ ކިހިނެއް؟

ޖީބަށް ލުއި، ކޮލިޓީ ރަނގަޅު، ފަސޭހައިން ލިބޭ، ވެއްޓާ ރައްޓެހި, މިއީ އުކާލާ ކަރުދާސް ބޭނުންކޮށްގެން ތައްޔާރު ކުރަމުން ބިސްޓްރޭތަކާއެކު، ޣައްޒާގައި ކުކުޅު ގެންގުޅޭ މީހުންގެ ހިތްތަކަށް ތަސައްލީ ގެނެސްދޭ ބައެއް ސަބަބުތަކެވެ. އުކާލާ ކުނި ކަރުދާސް ބޭނުން ކޮށްގެން ތައްޔާރު ކޮށްފައި ހުންނަ ބިސްޓްރޭތަކަކީ، ބިސްތައް ހަލާކު ނުވެ، ސަޕްލައި ކުރެވޭނެ ކަމުގެ ޔަޤީންކަން ދޭ ވަސީލަތަކަށްވެސް ވަނީ ވެފައެވެ.

މިއީ އަކްރަމް އަލް-އަމޫރުގެ މަސައްކަތެވެ. އުކާލާ ކަރުދާސް އަލުން ބޭނުން ކުރުމުގެ މަސައްކަތް އަކްރަމް ފެށީ، ވެއްޓަށް ލިބެމުންދާ ގެއްލުން ކުޑަ ކުރުމުގެ މަޤްޞަދުގައެވެ. ކަރުދާސްތައް އެންދުމުގެ ސަބަބުން ވައިގެ ތެރެއަށް ފެތުރިގެން ތަޣައްރުކަން ކުޑަ ކުރުމުގެ ބޭނުމުގައެވެ. ޕްލާސްޓިކުގެ ބަދަލުގައި ބޭނުން ކުރާނެ އެހެން ވަސީލަތެއް ހޯދުމުގެ ބޭނުމުގައެވެ. 2.3 މިލިއަން މީހުންގެ އާބާދީއެއް އޮތް ޣައްޒާގެ އާބާދީއިން 2 ބައިކުޅަ 1 ބައި މީހުންނަކީ ވަޒީފާ ނެތް މީހުން ކަމުގައި ވާ ހިނދު، އިޤްތިޞާދީ މަސްރަޙު، ހެޔޮ ފާލަކަށް އެޅުވުމުގެ ބޭނުމުގައިވެސްމެއެވެ.

އަކްރަމް، މި މަސައްކަތް ފެށީ 2019 ވަނަ އަހަރުގެ ތެރޭގައެވެ. ފާއިތުވެދިޔަ ދެތިން އަހަރުގެ ތެރޭގައި އެ މަސައްކަތް ފުޅާ ކުރަމުން ގޮސް، މިއަދު އޭނާގެ 7 މުވައްޒަފުން އެބަތިއްބެވެ. ހާލަތު ތަން ދޭނަމަ، އަކްރަމް ހުރީ، އޭނާގެ އުފެއްދުންތައް އެކްސްޕޯޓް ކުރުމުގެ ވަރުގަދަ ޢަޒުމުގައެވެ.

މިއަދު އޭނާގެ އަމާޒަކީ، ރައްކާތެރިކަމާއެކު މުދާ ސަޕްލައި ކުރުމަށް ތަކުލީފުތަކެއް އުފުލަމުންދާ ޣައްޒާގެ ރަށްވެހިންނަށް ލުޔެއް ހޯދާ ދިނުމެވެ.

އަކްރަމްގެ އުފެއްދުންތަކުން އެންމެ ބޮޑު ފައިދާއެއް ކުރާ އެކަކީ، ކުކުޅު ގެންގުޅޭ މީހެއް ކަމަށް ވާ، މުޙައްމަދު އަބޫ މުސްޠަފާއެވެ.

އަބޫ މުސްޠަފާ ބުނާ ގޮތުގައި، އަކްރަމްގެ އުފެއްދުންތަކުގެ އެންމެ ބޮޑު ފައިދާއަކީ ނުވަތަ އެޑްވާންޓޭޖަކީ، އެ އުފެއްދުމަކީ ފަސޭހައިން ލިބެން ހުރި، ޚަރަދުގެ ގޮތުން ބަލާއިރު ޖީބަށް ލުއި، ކޮލިޓީ ރަނގަޅު އުފެއްދުންތަކަކަށް ވާ ކަމެވެ.

ޣައްޒާ ކޮންޓްރޯލް ކުރަމުން ދަނީ ހަތިޔާރިއެޅި ހަނގުރާމަވެރި ޖަމާޢަތެއްގެ ގޮތުގައި ލިސްޓު ކޮށްފައިވާ ހަމާސް ޖަމާޢަތުން ކަމަށް ވާ އިރު، ޣައްޒާއާ ސަރަޙައްދީ އިން ހިއްސާކުރާ މިޞްރާއި އިޒްރޭލުން އަދި ފަލަސްޠީނުގެ މައި ސަރުކާރުންވެސް ދަނީ ޣައްޒާއަށް އެކި ގޮތް ގޮތުން ފިއްތުންތައް ކުރިމަތި ކުރަމުންނެވެ. އެ ހުރިހާ ފިއްތުންތަކުގެ ވޭނާއި ތަކުލީފު އުފުލަމުން ދަނީ، ދެން ހަދާނެ ގޮތެއް ނޭނގި، ދުނިޔޭގެ އެންމެ ބޮޑު، އަނގަމަތި ހާ ޖަލުގައި ދިރިއުޅުމުގެ ދުވަސްތައް ވޭތު ކުރަން ޖެހިފައި ވާ ޣައްޒާގެ އާންމު ރައްޔިތުންނެވެ.