ޖީބަށް ލުއި، ކޮލިޓީ ރަނގަޅު، ފަސޭހައިން ލިބޭ، ވެއްޓާ ރައްޓެހި, މިއީ އުކާލާ ކަރުދާސް ބޭނުންކޮށްގެން ތައްޔާރު ކުރަމުން ބިސްޓްރޭތަކާއެކު، ޣައްޒާގައި ކުކުޅު ގެންގުޅޭ މީހުންގެ ހިތްތަކަށް ތަސައްލީ ގެނެސްދޭ ބައެއް ސަބަބުތަކެވެ. އުކާލާ ކުނި ކަރުދާސް ބޭނުން ކޮށްގެން ތައްޔާރު ކޮށްފައި ހުންނަ ބިސްޓްރޭތަކަކީ، ބިސްތައް ހަލާކު ނުވެ، ސަޕްލައި ކުރެވޭނެ ކަމުގެ ޔަޤީންކަން ދޭ ވަސީލަތަކަށްވެސް ވަނީ ވެފައެވެ.
މިއީ އަކްރަމް އަލް-އަމޫރުގެ މަސައްކަތެވެ. އުކާލާ ކަރުދާސް އަލުން ބޭނުން ކުރުމުގެ މަސައްކަތް އަކްރަމް ފެށީ، ވެއްޓަށް ލިބެމުންދާ ގެއްލުން ކުޑަ ކުރުމުގެ މަޤްޞަދުގައެވެ. ކަރުދާސްތައް އެންދުމުގެ ސަބަބުން ވައިގެ ތެރެއަށް ފެތުރިގެން ތަޣައްރުކަން ކުޑަ ކުރުމުގެ ބޭނުމުގައެވެ. ޕްލާސްޓިކުގެ ބަދަލުގައި ބޭނުން ކުރާނެ އެހެން ވަސީލަތެއް ހޯދުމުގެ ބޭނުމުގައެވެ. 2.3 މިލިއަން މީހުންގެ އާބާދީއެއް އޮތް ޣައްޒާގެ އާބާދީއިން 2 ބައިކުޅަ 1 ބައި މީހުންނަކީ ވަޒީފާ ނެތް މީހުން ކަމުގައި ވާ ހިނދު، އިޤްތިޞާދީ މަސްރަޙު، ހެޔޮ ފާލަކަށް އެޅުވުމުގެ ބޭނުމުގައިވެސްމެއެވެ.
މިއަދު އަހަރަމެން ދެވަނަ ފަހަރަށް ބޭނުން ކުރެވޭ ގޮތް ހަދަމުން މިދަނީ، އާންމުކޮށް، ކުނީގެ ގޮތުގައި އުކާލާ ސާމާނު. މީގެ ކުރިން އެހެން މީހަކަށް އޭގައި ފައިދާއެއް ނެތް ސާމާނު. މިއަދު އެތަކެތިން އަހަރަމެންގެ ދަނޑުވެރިންގެ މުހުތާދުތައް ފުއްދާދެވޭ. ރީސައިކަލްކޮށްފައިވާ، ކޮލިޓީ ރަނގަޅު ބިސްޓްރޭތަކާއެކު، އަހަރަމެންގެ އަމިއްލަ ބޭނުންތައް، އަމިއްލައަށް ފުއްދާލެވޭ ވަރުވޭ މިއަދު އެބަ.އަކްރަމް އަލް-އަމޫރު؛ ރީސައިކަލް ފެކްޓްރީއެއްގެ ވެރިޔާ
އަކްރަމް، މި މަސައްކަތް ފެށީ 2019 ވަނަ އަހަރުގެ ތެރޭގައެވެ. ފާއިތުވެދިޔަ ދެތިން އަހަރުގެ ތެރޭގައި އެ މަސައްކަތް ފުޅާ ކުރަމުން ގޮސް، މިއަދު އޭނާގެ 7 މުވައްޒަފުން އެބަތިއްބެވެ. ހާލަތު ތަން ދޭނަމަ، އަކްރަމް ހުރީ، އޭނާގެ އުފެއްދުންތައް އެކްސްޕޯޓް ކުރުމުގެ ވަރުގަދަ ޢަޒުމުގައެވެ.
އަހަރަމެންނަށް މި ޚިޔާލު ލިބުނީ 2019 ވަނަ އަހަރު. އަހަރަމެން ހަމަ އޭރު މަސައްކަތް ފަށައިގަތީ. މަސައްކަތް ފަށައިގަތް ދުވަސްވަރު، ވަރަށް ގިނަ މަސައްލަތަކާއި ހުރަސްތަކާ ކުރިމަތިލާން ޖެހުނު އަހަރަމެންނަށް. ދެ އަހަރެއްހާ ދުވަހު މަސައްކަތް ކުރެވުނުއިރު، ޗައިނާގެ ކުންފުނިތަކާ އަހަރަމެން ގުޅައިފިން. އެންމެ ފަހުގެ އުފެއްދުން އުފެއްދެންދެން އެކި ކަހަލަ މެޝިންތައްވެސް އިމްޕޯޓް ކުރިން.އަކްރަމް އަލް-އަމޫރު؛ ރީސައިކަލް ފެކްޓްރީއެއްގެ ވެރިޔާ
މިއަދު އޭނާގެ އަމާޒަކީ، ރައްކާތެރިކަމާއެކު މުދާ ސަޕްލައި ކުރުމަށް ތަކުލީފުތަކެއް އުފުލަމުންދާ ޣައްޒާގެ ރަށްވެހިންނަށް ލުޔެއް ހޯދާ ދިނުމެވެ.
އަހަރަމެންގެ އުފެއްދުމަކީ ތިމާވެއްޓާ ރައްޓެހި އުފެއްދުމެއް. އަހަރަމެން މި ތަކެތި އުފައްދަނީ، އެހެން ނޫނަމަ ކުނީގެ ގޮތުގަ އުކާލާ، ވެއްޓަށް ގެއްލުން ދޭނެ ސާމާނުން. މީ އެހެން ނޫންނަމަ، މުނިސިޕަލްޓީތަކަށްވެސް އޮތް ތުރާލެއް. ވެއްޓާއި، މުޖުތަމަޢުގެ އިތުރުން މުނިސިޕަލްޓީތަކަށްވެސް މި އުފެއްދުމުގެ ފައިދާ ލިބޭ. އެތައް ޓަނެއްގެ ކަރުދާސް ކުނި، އަހަރަމެން އެއް ނުކުރާ ކަމުގައި ވަނީ ނަމަ، އެ ތަކެތީގެ ތަކުލީފު އުފުލަން ޖެހެނީ މުނިސިޕަލްޓީތަކަށް. އެމީހުން އެ ސާމާނު ފޮނުވާނީ ކުނިގޮނޑަށް، ނޫނީ އަންދާވެސްލާފާނެ.އަކްރަމް އަލް-އަމޫރު؛ ރީސައިކަލް ފެކްޓްރީއެއްގެ ވެރިޔާ
އަކްރަމްގެ އުފެއްދުންތަކުން އެންމެ ބޮޑު ފައިދާއެއް ކުރާ އެކަކީ، ކުކުޅު ގެންގުޅޭ މީހެއް ކަމަށް ވާ، މުޙައްމަދު އަބޫ މުސްޠަފާއެވެ.
ﷲ އަށް ޙަމްދުހުރި. ރީސައިކަލް ކާރުޚާނާގެ ސަބަބުން އަހަރަމެން ސަލާމަތްވެއްޖެ. އެމީހުން އުފައްދާ ބިސްޓްރޭއަކީ ވަރަށް ކޮލިޓީ އެއްޗެއް. ޓްރޭތަކަކީ ބަރު، އަދި ވިޔަފާރިވެރިންނާއި، ފިހާރަތަކާއި ކަސްޓަމަރުންނަށްވެސް ވިއްކާލަން ފަސޭހަ ޓްރޭތަކެއް.މުޙައްމަދު އަބޫ މުސްޠަފާ؛ ކުކުޅު ގެންގުޅޭ މީހެއް
އަބޫ މުސްޠަފާ ބުނާ ގޮތުގައި، އަކްރަމްގެ އުފެއްދުންތަކުގެ އެންމެ ބޮޑު ފައިދާއަކީ ނުވަތަ އެޑްވާންޓޭޖަކީ، އެ އުފެއްދުމަކީ ފަސޭހައިން ލިބެން ހުރި، ޚަރަދުގެ ގޮތުން ބަލާއިރު ޖީބަށް ލުއި، ކޮލިޓީ ރަނގަޅު އުފެއްދުންތަކަކަށް ވާ ކަމެވެ.
އިމްޕޯޓް ކޮށްފަ ހުންނީ ވަރަށް ބަލިކަށި ބިސްޓްރޭތަކެއް. އެކަމަކު، މިތަނުގަ މި އުފައްދާ ބިސްޓްރޭ ވަރަށް ވަރުގަދަ. ބިސްތައް ހަލާކެއް ނުވޭ.މުޙައްމަދު އަބޫ މުސްޠަފާ؛ ކުކުޅު ގެންގުޅޭ މީހެއް
ޣައްޒާ ކޮންޓްރޯލް ކުރަމުން ދަނީ ހަތިޔާރިއެޅި ހަނގުރާމަވެރި ޖަމާޢަތެއްގެ ގޮތުގައި ލިސްޓު ކޮށްފައިވާ ހަމާސް ޖަމާޢަތުން ކަމަށް ވާ އިރު، ޣައްޒާއާ ސަރަޙައްދީ އިން ހިއްސާކުރާ މިޞްރާއި އިޒްރޭލުން އަދި ފަލަސްޠީނުގެ މައި ސަރުކާރުންވެސް ދަނީ ޣައްޒާއަށް އެކި ގޮތް ގޮތުން ފިއްތުންތައް ކުރިމަތި ކުރަމުންނެވެ. އެ ހުރިހާ ފިއްތުންތަކުގެ ވޭނާއި ތަކުލީފު އުފުލަމުން ދަނީ، ދެން ހަދާނެ ގޮތެއް ނޭނގި، ދުނިޔޭގެ އެންމެ ބޮޑު، އަނގަމަތި ހާ ޖަލުގައި ދިރިއުޅުމުގެ ދުވަސްތައް ވޭތު ކުރަން ޖެހިފައި ވާ ޣައްޒާގެ އާންމު ރައްޔިތުންނެވެ.
