ރައީސް އިބްރާހިމް މުހައްމަދު ޞާލިހު އަދި އިތުރު ދައުރަކަށް ދިވެހި ރައްޔިތުން ބޭނުންވާކަން އެއީ، މާ ސާފުކޮށް އަޅުގަނޑުމެންނަށް އެނގެން އޮތް ހަގީގަތެއް ކަމަށް ފޮރިން މިނިސްޓަރ އަބްދުﷲ ޝާހިދު ވިދާޅުވެއްޖެއެވެ.

ރާއްޖެޓީވީގެ ފަލަސުރުހީ ޕްރޮގްރާމުގައި، ބައިނަލްއަގުވާމީ ދުނިޔެއާއި ގުޅިގެން މި ކުރާ މަސައްކަތާއެކު، ދިވެހިން ގޮވައިގެން، ރައީސް ޞާލިހުގެ ސަރުކާރުން އިތުރު ދައުރެއްގައި ވެރިކަން ކުރައްވަން ފުރުސަތު ދެއްވަންޖެހޭތޯ ކުރެވުނު ސުވާލަށް ޖަވާބު ދެއްވަމުން ފޮރިން މިނިސްޓަރ އަބްދުﷲ ޝާހިދު ވިދާޅުވީ، ޝައްކެއް ނެތް ގޮތުގައި، ދިވެހިރާއްޖެއަށް ކުރިއެރުމާއި، ލާބައާއި މަންފާ އޮތީ ބައިނަލްއަގުވާމީ ގުޅުންތައް އިތުރަށް ބަދަހީކޮށްގެން ކަމަށެވެ. ދިވެހިންނަށް، ކުރީގައި ފެނިފައި އޮތް ސަރުކާރަކީ ވަށައިގެން ފަންފުޅަފަތް ޖަހާލައިގެން ފިލާތިބެ މަސައްކަތް ކުރި ބައެއް ކަމަށެވެ. ބޭރު މީހަކާއި ބައްދަލުކޮށްލަން ނުކެރޭ ކަމަށާއި، ބޭރު މީހަކާއި ބައްދަލުކޮށްފިއްޔާ ވެސް އެވަނީ އެމީހަކަށް ވިކުނީ ކަމަށް ކަމަށެވެ. އެހާވެސް ނަފްސުގެ މައްޗަށް އިތުބާރު ނެތް ބޭފުޅުން އެއިރު ތިއްބެވި ކަމަށް މިނިސްޓަރ ވިދާޅުވިއެވެ.

މިނިސްޓަރ ވިދާޅުވީ ރައީސް ޞާލިހުގެ ސަރުކާރުން، ދުނިޔޭގެ ކިތައްމެ ބޮޑު ގައުމެއްގެ މަންދޫބަކާވެސް ބައްދަލުކުރައްވާނީ ފަހުރުވެރި ކަމާއެކީގައި، އެމަނިކުފާނާއި، އަދި އެމަނިކުފާނާއެކީ މަަސައްކަތްކުރާ ބޭފުޅުންނަކީ މައްދިވެހިން ކަމަށް ގަބޫލުކޮށްގެން، ފިސާރި ކެރިގެން ކަމަށެވެ.

މިނިސްޓަރ ޝާހިދު ވިދާޅުވީ މި ސަރުކާރު، އާދެ ރައީސް އިބްރާހިމް މުހައްމަދު ޞާލިހު އަދި އިތުރު ދައުރަކަށް ދިވެހި ރައްޔިތުން ބޭނުންވާކަން އެއީ، މާ ސާފުކޮށް އެނގެން އޮތް ހަގީގަތެއް ކަމަށެވެ.

މިނިސްޓަރ ވިދާޅުވީ ހާރިޖީ ދާއިރާއިން ހޯދާފައިވާ ކާމިޔާބީތައް ހޯދިފައިވަނީ ރައީސް އިބްރާހިމް މުހައްމަދު ޞާލިހުގެ މާލިމީކަމުގައި، ހާރިޖިއްޔާގައި މަސައްކަތް ކުރައްވަން ތިއްބެވިބޭފުޅުންގެ މުރާލިކަމާއި، އެބޭފުޅުންގެ މަސައްކަތްތަކަށް ރައީސް ދެއްވާ އަހައްމިއްޔަތެއްގެ ސަބަބުން ކަމަށެވެ.

މީގެ ކުރިން މިނިސްޓަރ ޝާހިދު ވިދާޅުވެފައިވަނީ، ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް އަލުން އިންތިހާބުވެވަޑައިގަންނަވާނެ ކަމަށާއި، އެމަނިކުފާނުގެ ލީޑަރޝިޕްގެ ދަށުން ދިވެހި ރައްޔިތުންނަށް ރަނގަޅު ކަންކަން ކޮށްދެއްވާފައިވާ ކަމަށާއި، އެކަންކަން ދިވެހި ރައްޔިތުން ބަލައިގަނެފައިވާ ކަމަށެވެ.