އިނދަޖެހުނު އިޤްތިޞާދާއެކު ލުބްނާންގައި ވޯލްޑްކަޕްގެ ފޯރިއަށްވީ ކިހިނެއް؟

ވޯލްޑްކަޕްގެ ފޯރީގައި ބައިވެރިނުވާ ހަމަ އެންމެ ޤައުމެއްވެސް އޮވެދާނެއެކޭ ހިތެއް ނުބުނެއެވެ. އެންމެ ތަނަވަސް ޤައުމުތަކުން ފެށިގެން އެންމެ ފަޤީރު ޤައުމުތަކާ ހިސާބަށް ބެލި ކަމުގައި ވީ ނަމަވެސް، އެ ބަޔަކަށް ވީ އެންމެ ގަދައަކަށް ފުޓުބޯޅައިގެ ފޯރި ނަގާ މަންޒަރު ފެނެއެވެ. މިދިޔަ ދެތިން އަހަރެއްހާ ދުވަހު، އިޤްތިޞާދީ އަދި މާލީ އަނދަވަޅަކަށް ވެއްޓިފައި އޮތް ލުބްނާންގައިވެސް އެކަން އޮތީ އެހެންނެވެ. މީގެ ކުރިން އޮތް މިންވަރަށް ނޫން ކަމުގައި ވީ ނަމަވެސް، ފުޓުބޯޅައިގެ މި ޢީދުގައި، ލުބްނާނުންވެސް ދަނީ ބައިވެރިވަމުންނެވެ. އެ ބަޔަކަށް ވީ އެންމެ ފުރިހަމައަކަށެވެ.

ކެފޭ ނުވަތަ ރެސްޓޯރަންޓަކަށް ގޮސް، އެންމެން އެކުގައި މެޗު ބެލުމަކީ ލުބްނާނުގެ އާދަކާދަ ހަމަޖެހިފައި އޮތް ގޮތް ކަމުގައި ވީ ނަމަވެސް، ލުބްނާންގައި ކެފޭއާއި ރެސްޓޯރަންޓް ހިންގާ ފަރާތްތަކުން ބުނީ، އެ ޤައުމަށް ކުރިމަތިލާން ޖެހިފައި ވާ އިޤްތިޞާދީ ކާރިޘާގެ ސަބަބުން، މި ފަހަރުގެ ހާލަތު، އެހެން ފަހަރުތަކާ ތަފާތު ކަމަށެވެ.

ފުޓުބޯޅަ ފޭނުންނަށް ހާއްސަކޮށްގެން ޚިދުމަތް ދިނުމުގެ ފުރުޞަތުން މަހްރޫމުވެފައިވާ ކެފޭ އޯނަރުންގެ ތެރޭގައި ހިމެނޭ އެކަކީ މުޙައްމަދު ދާޣިރުއެވެ. އޭނާގެ ކެފޭއަށް، ފުޓުބޯޅައިގެ ފޭނުނަށް މަރުޙަބާ ކިއޭ ގޮތް ނުވީ، މެޗުތަކުގެ ބްރޯޑްކާސްޓް ކުރުމުގެ ކޮޕީރައިޓް ފީ، އަތް ނުފޯރާ ފަށަށް އެރުމުން ކަމަށް ދާޣިރު ބުނެއެވެ.

އެހެން ކެފޭ އޯނަރެއް ކަމަށް ވާ ޢަލީ ދޫޣާންއަށް މަޖުބޫރުވީ، ކަސްޓަމަރުންގެ އަތުން ކޮންމެވެސް ވަރެއްގެ ފީއެއް ނެގުމަށެވެ. އޭނާގެ ކެފޭގައި މެޗުތައް ދެއްކުމުގެ ޚަރަދުތައް ދެކޮޅު ޖެއްސެނީ، ކަސްޓަމަރުންގެ އަތުން އެންޓްރަންސް ފީއެއް ނަގައިގެންނެވެ. ދޫޣާން ބުނާ ގޮތުގައި އެ ފައިސާއަކީ، ކަސްޓަމަރުންގެ ޒަރޫރީ ބޭނުންތަކަށް ޚަރަދު ކުރުމަށް އެމީހުންގެ އަތުގައި ހުރި ފައިސާކޮޅެވެ.

2019 ވަނަ އަހަރު، ލުބްނާންގެ މާލީ ނިޒާމް އިނދަޖެހުމާއެކު އެތައް ބައެއްގެ ދިރިއުޅުމުގެ ހާލަތު، އިންތިހާއަށް ނިކަމެތިވެގެން ދިޔައެވެ. ބޭންކުތައް މުޅިން ހުއްޓުނެވެ. 1975 ން 1990ށް ކުރި ދާޚިލީ ހަނގުރާމައަށްފަހު ޤައުމު ނުދެކޭ ދަރަޖައަށް، އެތައް ބަޔަކު ޤައުމު ދޫކޮށް ދިޔައެވެ.

ވޯލްޑްކަޕްގެ މި ޢީދުގެ ފޯރި ކުޑަވެފައިވާ ކަމުގެ އިޙްސާސް އެންމެ ބޮޑަށް ކުރާ އެކަކީ، ޢުމުރުން 71 އަހަރުގެ މުޞްޠަފާ ނާޖީއެވެ. އެއީ ވޯލްޑްކަޕްގެ ދުވަސްވަރު އެންމެ ވައިގައި ހިފާ، ޤައުމުތަކުގެ ދިދަ ވިއްކުމުގެ މަސައްކަތުގައި 40 އަހަރު ހޭދަކޮށްފައި ވާ މީހެކެވެ.

ފުޓުބޯޅައަށް ލޯބިކުރާ މީހުންގެ ފަރާތުން އިވެނީ އަދި މުޅިން ތަފާތު އަޑެކެވެ.

ފުޓުބޯޅައަށް ހިފާ ދެއްވެއްގެ ސަބަބުން، ޖާނާއި މާލުން ޤުރުބާން ވުމަކީވެސް ބަޔަކު ކޮށްފާނެ ކަމެއް ކަން، ލުބްނާނަށް ބަލާލުމުން އެނގެއެވެ.

ލުބްނާންގެ މާލީ ކާރިޘާއަށް 3 އަހަރު ވެގެން ދިޔައިރު، އެ ޤައުމުގެ ފައިސާގެ އަގު، 90 ޕަސެންޓަށް ވުރެ ބޮޑަށް ވެއްޓި، އިންތިހާ ފަޤީރުކަން ފެތުރި، މާލީ ނިޒާމުގެ ވާގި ނެތިއްޖެއެވެ. މިއަދު އެ ޤައުމުން ތަޖުރިބާ ކުރަމުން ދާ ތަކުލީފުތަކަކީ، ދާޚިލީ ހަނގުރާމައިގެ ދުވަސްވަރަށް ފަހު އެ ޤައުމަށް ކުރިމަތިލާން ޖެހުނު އެންމެ ގެއްލުން ދެނިވި ތަކުލީފުތަކެވެ. ލުބްނާންގައި މިވަގުތު ތިބި ކޮންމެ 10 މީހަކުން 8 މީހަކީ ފަޤީރަކަށް ވަނީ ވެފައެވެ.