ޓެކްނޮލޮޖީގެ ރޮނގުން އިންތިހާއަށް ކުރިއަރައި ގޮސްފައިވާ އަދުގެ ދުނިޔެއަށް ނަޒަރު ހިންގާލާއިރު، އަތުގައި ފޯނެއް ނެތް މީހަކު މަދުވާނެއެވެ. އެންމެ ފަހުގެ ފޯނުތަކުން ފެށިގެން ގޮސް، އެންމެ އިހުގެ މޯބައިލް ފޯނުތައް ގެންގުޅޭ މީހުންވެސް ފެނެއެވެ. ކިތަންމެ ދަތި ހާލެއްގައި އުޅެން ޖެހުނު ނަމަވެސް، ކިތަންމެ ބޮޑު ބިރުވެރިކަމެއްގެ ތެރޭގައި އުޅެން ޖެހުނު ނަމަވެސް، އެ މީހެއްގެ އަތް ފޯރާ ހިސާބުން ލިބެންހުރި މޯބައިލް ފޯނެއްގެ ބޭނުން ނުހިފާ މީހަކު މަދެވެ. މޯބައިލް ފޯނު ވެފައިވަނީ އާންމު ދިރިއުޅުމުގެ ބަޔަކަށޭ ދެންނެވުމަކުންވެސް ގޯހެއް ނެތެވެ. އެ ފޯނަކީ ކޮންމެ މީހެއްގެވެސް ޒާތީ، ހައްސާސީ އެތައް މައުލޫމާތެއް ރައްކާކުރެވިފައި ވާ ޚަޒާނާއެކޭވެސް ބުނެވިދާނެއެވެ.

މިހެން އުޅޭ އުޅުމުގެ ތެރޭގައި ފޯނު ހަލާކުވެއްޖެނަމަ ހަތަރު އުދަރެސް ފެނުޖެހުނީއޭ ހިތަށްއަރާ ފަހަރުވެސް އާދެއެވެ. ދެވަނަ މީހަކަށް ނުވަތަ ތިމާގެ އެންމެ ގާތް މީހުންގެ ބޭރުން އިތުރުން މީހަކަށް ފެންނަން ނޭދޭ އެތައް މައުލޫމާތެއް އެ ފޯނުގައި ހުންނާނެކަން އެނގިހުރެމެ، ކިތަންމެ ޖެހިލުންވި ކަމުގައި ވީ ނަމަވެސް، ނުދަންނަ މީހެއްގެ އަތްމައްޗަށް ފޯނު ހަދަން ދޫކޮށްލަން ޖެހެއެވެ. މި ނުތަނަވަސްކަމާ އެންމެ ބޮޑަށް ކުރިމަތިލާން ޖެހޭ އެއް ބަޔަކީ، ހިޖާބުވެ ނިވާވެގެން ތިބޭ އަންހެނުންނެވެ. ހަތަރު ފާރުގެ ނިވަލުގައި ދަރިންނާއެކު އުޅޭ މަންޒަރުތައް އެ ފޯނަކަށް ރެކޯޑްކުރެވިފައިވާ ފޯނު ހަލާކުވެ، ހަދަން ދޫކޮށްލަން ޖެހެނީ އެމީހެއްގެ ކުރިމަތީގައި ތިމާގެ އައުރަ ކަޝްފު ކުރުން ހަރާމް މީހެއްގެ އަތް މައްޗަށެވެ.

މި މައްސަލައަށް ހައްލެއް ހޯދައިދިނުމަށް ތެދުވި އެކަކީ، ޣައްޒާއަށް ނިސްބަތްވާ ވާލާ ހައްމާދުއެވެ. ވާލާގެ މަސައްކަތަކީ ގޭގައި އިނދެގެން ފޯނު މަރާމާތުކުރުމެވެ. އޭނާގެ ގާތުން ޚިދުމަތް ހޯދާ ކަސްޓަމަރުންނަކީ، ހިލޭ ފިރިހެނެއްގެ އަތް މައްޗަށް މޯބައިލް ފޯނު ދޫކޮށްލައި، އޭގައި ހުރި ފޮޓޯތަކާއި ސޯޝަލް މީޑިއާ އެކައުންޓްތަކަށް ވަނުމުގެ ފުރުސަތު އެމީހަކަށް ހުޅުވާލުމަށް އިންކާރުކުރާ އަންހެނުންނެވެ.

ވިޔަފާރިއެއްގެ ގޮތުގައި ވާލާ މި މަސައްކަތް ފެށީ "އަމްޖާދު ފޮރ ކޮމިއުނިޓީ ކްރިއޭޓިވިޓީ އެންޑް ޑިވަލޮޕްމަންޓް"ގެ އެހީތެރިކަމާ އެކުގައެވެ. އެ ޖަމިއްޔާއަކީ އަންހެން ދަސްވެނިންގެ ތެރެއިން ވަޒީފާ ނުލިބި ތިބި މީހުންނަށް އެހީތެރިކަން ފޯރުކޮށްދީ، ވަޒީފާގެ ފުރުސަތު ތަނަވަސް ކޮށްދިނުމަށް، މަސައްކަތު ބައްދަލުވުންތަކާއި އެނޫންވެސް ހަރަކާތްތައް ހިންގާ އެންޖީއޯއެކެވެ.

ސަލާމަތީ ސަބަބުތަކަކަށްޓަކައި ކަމަށް ބުނެ އިޒްރޭލުން ދަނީ އެއްގަމާއި ކަނޑުގެ ބޯޑަރުތަކުން ޣައްޒާ ފިއްތާލަމުންނެވެ. އުޒުރަކަށް ހަދަނީ ޣައްޒާގެ ކޮންޓްރޯލް ނަގާފައިވާ ހަމާސް ޖަމާއަތަކީ ޓެރަރިސްޓް ޖަމާއަތެއް ކަމަށް ބުނާ ބުނުމެވެ. ޣައްޒާއާ ބޯޑަރު ހިއްސާކުރާ މިސްރުންވެސް ދަނީ ޣައްޒާއަށް ފިއްތުންތައް ކުރިމަތި ކުރަމުންނެވެ. ފަލަސްތީނުގެ މައި ސަރުކާރުގައިވެސް އިސްތިސްނާއެއް ނެތެވެ.

ހުރިހާ ކޮޅަކުން ފިއްތާލެވިފައި އޮތުމުގެ ސަބަބުން، ޣައްޒާގެ އިގްތިސާދު ވަނީ ހަފުސްވެފައެވެ. ކޮލެޖުން ދަސްވެނިވުމަށްފަހު ވަޒީފާއެއް ހޯދުމުގައި ތަކުލީފު އުފުލަމުން ދާ އަންހެނުންގެ އަދަދު އިންތިހާއެވެ.

ވާލާގެ ފަރާތުން އެންމެ ފުރަތަމަ ޚިދުމަތް ހޯދި ކަސްޓަމަރުންގެ ތެރޭގައި އޭނާގެ އަވައްޓެރިން ހިމެނެއެވެ.

ވާލާގެ ދިރިއުޅުން ކޮޅަށް ޖެހުމަށް އޭނާއަށް އެހީތެރިކަން ފޯރުކޮށްދިން އެންޖީއޯއިން ބުނި ގޮތުގައި، އެ ޖަމިއްޔާއިން ތަމްރީނުކޮށްދޭން ހުށަހެޅީ 10 ފުރުސަތެވެ. ނަމަވެސް، އެ ފުރުސަތުތަކަށް އެދި ކުރިމަތިލީ އަންހެނުންގެ އަދަދު 1600އަށް އެރިއެވެ.

2 މިލިއަނަށްވުރެ ގިނަ މީހުން ތޮއްޖެހިފައިވާ ޣައްޒާއަކީ ދުނިޔޭގައި މިވަގުތު އޮތް އެންމެ ބޮޑު، އަނގަމަތި ހާ ޖަލުގެ ގޮތުގައި ސިފަކުރާއިރު, ޣައްޒާގެ އާބާދީގެ ދެބައިކުޅަ އެއްބައި މީހުންނަކީ ވަޒީފާ ނެތް މީހުންނެވެ. ވަކިން ޚާއްސަކޮށް، އަންހެނުންނަށް ލިބޭ ވަޒީފާގެ ފުރުސަތުތައް މަދެވެ. ނަމަވެސް، ވާލާގެ އަތުގައި ނަސީބު ހިފީއެވެ.