ހިޔާ ޓަވަރުތަކަށް ކަރަންޓު ދިނުމުގެ މަސައްކަތަށް ދެ ގަޑިއިރު ހޭދަވާނެކަމަށް ބެލެވޭ: ސްޓެލްކޯ
ކަރަންޓު ކެނޑިފައިވަނީ، އެ ޓަވަރުތަކަށް ކަރަންޓު ދިނުމަށްޓަކައި އަޅާފައިވާ މައި ކޭބަލަކަށް އިމާރާތްކުރުމުގެ މަސައްކަތް ކުރަމުން އަންނަ ބަޔަކުގެ ފަރާތުން ކޮނުމުގެ ތެރޭ ގެއްލުން ލިބުމުން
ހިޔާ ޓަވަރުތަކުން ކަރަންޓް ކެނޑުން
ހިޔާޓަވަރުތަކަށް ކަރަންޓު ދިނުމަށް އަޅާފައިވާ ކޭބަލް މަރާމާތު ކުރުމަށް ގިނަ ވަގުތުތަކެއް ނަގާނެ ކަމަށް ބެލެވޭތީ، އެ ކޭބަލް އައިސޮލޭޓްކޮށް، އެހެން ކޭބަލެއް މެދުވެރިކޮށް ކަރަންޓު ދިނުމުގެ މަސައްކަތް މިހާރު ދަނީ ކުރެވެމުންކަމަށް ސްޓެލްކޯއިން ބުނެފިއެވެ.
ހިޔާ ފްލެޓްތަކުން ކަރަންޓް ކެނޑިފައިވާތާ ގަޑިއިރަކަށްވުރެ ގިނައިރު ވެފައިވާއިރު ޓަވަރުތަކުން ވަނީ ފެންވެސް ކެނޑިފައެވެ. އެކަމުގެ ސަބަބުން އާންމުންނަށް އަންނަނީ ބޮޑެތި ދަތިތަކާ ދިމާވަމުންނެވެ.
ސްޓެލްކޯއިން ބުނީ ހުޅުމާލޭގެ ހިޔާ ޓަވަރުތަކުން ކަރަންޓު ކެނޑިފައިވަނީ، އެ ޓަވަރުތަކަށް ކަރަންޓު ދިނުމަށްޓަކައި އަޅާފައިވާ މައި ކޭބަލަކަށް އިމާރާތްކުރުމުގެ މަސައްކަތް ކުރަމުން އަންނަ ބަޔަކުގެ ފަރާތުން ކޮނުމުގެ ތެރޭ ގެއްލުން ލިބުމުގެ ސަބަބުންކަމަށެވެ.
އެހެން ކޭބަލެއް މެދުވެރިކޮށް ކަރަންޓު ދިނުމަށް ދެ ގަޑިއިރު ހޭދަވާނެކަމަށް ސްޓެލްކޯއިން ބުނެއެވެ.
